مه‌ترسی كه‌وتنی تاوه‌رێكی كاره‌با پردێك داده‌خات

.

به‌هۆی هاتنی ئاوی زۆرو مه‌ترسی رووخانی تاوه‌رێكی كاره‌با پردی كه‌لار- خانه‌قین داده‌خات.

راگه‌یاندنی هاتوچۆی گه‌رمیان له‌وباره‌یه‌وه‌ رایگه‌یاندوه‌:"به‌یانی ئه‌مڕۆ به‌هۆی مه‌ترسی كه‌وتنی تاوه‌رێكی كاره‌باوه‌ پردی گرده‌گۆزینه‌ (پرده‌ كۆنه‌كه‌) ئاڕاسته‌ی (كه‌لار- خانه‌قین) به‌ ڕووی شۆفێراندا داخرا".

رونیشكراوه‌ته‌وه‌:"به‌هۆی باران بارینی زۆره‌وه‌ له‌ چه‌ند ڕۆژی ڕابردوودا و به‌ردانه‌وه‌ی ئاوی به‌نداوی ده‌ربه‌ندیخان و به‌رزبوونه‌وه‌ی ئاستی ئاو له‌ ڕووباری سیرواندا، یه‌كێك له‌و تاوه‌ره‌كانی كاره‌با كه‌ ده‌كه‌وێته‌ ناوه‌ڕاستی ڕووباره‌كه‌ مه‌ترسی كه‌وتنی له‌ سه‌ره‌".

ئاماژه‌ به‌وه‌شدراوه‌:" هه‌روه‌ها ئه‌گه‌ری كه‌وتنه‌كه‌شی به‌ ئاڕاسته‌ی پرده‌كه‌یه‌، به‌و هۆیه‌وه‌ و بۆ ئه‌وه‌ی مه‌ترسی بۆ سه‌ر ژیانی شۆفێران و به‌كارهێنه‌ران دروست نه‌بێت به‌ڕێوه‌به‌رایه‌تی هاتوچۆی گه‌رمیان ئه‌و ئاڕاسته‌یه‌ی داخست و به‌ هۆی مه‌فره‌زه‌كانی هاتوچۆوه‌ ڕێنمایی و هاوكاری شۆفێران ده‌كرێت كه‌ پرده‌ نوێیه‌كه‌ به‌ هه‌ردوو ئاڕاسته‌ی چوون و هاتن به‌كار بهێنرێت تاكو چاككردنه‌وه‌ی تاوه‌ره‌كه‌ له‌ لایه‌ن ده‌زگا په‌یوه‌ندی داره‌كانه‌وه‌".

جه‌ختیشكراوه‌ته‌وه‌:"بۆیه‌ به‌ڕێوه‌به‌رایه‌تی هاتوچۆی گه‌رمیان داوا له‌ شۆفێران ده‌كات كه‌ پابه‌ندی یاسا و ڕێنماییه‌كان بن و هاوكاری مه‌فره‌زه‌كانی هاتوچۆ بكه‌ن بۆ ئه‌وه‌ی پێكه‌وه‌ هاتوچۆیه‌كی سه‌لامه‌ت دابین بكه‌ن تاكو كردنه‌وه‌ی ئه‌و ئاڕاسته‌یه‌".

PUKmedia راگه‌یاندنی هاتوچۆی گه‌رمیان