مەلا بەختیار:رێبازەكەی ئارام‌و هەموو شەهیدان بەرنادەین

مەلا بەختیار:رێبازەكەی ئارام‌و هەموو شەهیدان بەرنادەین


31/1/2019 21:01:00
چاپ کردن
بە وێنەوە    بە بێ وێنە
           
.

دەقی وتاری مەلا بەختیار، لێپرسراوی دەستەی كارگێڕی مەكتەبی سیاسی یەكێتی، لەرێورەسمی پەردەلادان لەسەر دیواربەندی شەهید ئارام، لەبازیان، لەسەر رێگەی دێلێژە، كە ئەمڕۆ (31/1/2019) بەڕێوەچوو..

لەیادی (41) ساڵەی شەهید ئارام-دا

مەلا بەختیار:
رێبازەكەی ئارام‌و هەموو شەهیدان بەرنادەین‌و
پێ‌ لەسەر بەستنی كۆنگرە دادەگرین

ئامادەبوانی بەڕێز..

لەیادی (41) ساڵەی شەهیدبوونی رابەرو هاوسەنگەرو رەچەشكێنی شۆڕشی نوێی گەلەكەمان، كاك ئارام، بەخێرهاتنتان دەكەین.

هەم بەناوی خانەوادەكەی، هەم بەناوی خۆم و كاك (سالار عەزیز)ی هاوسەنگەری‌و هەموو ئەو هاوسەنگەرانەی كە نەیانتوانی تەشەریف بهێننە ئێرە.. وامزانی ئێستا هەموو ئەندامانی مەكتەبی سیاسی‌و سەركردایەتی لێرە دەست لەسەر سنگ دەوەستن بۆ كاك ئارام..! بەڵام بەداخەوە بەدەگمەنیان هاتوون. هەر ئەوە خۆی دەلیلی ئەوەیە كە ناخی ئێمە، ئێستا چۆنەو ویژدانی ئەوكاتەشمان چۆن بووە..!

شەهید ئارام، گرنگییەكەی، هەڵكەوتووەكەی لەوەدا نەبووە، كە كەسێكی دوور بین‌و تێكۆشەرێكی چەپ، شۆڕشگێڕ، رابەری رۆژگارە هەرە سەخت‌و دژوارەكان بوو. تەنها هەر ئەمە نەبوو. چونكە ئەمە ئەركی هەموو شۆڕشگێڕێكە، كە لەرۆژگاری سەختدا چۆك دانەدا.. كاك ئارام گرنگییەكەی لەوەدابوو، ئومێد لەم كوردستانەدا نەمابوو، تەنانەت بەشێك لەسەركردایەتی یەكێتیش دوایئەوەی كە شۆڕشمان كرد‌و بەشێك لەسەركردایەتی كۆمەڵەش پێشئەوەی شۆڕش بكەین، باوەڕیان بەشۆڕش بەرپاكردن نەبوو. هەربۆیە لەنامیلكەی (یەكێتیی نیشتمانیی بۆچی؟) رەخنە لەچەندین رەوتی سیاسی دەگیرێت‌و یەكێك لەو رەوتانە كە رەخنەی لێگیراوە، ئەو رەوتانە یان ئەو سەركردانە بوون، كە پێیانوابوو لەژێر دروشمی (ئەوەی دەكرێ‌ رزگار بكرێ‌، با رزگاری بكەین‌و جارێكی تر توخنی شۆڕش كردن نەكەوین!)..

بڕۆن نامیلكەی (یەكێتیی نیشتمانیی بۆچی؟) بخوێننەوەو بزانن لەچەندین رەوت رەخنە گیراوە، كە یەكێك لەو رەوتانە سازشكارەكانی ئەوكاتە بوون، كە بەهیچ شێوەیەك باوەڕیان بە بەرپاكردنی شۆڕش نەبوو.. ئەمە جارێ‌ ئەوكاتەی كە سەرەتای دامەزراندنی یەكێتی بووە، كۆمەڵە بەر شاڵاوی گرتنیش نەكەوتبوو، هێشتا بیركردنەوە لەچۆنێتی بەرپاكردنی شۆڕش یان شۆڕش نەكردن، هەتا چۆنێتی دامەزراندنی یەكێتیی نیشتمانیی كوردستان ئەوكاتە، جۆرەها بیرۆكە لەئارادا بوو، كە سەرەنجامی گفتوگۆیەكی تێروتەسەل لەنێوان جەنابی مام جەلال‌و سەركردایەتی كۆمەڵە، یەكێتی لەم چوارچێوەیەدا ساغكرایەوە كە ناوی (یەكێتیی نیشتمانیی كوردستان) بێ‌‌و ناوە پێشنیازەكانی تری پێشئەوە، هەموویان لەلایەن سەركردایەتی كۆمەڵەوە رەتكرانەوە. كە ئەوە رۆژێك دێت وردو درشتی، هەموو ئەمانە باس دەكەین.

