دوو کتێبی دلێری مەلا ئەحمەد بڵاوکرانەوە

.

لە ئەمنەسورەکە کۆڕێک بۆ ناساندنی دوو کتێبی رۆژنامەنوس دلێر مەلا ئەحمەد بەڕێوەچوو.

سەعات ٢ی پاشنیوەڕۆی ئەمڕۆ لە کافێ نێتی ئەمنەسورەکە بە ئامادەبونی نوسەران و ڕۆژنامەنوسان کۆڕێک بۆ ناساندنی هەردوو کتێبی ( هەڤاڵ مام جەلال و گەڕەکی خانووە قوڕەکان، کۆچ و دابڕان )ی ڕۆژنامەنووس دلێر مەلا ئەحمەد بەڕێوەچوو.

هەردوو کتێبەکەش لەسەر ئەرکی کوردستانی نوێ و دەرباز کۆسرەت رەسول چاپ کراون لقی سلێمانی سەندیکای ڕۆژنامەنوسانیش مەراسیمی ناساندنی کتێبەکانی بۆ ئەنجامدا.

لەو کۆڕەدا کاروان ئەنوەر سکرتێری لقی سلێمانی سەندیکای ڕۆژنامەنوسانی کوردستان باسێکی کورتی لەسەر نوسەر و ڕۆژنامەنوس دلێری مەلا ئەحمەد پێشکەشکرد و رایگەیاند ئەم ڕۆژنامەنوسە بوێرە بە قەڵەمەکەی شێرپەنجەی بەزاند و لە ماوەی نەخۆشکەوتنیدا ژمارەیەک کتێبی نوسیوەو ئامادە کردوەو ئاماژەی بەوەدا کە ١٧ کتێبی ئەم نوسەرە ئامادەن بۆ چاپ و ئەم ٢ کتێبەی لەلایەندەرباز کۆسرەت رەسوڵ و کوردستانی نوێوە چاپ کراوەو کە بەدیهێنانی خەونێکی بچوکی ئەم نوسەرەیە، وتیشی: دلێری مەلا ئەحمەد داوای دەستگیرۆیی و هاوکاری بۆ چارەسەری نەخۆشیەکەی ناکات بەڵام هێندە ئازایە داوای هاوکاری بۆ چاپکردنی کتێبەکانی دەکات کە ئاواتێکی گەورەیەتی.

کاروان ئەنوەر بۆ بەدیهێنانی خەونەکەی دلێری مەلا داوای لەو ناوەند و کەسایەتیانە کرد کە لەو بوارەدا کاردەکەن خەونەکەی بۆ بهێننە دی.
دواتر دلێری مەلا ئەحمەد سەرباری نالەباری باری تەندروستی سوپاس و بەخێرهاتنی ئامادەبوانی کرد و خۆشحاڵی دەربڕی بەو ٢ کتێبە خەونێکی ڕۆژنامەنوسی هاتوەتە دی و باسێکی کورتی ئەو ٢ بەرهەمەی کرد و تەئکیدی کردەوە کە ژمارەیەک کتێبی دیکەی ئامادەن بۆ چاپ و ئاواتی خواست کە دەستگیرۆیی بکرێت بۆ چاپ کردنیان و وتی یەکێک لەو کتێبانەی کە زۆرم خۆشدەوێت و ٢ بەرگە بە ناوی چینی کرێکارەوەیە.

پاشان لەلایەن خاتوو شاناز ئیبراهیم ئەحمەد کە لە کۆڕەکە ئامادە بوو خەڵاتی ڕێزلێنانی سەندیکای ڕۆژنامەنوسانی پێشکەش بە دلێری مەلا ئەحمەد کرد و دەستخۆشی لێ کردو، بەڵێنیشی دا کە لە نزیکەوە ئاگاداریبێت و هەموو ئامادەییەکی دەربڕی.

PUKmedia تایبەت