داوای خەرجكردنەوەی دەرماڵەی خوێندكاران دەكرێت

.

كۆمەڵەی خوێندكارانی كوردستان لە یاداشتنامەیەكدا داوای گێڕانەوەی دەرماڵە و پێدانی قەرز بە خوێندكارانی زانكۆ و پەیمانگاكان دەكات، لێپرسراوی لقی زانكۆكانی كۆمەڵەی خوێندكارانیش رایدەگەیەنێت، كۆڵنادەین تا سەرجەم مافەكانی خوێندكاران دەستەبەر نەكەین.

جوتیار مەحمود لێپرسراوی لقی زانكۆكانی كۆمەڵەی خوێندكاران بە PUKmedia ی راگەیاند: دوای لابردنی پاشەكەوتی مووچە و باشتربوونی دۆخی دارایی و ئابوری و حكومەتی هەرێمی كوردستان وەك كۆمەڵەی خوێندكارانی كوردستان لە روانگەی هەستكردن بە بەرپرسیارێتیمان بەرامبەر بە خوێندكارانی زانكۆ و پەیمانگاكان، لە كۆنگرەیەكی رۆژنامەوانیدا یاداشتنامەیەكمان بڵاوكردەوە.

وتیشی: یاداشتنامەكە خۆی لە دوو خاڵدا دەبینێتەوە كە دەستپێكردنەوەی دەرماڵەی سەرجەم خوێندكارانی زانكۆ و پەیمانگاكانە و دروستكردنی سندوقێكی پێدانی قەرزە بەو خوێندكارانەی هەژارن و توانای دابینكردنی خەرجی خوێندنیان نییە.

جوتیار مەحمود ئاماژەی بەوەشكرد، بڵاوكردنەوەی ئەم یاداشتنامەیە هەنگاوی یەكەممانە و لە هەنگاوی دووەمدا سەردانی فراكسیۆنەكانی پەرلەمان و وەزارەتەكانی خوێندنی باڵا و ئەنجومەنی وەزیرانیش دەكەین تا ئەوانیش لە رێگەی كردارییەوە هەنگاوی بۆ بنێن.

لە كۆتایشدا لێپرسراوی لقی زانكۆكانی كۆمەڵەی خوێندكاران بەڵێنی بە خوێندكاران دا   كە كۆڵنادەن و هەمیشە لەهەوڵدا دەبن بۆ بەدەستهێنانی سەرجەم مافەكانیان.

PUKmedia  تاژاو محەمەد