ئەوكاتە، تەنها یەك رەوت لەناو كوردایەتی هەبوو باوەڕی بە شۆڕش بوو، رەوتەكانی تر بیری جیاوازیان هەبوو، هەندێكیشیان لەگەڵ بەرپا بوونی شۆڕش نەبوون‌و هەندێكیشان دەیانوت: جارێ‌، كاتی بەرپا بوونی شۆڕش هەر نییە‌و باهەڵیبگرین بۆ هەلومەرجێكی تر، لەڕووی بابەتییەوە زەمینەی بەرپاكردنی شۆڕش بڕەخسێ‌، ئەوكاتە شۆڕش بەرپا دەكەین.

بەڵام، لەدەرەوەی وڵات جەنابی مام جەلال و لەناوەوەی وڵات كۆمیتەی هەرێمەكان، بڕوای نەگۆڕمان بە بەرپاكردنی شۆڕش هەبوو، پێمانوابوو هەتا زوو شۆڕش بكەین باشترە، بۆ ئەوەی رێگە لەپیلانەكانی شۆڤێنییەت‌و فاشییەتی عیراق بگرین.

كاك ئارام، تیۆرسینی یان بەرنامەرێژی ئەوەبوو، كە لەناو شۆڕش (ئەمە خاڵێكی گرنگ‌و ئێجگار گەشە لەبیركردنەوەی كاك ئارام) كە لەوكاتەدا لەناو كوردستان سەركردایەتی كۆمەڵە گیرابوو، هێشتا ئێمەو برایانی بزوتنەوەو شەهید عەلی عەسكەریی‌و شەهید دكتۆر خالید‌و شەهید سەعدی گچكەو شەهیدە قارەمانەكانی تری بزوتنەوەمان نەدیبوو، هێشتا رێكخستنەكانی كۆمەڵەمان بەتەواوەتی نەگرتبۆوە، هێشتا پەیوەندیمان بەدەرەوەی وڵات نەبوو، هێشتا یەك نامەی جەنابی مام جەلال، بەئێمەی كۆمیتەی هەرێمەكان نەگەیشتبوو، كاك ئارام وەكو كاك ئارام، لەناو كۆمیتەی هەرێمەكان، كۆمیتەی هەرێمەكانیش وەكو سەركردایەتی ئەوسای كۆمەڵە، خۆمان باوەڕمان بەوەبوو كە یەك رێگە لەبەردەم چارەنوسی كورددا ماوە، ئەویش دەبێ‌ شۆڕش بەرپا بكەین، پەیوەندی بەدەرەوە بكەین یان نەیكەین، ئێمە دەبێ‌ شۆڕش بەرپا بكەین. كەی دەرەوە هاتنەوە بەخێربێنەوە، ئەوە ئێمە لەشاخەكانین، پارتیزانین‌و ئەوكاتە هەوڵەكانی دەرەوەو ناوەوە، تێكەڵ دەكەین.. ئەمە قەناعەتی شەهید ئارام‌و كۆمیتەی هەرێمەكان بووە‌و لەسەر بنەمای ئەم بڕوایە، پێشئەوەی هیچ پەیوەندییەكمان بەجەنابی مام جەلال‌و هەندێك لەدەستەی دامەزرێنەرانیش بكەین، هەندێك، چونكە هەموو كەسێك لای ئێمە دەستەی دامەزرێنەر نەبوون ئەوكاتە، هەندێكیشان دەركەوتن چی بوون! كە یەكێك لەوانە شادرەوان كاك (نەوشیروان) بوو، دوایئەوەی هاتە دیمەشق.

