سه‌رۆك كۆمار: ده‌بێت به‌ گژی ھزری ته‌كفیریدا بچینه‌وه‌

.

سه‌رۆك كۆمار د. به‌رھه‌م ساڵح ئه‌مڕۆ سێشه‌ممه‌ 12-3-2019 له‌كۆشكی سه‌لام له‌ به‌غدا چاوی به‌ ئه‌نجومه‌نی ئوسقوفه‌كانی كریستیان (ئه‌نجومه‌نی سه‌رۆكایه‌تی كڵێسای كریستیانه‌كان) و ئه‌ندامانی فراكسیۆنی كریستیانه‌كان له‌ ئه‌نجومه‌نی نوێنه‌ران كه‌وت.

له‌ دیداره‌كه‌دا سه‌رۆك به‌رھه‌م ساڵح ئاماژه‌ی به‌وه‌ كرد كه‌ به‌ یه‌كریزی رۆڵه‌كانی پێكھاته‌ و نه‌ته‌وه‌كانی عێراق سه‌ركه‌وتنێكی گه‌وره‌ به‌ سه‌ر گروپه‌ تیرۆریستیه‌كاندا به‌ده‌ستھات، ھاوكات جه‌ختیشی له‌ پێویستی بونیادنانی كۆمه‌ڵگه‌ له‌سه‌ر بنه‌مایه‌كی لێبورده‌یی و دادپه‌روه‌ری و یه‌كسانی كرده‌وه‌.

ھه‌روه‌ھا ئاماژه‌ی به‌نه‌ھامه‌تییه‌كانی پێكھاته‌ی كریستیانه‌كان له‌ سه‌ركوت و ئاواره‌كردنی زۆره‌ملێ له‌لایه‌ن گروپه‌ تیرۆریستیه‌كانه‌وه‌ كرد و جه‌ختشی له‌ پێویستی دابینكردنی ژینگه‌یه‌كی ئارام و گێڕانه‌وه‌ی خێزانه‌ ئاواره‌كان بۆ زێدی باوباپیرانیان كرده‌وه‌.

له‌ھه‌مان كاتدا سه‌رۆك به‌رھه‌م ساڵح جه‌ختیكرده‌وه‌ كه‌ له‌ڕێگای یه‌كریزی و بڕوابوون به‌ پێكه‌وه‌ ژیانی ئاشتیانه‌ و ڕێزگرتن له‌ بیروڕا جیاوازه‌كان، ده‌توانین به‌ گژی ھزری ته‌كفیریدا بچینه‌وه‌ كه‌ گروپه‌ تیرۆریستیه‌كان بانگه‌شه‌ی بۆ ده‌كه‌ن، ھه‌روه‌ھا به‌رگری كریستیانه‌كانی له‌ روبه‌ڕووبونه‌وه‌ی رێكخراوی تیرۆریستی داعش و پابه‌ندبونیان به‌ نیشتمانه‌وه‌ به‌رزنرخاند.

له‌لای خۆیانه‌وه‌ وه‌فدی میوان رۆڵی سه‌رۆك به‌رھه‌م ساڵحیان له‌ زامنكردنی یه‌كریزی نیشتمانی له‌ نێوان پێكھاته‌كانی كۆمه‌ڵگه‌ی عیراقی به‌رزنرخاند، ھاوكات سوپاسی سه‌رۆك كۆماریان كرد بۆ تێگه‌یشتن و پشتگیری به‌رده‌وامی له‌ داخوازیه‌كانی گه‌لی عیراق له‌ ھه‌موو ساته‌وه‌ختێكدا.

PUKmedia