یادی ٣١ ساڵەی ئەنفالی دۆڵی جافایەتی دەکرێتەوە

.

لە قەزای دوکان یادی ٣١ ساڵەی ئەنفالی دۆڵی جافایەتی لە قەزای دوکان بەڕێوەدەچێت.

ئەمڕۆ ٢٢-٢-٢٠١٩ بە ئامادەبونی بەرپرسانی حزبی و حکومی و کەسوکاری ئەنفالکراوان و هاوڵاتیان یادی ٣١ ساڵەی ئەنفالی دۆڵی جافایەتی لە قەزای دوکان بەڕێوەدەچێت.

لە مەراسیمەکەدا حاکم قادر ئەندامی دەستەی کارگێڕی یەکێتی نیشتمانی کوردستان لە وتەیەکیدا وتی: ٣١ ساڵ لەمەوبەر ڕژێمی بەعسی روخاو پەلاماری ئەم ناوچانەی داو یەکەم شاڵاوی ئەنفالی دەستپێکرد و ویستی بەم پەلامارانەی ورەو ئیرادەی گەلی کوردو پێشمەرگە بروخێنێ بەڵام ئێمە سەلماندمان کە هیچ هێزێک تێکمان ناشکێنێت و کۆڵ نادەین.

وتیشی: سیاسەتی یەکێتی هەمیشە لە خزمەتی گەلی کورددا بوە، بۆیە ئێستەش دەمانەوێ حکومەتێک پێک بهێنین سەروەت و سامانەکەی بۆ خزمەتی خەڵک و ئاوەدان کردنەوەی ئەم ناوچانە بێت، بۆیە هیچ کاتێک حکومەت بەبێ یەکێتی بەڕێوەناچێت.

هاوکات مەحمودی حاجی ساڵح وەزیری کاروباری شەهیدان و ئەنفالکراوان وتی: بۆ هێنانەوەو ناسینی ئەو روفاتانەی دەدۆزرێنەوە پێویستی بە بودجەیەکی زۆر هەیەو هەتا ئێستاش کە ئەو پرۆسەیە دوا کەوتوە بەهۆی نەبونی هەم بودجە و هەم تاقیگەیەکی گەورەو باشەوە بوە.

وتیشی: بە هاوکاری ئەنجومەنی وەزیران بەتایبەت قوباد تاڵەبەنی جێگری سەرۆکی حکومەت فەرمانی پێدانی زەوی بۆ هەموو کەسوکاری ئەنفالکراوان دابین کراوە.

PUKmedia تایبەت