پێشئەوەی ئەو پەیوەندییانەشیان پێوە بیكەین، بێگومان لەناو وڵات تەواوی ئامادەكارییەكانمان بۆ ئەوەبوو كە دەچینە دەرەوە، پارتیزانی دەستپێدەكەین‌و بەدڵنیاییەوە، ئەوەی لەدەرەوەی وڵاتیش دەكرێت، لەگەڵ ئەوەی ناوەوەی وڵات تێكەڵ دەكرێت‌و پێكەوە، هەوڵی دەرەوەو هەوڵی ناوەوە، بەیەكەوە دەتوانین كاری گەورە بكەین. بەڵام دەرەوە بەبێ‌ ناوەوە، مەحاڵە بتوانن هیچ بكەن.

ئێستا جارێ‌ نامەكانی جەنابی مام جەلال كە بۆ كۆمیتەی هەرێمەكانی نوسیوەو بەشی زۆری لەلای شەهید ئارام بوو، هێشتا ئەو نامانەمان نەدۆزیوەتەوە، هەتا ئەم قسانەی ئێستا دەیكەین، وەكو خۆی دەربكەوێ‌‌و خەڵك بچێتەوە بۆ ئەو زەمان‌و زەمینەیە، هەتا بزانن لەناو وڵات چۆنمان بیر لێكردۆتەوەو دەرەوەی وڵاتیش پشت ئەستور بەئێمە خۆیان چۆن ئامادە دەكرد، بێنەوە بۆ ناو وڵات.

بۆیە هیوادارم، بەهەموومان بەتایبەتی كەسوكاریان، نامە نهێنییەكانی ئەوكاتی جەنابی مام جەلال، كە بەناوی (جوتیار)ەوە بۆی دەناردین، هەموو ئەوانە بدۆزینەوەو بڵاویان بكەینەوە، بۆ ئەوەی هەقیقەتە مێژووییەكان وەكو خۆی بزانرێت. نەك وەكو ئەوەی بە مەرام لەلایەن هەندێك كەس نوسراوەو راستییە مێژوییەكانیان چەواشە كردووەو تەنانەت درۆیان گەیاندە رادەیەك، كە شەهید ئارام-یان بەعیراقی لەقەڵەمدا بەئێستاشەوە، لەكاتێكدا خۆیان ترسنۆكترین كەسەكانی ئەو سەردەمە بوون.! دیسانەوە دەیڵێم: ئەوانە ترسنۆكترین كەسەكانی ئەو سەردەمە بوون..! بەڵام ئێستا جادە پانە، هەڵپەهەڵپەیان بوو بچن ببن بەئەندام پەرلەمانی عیراق‌و بووشن، موچەی خانەنشینی عیراقیش وەردەگرن..! بەڵام درۆنامە دەنوسن‌و كاك ئارام‌و ئێمەو مانانیش بەعیراقی لەقەڵەم دەدەن.

شەهید ئارام ئەمە بوو.. كە بەپشتبەستن بەخۆی، لەسەر هاوڕێیانی كۆمەڵە، كە هێشتا پەیوەندیشمان بەدەرەوەی وڵات نەكردبوو، لەسەر هەموو ئەو پێشمەرگە قارەمان‌و فەرماندە قارەمانانەی كە ئامادەبوون، ئەوكاتە ببن بەپێشمەرگەی پارتیزانی، پشتمان بەهەموو ئەمانە بەست‌و بەكەمترین چەك خۆمان ئامادەكردبوو بچینە دەرەوە. ئەو هەلومەرجە نالەبارەی بەسەر كورد، ئینجا بەسەر یەكێتیی هاتبوو، ئەو هەلومەرجە قبوڵ نەكەین، كاك ئارام ئەمەبوو..!

