بازنەی بڕیار

.

 بەپێچەوانەی زۆرێك لە تێڕوانینە باوە نالۆژیكی و نازانستیەكان سەبارەت بە چەمكی    ( سیاسەت ) و بەڕێوەبردنی كاروباری سیاسی هەر وڵاتێكی بچوك تا گەورەو زەبەلاح ( جوگرافیا، سیاسی، ئابووری، سەربازی، تەكنۆلۆژیا )، سیاسەت پشت دەبەستێت بە كۆمەڵێك چەمك و پرانسیپ و خوێندنەوەیەكی لۆژیكی و كۆمەڵە فاكتەرێكی گرنگ، كە دەبن بە پێكهێنەری  هاوكێشەی سیاسی و بەرێوەبردنی كاروبارە هەمە جۆرەكانی وڵات .

( بازنەی بڕیار ) یەكێكە لە كۆڵەگە هەرە گرنگ و سەرەكی و چارەنوسسازەكان بۆ رێكخستن و هاوسەنگكردنی هاوكێشەكانی بەرێوەبردنی سیاسەت و ئابووی هەر وڵاتێك لە ئاستی ناوخۆیی و دەرەوە.

 لەو سۆنگەیەوە، ئەو وڵاتانەی بەردەوام یان دوای شكست هەڵساونەتەوەو لەسەر پێی خۆیان وەستاون و گەشەیان بە ژێر خان و سەرخانی وڵاتەكانیان داوەو ساڵانەش كێرڤی گەشەكردنەكانیان رووەو هەوراز هەڵدەكشێ‌ و ململانێ‌ی دەكەن لەگەڵ پێشكەوتن و داهێنان، لە پێناوی دابینكردنی ژیانێكی هێمن و سەربەرزانە و خۆشگوزەرانی زیاتری هاوڵاتیانیان، ئەوانەن كە تا ڕادەیەكی زۆر سەقامگیریەكی سیاسی لە نێوان حزبە سیاسیەكانیاندا هەیە و دیموكراسی بۆتە پێڕەوی هەنگاوەكانی گەشەكردنیان. بۆ ئەم ئامانجەش ( بازنەی بڕیار ) دەبێتە پێویستیەكی حەتمی، ( بازنەیەكە كە هەموو دامەزراوە سەرەكی و جومگە گرنگەكانی دەزگا نیشتمانیەكان لە هەڕەمی دەسەڵاتدا بەشدار دەبن لە دارشتنی بڕیارە چارەنوسسازەكان ).

مێژوو ئەوەمان پێدەڵێ، هەر كاتێك لایەنە سیاسیەكانی باشوری كوردستان بە تایبەت ( ی.ن.ك ) و ( پ.د.ك )كۆك و تەباو یەك ریزو هاوڕا بووبن، سەركەوتن و ئارامی لە ئاسۆی هەرێمی كوردستان چاوی هەڵێناوە، بە پێچەوانەشەوە شەوی تاریك و نائومێدی و نەهامەتی و ناجێگیری سیاسی و كۆمەڵایەتی و دەروونی بوونەتە بەشی كۆمەڵانی خەڵك .

دوای ماوەیەكی درێژ لە خۆشاردنەوەو خەمساردی هەردوولا لە شۆڕكردنەوەی رێككەوتنامەی ستراتیژی نێوانیان ( بەهەر هۆكارێكەوە بێت )، جارێكیتریش دەركەوتەوە كە تەنیا ( رێككەوتن ) شارێگا راستەكەی گەیشتنە بە لوتكەی سەركەوتنە مەزنەكان.

لەسەر پێشنیاری ( ی.ن.ك ) و دواجار رەزامەندی ( پ.د.ك ) خەریكە گەڵاڵەی رێككەوتنێكی تر دروست دەبێت، ئەم هەنگاوە لانی كەم بۆمن وەك هاوڵاتیەكی ئەم هەرێمە دڵخۆشم دەكات، بۆیە بە مافی رەوای خۆمی دەزانم لێرەوە پێشنیارێك بكەم و داوا بكەم كە  ئەم رێككەوتنە تەنها لە هەڕەمی سەرەوە مەهێڵننەوەو لە ماوەیەكی دیاریكراودا بیهێنە خوارەوە با هاوڵاتیان هەست بە رۆحی رێككەوتنەكە بكەن و بەرهەمەكەی ببینن... هیوادارم لەم رێككەوتنە چاوەڕوانكراوەوە بەرهەم و هەنگاوی گەورەو كاریگەری ببیندرێن، رۆڵ و دەرفەتی تەواو بدرێت بە دەزگاو دامەزراوە شەرعیەكانی هەرێم تا بە ئەركە نیشتمانی و نەتەوەییەكانی خۆیان ڕابن. بەمەش راستەوخۆ ئایكۆنەكانی ( بازنەی بڕیار )ی سیاسی هەرێمی كوردستان كارا دەبن،  لە رێگای ئەم بازنەیەشەوە ژمارەیەك بڕیاری ووردو كاریگەر و تۆكمە بۆ ئایندەی ئەم خاك و گەلە ماندووە دەچنە سەر خەرمانی دەسكەوتەكانی قۆناغەكانی تەبایی. 

خدر مستەفا