وه‌زاره‌تی ده‌ره‌وه‌ی ئه‌مریكا رایگه‌یاند: دوای كشانه‌وه‌ی ھێزه‌كانیان له‌ خاكی سوریا، نابێت ھه‌سه‌ده‌ بكرێته‌ ئامانجی ئۆپراسیۆنه‌ سه‌ربازییه‌كان.

رۆبه‌رت پالادینۆ، وته‌بێژی وه‌زاره‌تی ده‌ره‌وه‌ی ئه‌مریكا رایگه‌یاندووه‌: له‌دوای كشانه‌وه‌ی سوپای وڵاته‌كه‌یان له‌ خاكی سوریا، نابێت ھێزه‌كانی سوریای دیموكرات (ھه‌سه‌ده‌) بكرێنه‌ ئامانجی ئۆپراسیۆنه‌ سه‌ربازییه‌كان.

راشیگه‌یاندووه‌: له‌باره‌ی گره‌نتی پاراستنی سه‌ربازه‌ ئه‌مریكییه‌كان له‌كاتی كشانه‌وه‌و پاراستنی ئاسایشی ناوچه‌ ئازادكراوه‌كانی سوریا، له‌گه‌ڵ ھاوپه‌یمانه‌كانیان له‌ چه‌ندین ئاستی جیاوازدا گفتوگۆیان كردووه‌.

له‌ لێدوانه‌كه‌ی وته‌بێژی وه‌زاره‌تی ده‌ره‌وه‌ی ئه‌مریكا ئاماژه‌ به‌وه‌كراوه‌، پێكھاته‌ كوردییه‌كه‌ی ناو ھه‌سه‌ده‌ش كه‌ پێكھێنه‌ری سه‌ره‌كی ھێزه‌كه‌یه‌ نابێت ھیچ كرده‌وه‌یه‌كی سه‌ربازیی له‌دژ بگیرێته‌به‌ر.

ئه‌مه‌ش له‌كاتێكدایه‌، رۆژنامه‌ی وۆڵستریت جۆرناڵ له‌ راپۆرتێكیدا له‌ زاری چه‌ند سه‌رچاوه‌یه‌ك له‌ناو ئیداره‌ی ئه‌مریكاوه‌ له‌وباره‌یه‌وه‌ ئاشكرایكردووه‌، ئه‌گه‌ر كۆشكی سپی گۆڕانكاریی له‌ بڕیاری كشانه‌وه‌وی ھێزه‌كانی ئه‌مریكا له‌ سوریا نه‌كات، تا ناوه‌ڕاستی مانگی مارسی داھاتوو له‌50% ئه‌و ھێزانه‌ له‌ سوریا ده‌كشێنێته‌وه‌و تا كۆتایی مانگی نیسانیش سه‌رجه‌می ئه‌و ھێزانه‌ له‌و وڵاته‌ ده‌كشێنێته‌وه‌،پێشتریش كۆشكی سپی ئاماژه‌ی به‌وه‌كردبوو، واشنتۆن به‌ كرده‌وه‌ ھێزه‌كانی له‌ سوریا ده‌كشێنێته‌وه‌، له‌و سۆنگه‌یه‌وه‌ كه‌ ئه‌ركه‌كه‌ی له‌و وڵاته‌ كۆتایی ھاتووه‌ كه‌ ئه‌ویش شكستپێھێنانی تیرۆرستانی داعشه‌.

PUKmedia ئاژانسه‌كان