دەی هەڤاڵان، دەی مێژوونوسان، قەڵەمتان بخەنە كارو ویژداتان مەسوتێنن.. ببینن ئەمە سەركردەی هەموو حزبەكانی رۆژهەڵاتی ناوەڕاست، ئەو حزبانەی حزبی گەورە بوون. ئەو سەركردانەی، سەركردەی حزبی گەورە بوون. ئەوانەی بە پشتیوانی سۆڤییەت‌و وڵاتانی عەرەبی، فەڵەستین‌و زۆرێك لەدەوڵەتانی دنیا حزب بوون، سەركردە بوون‌و پشتیوانی نێودەوڵەتیان هەبوو، بەراوردیان بكەن بە كۆمەڵە، بە یەكێتی، بە كۆمیتەی هەرێمەكان‌و ئارام، بێ‌ پشت، بێ‌ پەنا، رێكخراوێكی لێدراو و زیندان لێ‌ پڕكراو، سەركردەی شەهید كراو، بێ‌ چەك‌و بێ‌ پارە، بێ‌ توانای مادی، بەڵام كاك ئارام دێت‌و دەبێت بەڕابەری شۆڕشی نوێ لەناو وڵات. تەنها پشت ئەستور بە رەنج‌و فیداكاری خەڵك، بناغەی شۆڕشی نوێ‌ دادەنێین‌و دوایی لەدەرەوەی وڵات، قۆناغی یەكەمی مەفرەزەكانمان، شەهید ئیبراهیم عەزۆ و هەڤاڵەكانی دێن‌و بەداخێكی زۆرەوە، هەمویان دەكەن بەقوربانی شەڕێكی نەگریسی نەخوازراو، كە هیچ گوناهێكیان نەبوو، نە خۆیی‌و نە هەڤاڵەكانی. تەنها گوناهیان ئەوەبوو كە وتیان: ئێمە هەرەس قبوڵ ناكەین، چۆك دادان قبوڵ ناكەین‌و بە پارتیزانی شۆڕش دەكەینەوە! تەنها ئەمە گوناهیان بوو، بوون بە دەستەی سەرەتای لەناوچوون لەشەڕی ناوخۆدا.

ئێمەش لەناو وڵات، پێشئەوەی هەڤاڵان بتوانن هەندێك لەهێزەكان بهێنن، مەفرەزەمان لەناو وڵات لەقەندیلەوە هەتا گەرمیان، تا شارەزوور، هەتا شارباژێڕ، خۆشناوەتی، دەشتی هەولێرو دەشتی كۆیە، دەڤەری راپەڕین، ئاسۆس، سوركێو، شارباژێڕی سەخت‌و تەخت، لەهەموو ئەم ناوچانە مەفرەزەكانمان ناردە دەرەوەو دوایئەوە، بەماوەی چەند مانگێك، مەفرەزەكانی دەرەوەی وڵات، بە سەركردایەتی كاك نەوشیروان‌و شێخ حسێنی شەهید، كە ئەویش شەهیدی شەڕی ناوخۆ بوو، لەهاوینی ساڵی (1977)دا گەیشتنەوە كوردستان، ئێمەش لەكۆتایی مانگەكانی ساڵی (1976)دا مەفرەزەكانمان ناردە دەرەوە.

ئێستاش كە ئاوڕ لەو مێژووەو مێژووی چۆنێتی بەرپا بوونی شۆڕش‌و بەردەوامی شۆڕش دەدەینەوە، بێگومان شانازییەكی ئێجگار گەورەیە‌و نایشارینەوە، ئەگەرچی رەچە شكاندنەكەی ناو وڵات، ئازایەتییەكەی ئێجگار گەورەبوو، بەڵام ئەگەر كۆمەكی دەرەوەی وڵات‌و هاتنەوەی مام جەلال نەبوایە، قەدەری ئێمە، قەدەرێكی نادیار بوو. هیچ بەدووریشی مەزانن هەموومان لەو شاخانە شەهید ببوینایە‌و شۆڕشەكەش كۆتایی بهاتایە. بەڵام بەرپاكردن بۆ خۆی، بوێرییەكی مێژوویی گەورەیە.

