د. بەرهەم: سه‌ركه‌وتنمان بەسەر داعش سه‌ركه‌وتنی مرۆڤایه‌تییه‌

.

سه‌رۆك كۆمار د. به‌رهه‌م ساڵح ئه‌مڕۆ دووشه‌ممه ‌١٨|٢|٢٠١٩ له ‌كۆشكی سه‌لام له ‌به‌غدا پێشوازی له‌ جێگری سه‌رۆك وه‌زیران و وه‌زیری دارایی به‌لجیكا ئه‌لكسه‌نده‌ر دی كرۆ کرد و بانگهێشت نامەیەکی فەرمی وڵاته‌که‌شی پێشکه‌ش بە سه‌رۆک کۆمار کرد بۆ سه‌ردانی به‌لجیکاو یه‌کێتی ئه‌وروپا و هاوکات سه‌ردانه‌که‌شی به‌ گرنگ وه‌سفکرد .

له‌ میانی دیداره‌كه‌دا سه‌رۆك به‌رهه‌م ساڵح جه‌ختی له‌ پێویستی به ‌هێزكردنی په‌یوه‌ندییه‌ دووقۆڵییه‌كان و ئاستی هاریكاری نێوان عێراق و به‌لجیكا له‌ بواره‌كانی سیاسی و ئابووری و بازرگانی كرده‌وه‌ .

له‌ دیداره‌كه‌دا سه‌رۆك كۆمار ئاماژه‌ی به‌وه‌ كرد كه‌ سه‌ركه‌وتنی عێراق به ‌سه‌ر داعشدا سه‌ركه‌وتنی هه‌موو مرۆڤایه‌تییه‌ به‌سه‌ر به‌ره‌ی شه‌ڕ و تاریك په‌رستیدا، بۆیه‌ ئه‌م سه‌ركه‌وتنه‌‌ ده‌ستكه‌وته‌ بۆ گشت جیهان‌، ڕۆڵی هاوپه‌یمانی نێوده‌وڵه‌تیشی له‌ به‌شداریكردن له‌و جه‌نگه‌دا به‌رز نرخاند.

له‌ درێژه‌ی وته‌كانیدا سه‌رۆك به‌رهه‌م ساڵح ئاماژه‌ی كرد به‌ ‌پێویستی چڕكردنه‌وه‌ی هه‌وڵه‌كانی هه‌مووان بۆ خۆ ئاماده‌كردنی قۆناغی دوای داعش، هاوكات داوای له ‌كۆمه‌ڵگه‌ی نێوده‌وڵه‌تی كرد بۆ پشتیوانیكردنی عێراق له ‌دووباره‌ ئاوه‌دانكردنه‌وه‌ی ژێرخانی ئابووری و پێویستی پیاده‌كردنی به‌رنامه‌ و پلانی بوژاندنه‌وه‌ به‌ تایبه‌تی ناوچه‌ زیان لێكه‌وتووه‌كان به ‌هاوكاری نه‌ته‌وه‌ یه‌كگرتووه‌كان .

له‌لای خۆیه‌وه‌ جێگری سه‌رۆك وه‌زیرانی به‌لجیكا سه‌ركه‌وتنی عێراقی به‌سه‌ر ڕێكخراوه‌ تیرۆریستیه‌كان به‌رز نرخاند، هه‌روه‌ها جه‌ختی له‌ پشتیوانیكردنی عێراق كرده‌وه‌ له‌ گشت بواره‌كاندا.

PUKmedia راگەیاندنی سەرۆک کۆمار