سەرۆك كۆمار: خواستمان پەرەپێدانی پەیوەندی عیراق و فەرەنسایە

.

ئه‌مڕۆ هه‌ینی 8-2-2019 د. بەرهەم ساڵح سەرۆك كۆماری عیراق له ‌كۆشكی سەلام لە بەغدا پێشوازی له ‌وەزیری بەرگری فەرنسا فلۆره‌نس پارلی و وەفدی یاوەری كرد  و رایگەیاند، عیراق دەتوانێت ببێتە خاڵێكی پێكەوە بەستنەوەی زۆرێك له ‌وڵاتانی ناوچەكە و ئەوروپا.

لە دیدارێكدا سەرۆك بەرهەم ساڵح ئاماژەی بەوە كرد كه ‌عیراق خوازیاری بەرەوپێشبردن و فراوانكردنی ئاستی پەیوەندییەكانی نێوان عیراق و فەرەنسایە له ‌گشت بوارەكاندا، هاوكات وتی دەكرێت پێكەوە رۆڵێكی هاوبەش و كاریگەر ببینین لە سەر ئاستی ناوچەكە و جیهاندا.

هەر لە دیدارەكەدا سەرۆك كۆمار ئاماژەی بەوە كرد كە فروانكردنی پەیوەندییە هاوبەشەكانی عیراق و یەكێتی ئەوروپا یەكێكە لە خواستە گرنگەكان كە عیراق كاری بۆ دەكات، چونكە عیراق دەتوانێت ببێتە خاڵێكی پێكەوە بەستنەوەی زۆرێك له ‌وڵاتانی ناوچەكە و ئەوروپا.

 هەروەها بەرێزیان رۆڵی كاریگەری فەرەنسای له ‌هاوپەیمانی نێودەوڵەتی‌ دژ بە تیرۆر و پشتیوانیكردنی عیراقی لە شكست پێهێنانی تیرۆریستانی داعش بەرز نرخاند، هەروەها سوپاسی بەشداریكردنی فەرەنسا كرد له ‌پێشكەش كردنی كۆمەكی سەربازی و مەشق پێكردن بەهێزە ئەمنیەكانی عیراق.

لەلای خۆیەوەی وەزیری بەرگری فەرنسا جەختی له ‌پشتیوانی وڵاتەكەی بۆ سەرخستنی خواستی عیراق له ‌سەقامگیر و خۆشگوزەرانی كردەوە و ئامادەیی وڵاتەكەیشی پیشاندا بۆ مەشق و راهێنان بە هێزە ئەمنیەكانی عیراق و دابین كردنی پێویستییە سەربازیەكان.

PUKmedia نووسینگەی رۆژنامەوانی سەرۆك كۆمار