قوباد تاڵه‌بانی: كاتی ئه‌وه‌ هاتووه‌ خوانی خۆمان بگه‌ڕێنینه‌وه‌ ده‌ست خۆمان

.

قوباد تاڵه‌بانی جه‌خت له‌ بوژاندنه‌وه‌ی كه‌رتی كشتوكاڵ ده‌كاته‌وه‌ و دووپاتیده‌كاته‌وه‌، ئه‌و ئابوورییانه‌ی ته‌نیا پشت به‌ نه‌وت ده‌به‌ستن به‌رگه‌ی قه‌یرانه‌كان ناگرن.
به‌ئاماده‌بوونی قوباد تاڵه‌بانی، جێگری سه‌رۆكی حكومه‌تی ھه‌رێم و كونسوڵی ھۆڵه‌ندا له‌ ھه‌ولێر، له‌ژێر ناونیشانی (له‌ كێڵگه‌وه‌ بۆ سه‌ر خوان)، دیداری ھه‌ماھه‌نگیی ھۆڵه‌ندا و ھه‌رێمی كوردستان سه‌باره‌ت به‌ كه‌رتی كشتوكاڵ و پیشه‌سازیی خۆراك به‌ڕێوه‌چوو و قوباد تاڵه‌بانی وتارێكی پێشكه‌شكرد.

قوباد تاڵه‌بانی له‌ده‌ستپێكی وتاره‌كه‌یدا گه‌ڕایه‌وه‌ بۆ مێژووی ناوچه‌ی كوردستان و رایگه‌یاند: حه‌وت ھه‌زار ساڵ به‌رله‌ئێستا له‌م وڵاته‌ی ئێمه‌دا، شۆڕشێك روویدا جیھان و شێوازی ژیانی مرۆڤی گۆڕی، ئه‌ویش ئه‌وه‌ بوو مرۆڤ فێری كشتوكاڵكردن بوو و دركی به‌وه‌كرد ناكرێت بۆ به‌رده‌وامیدان به‌ژیان پشت به‌ یه‌ك سه‌رچاوه‌ ببه‌سترێت.

دواتر راشیگه‌یاند: كه‌رتێكی به‌ھێزی كشتوكاڵ ته‌نھا خواردن ناخاته‌ سه‌ر سفره‌كانمان، به‌ڵكو پێداویستیی بازاڕ دابینده‌كات و كه‌رتی پیشه‌سازیی كوردستان به‌ھێز ده‌كات و ئابووریی كوردستانیش ھه‌مه‌جۆر ده‌كات و ده‌بێته‌ ھۆی ڕه‌خساندنی ھه‌زاره‌ھا ھه‌لی كاریش ده‌ڕه‌خسێنێت و زامنی پاراستنی ئاسایشی نیشتمانیشه‌، بۆیه‌ گرنگیدان به‌ كشتوكاڵ، گرنگیدانه‌ به‌ ئاسایشی نیشتمانی.

له‌ به‌شێكی تری وته‌كانیدا قوباد تاڵه‌بانی رایگه‌یاند: ئه‌و ئابووریانه‌ی ته‌نیا پشتیان به‌ سامانه‌ سروشتییه‌كان به‌ستووه‌، ئابوورییه‌كی نه‌خۆش و لاوازن و به‌رگه‌ی قه‌یرانه‌كان ناگرن و باشترین نموونه‌ش، ڤه‌نزوێلایه‌.

قوباد تاڵه‌بانی له‌ وتاره‌كه‌یدا جه‌ختی له‌وه‌كرده‌وه‌، پێویسته‌ كه‌رتی كشتوكاڵی ھه‌رێمی كوردستان ببوژێندرێته‌وه‌ ھه‌وڵی به‌ بازاڕكردنی به‌رھه‌مه‌ كشتوكاڵییه‌كانی جووتیاری كورد بدرێت. له‌وباره‌یه‌وه‌ رایگه‌یاند: كشتوكاڵ ھۆكاری به‌ھێزیی گه‌شه‌پێدانی ھه‌رێمی كوردستانه‌ و پێویسته‌ وه‌به‌رھێنان له‌ كشتوكاڵ بكرێت و رێگه‌ی گونجاو بۆ ھه‌نارده‌كردنی خۆراك بدۆزرێته‌وه‌. وتیشی: جووتیارانی ھه‌رێم ماندوو بوون و شایسته‌ داراییه‌كانیان وه‌رنه‌گرتووه‌، ئێستاش كاتی ئه‌وه‌ ھاتووه‌ خوانی خۆمان بگێڕینه‌وه‌ ده‌ستی خۆمان و چیتر نابێت بۆ داھاتی وڵات به‌ ته‌نھا پشت به‌ نه‌وت ببه‌سترێت و ده‌بێت  كشتوكاڵ بكرێته‌ جێگره‌وه‌ی نه‌وت.

ته‌واوی وتاری قوباد تاڵه‌بانی، جێگری سه‌رۆكی حكومه‌تی ھه‌رێم له‌ دیداری ھه‌ماھه‌نگیی ھۆڵه‌ندا و ھه‌رێمی كوردستان.

PUKmedia تایبه‌ت