بەهاتنەوەی جەنابی مام جەلالیش كە هەرگیز ناكرێ‌ نكوڵی لێ‌ بكرێ‌، كە یەكەمین كەسیش شەرەفی پێشوازی لێكردنی هەبوو، بەندە بوو. لەگوندی (ماسیرۆ)ی هەكاریی‌و لەسنوری برادۆست، لەرۆژی (20/7/1977)دا، جەنابی مام جەلال، خۆیی‌و گۆچانێك، گەیشتەوە كوردستان. سەیر بكەن، ئەم جوامێرییە گەورەیە، ئەم سەركردە كەم هاوتایە، بەخۆیی ‌و گۆچانێكەوە دێتەوە، بۆ ئەوەی رابەرایەتی شۆڕشی نوێ‌ بكات. ئەمەش بەدیوێكی تردا، كە دیوەكەی ناوەوەش كاك ئارام‌و هەموومانین‌و، بەدیوەكەی تریشدا هەموو ئەوانەی لەدەستەی دامەزرێنەر ئامادەبوون بێنەوەو بەتایبەتی مام جەلال كە دێتەوە، وەرچەرخانێكی گەورەی مێژوویی گەورە دروست دەبێت‌و هەردوو دیوە وەرچەرخێنەرەكەی مێژوو، كە لەدۆڵی گۆستێ‌ تێكەڵاو دەبین‌و سەركردایەتی ناوەوەی دادەمەزرێ‌، شەهید عەلی عەسكەری، شەهید دكتۆر خالید، شەهید سەعدی، شەهید رەوف بەگ، شەهید تاهیری عەلی والی‌و هەموو شەهیدەكانی تر، لەگەڵ كاك رەسوڵ مامەند یەكدەگرینەوە، ئەوە ئیتر لەهاوینی ساڵی (1977)ەوە، شۆڕشی نوێ‌، سەركردایەتی ناوەوەو دەرەوە، یەك سەركردایەتییەو بەرگەی هەموو ئەو بەدبەختیانەو هەموو ئەو كارەستانانە دەگیرێت، كە رووبەڕووی شۆڕشەكەمان دەبێتەوە.

بەداخەوە، كاك ئارام شەهید دەكرێت. شەهیدكردنیشی بەقەد ئەوەی خۆی پیاوێكی هەڵكەوتووی گەورە بوو، بەقەدەر ئەوەش شەهیدكردنی، زیانێكی ئێجگار زۆری هەم لەڕێڕەوی شۆڕشدا، هەم لە ئەخلاقی شۆڕشگێڕانەدا‌و هەمیش ئەو هاوكێشە سیاسیانەی لەدوای كاك ئارام، لەناوەوەو دەرەوەی یەكێتیی، كە ئێستاش دەبێ‌ مشتومڕی گەورەی لەسەر بكرێت، ئەو هاوكێشانەی بەوشێوەیە كەوتەوە، بەتایبەتی كە كۆمەڵە هەڵوەشێنرایەوە، دڵنیاتان دەكەم ئەگەر شەهید ئارام بمابایە، كۆمەڵە هەڵنەدەوەشایەوە‌و دڵنیاتریشتان دەكەمەوە، هەرگیزاو هەرگیز نە دەتوانرا كۆمەڵە هەڵبوەشێنرێتەوە.. ئەگەر كۆمەڵەش  هەڵنەوەشێنرایەتەوە، كۆمەڵێك لەكێشەكانی دوای هەڵوەشانەوەی كۆمەڵە، لەدوای راپەڕین‌و هەتا ئێستاش، كۆمەڵێ‌ لەو كێشە نەخوازراوانە رووبەڕوومان نەدەبۆوە، كە ئێستا روودەدەن. رەوتی مێژوویی، بەئاقارە مێژوییەكانی خۆیدا دەڕۆیشت‌و هەمووشمان، بەهەموو باڵەكانی ناو یەكێتیی، یەكێتیی نیشتمانیی كوردستانمان، بەرەو بەرەی نیشتمانیی كوردستان دەبرد.

چاوتان لێیە، سەركردەی هەڵكەوتوو كە شەهید دەبێ‌، جگە لەوەی كە كارەساتێكی گەورەی لەدەستدانی رابەرێك روودەدات، رووداوی نەخوازراو، سەپێنراو، گۆڕینی ئاراستەی مێژوو، دوور لەبیروباوەڕی چەپ ‌و چینایەتی، ئەمەش دێتە پێشەوە، كە ئەنجامەكەیمان بینی، جۆرەها جیابوونەوەو كێشەی جۆراوجۆری لێكەوتەوەو هەمووی بەزیانی شۆڕشی نوێ‌ ‌و یەكێتی كەوتەوە.

دڵنیام، رۆژێك دێت یەكێك لەكۆنگرەكانی یەكێتی، پێنج ساڵی دامەزراندنی كۆمەڵە، پێش دامەزراندنی یەكێتی، دەخرێتە سەر مێژووی پڕ لەسەروەری یەكێتیی نیشتمانیی كوردستان، دڵنیام وایلێدێت. چونكە نابێ‌، ئەو مێژووە، بەو هەموو جوانییە، بە دروشمی (كەم بژی‌و كەڵ بژی)یەكەی شەهید شیهاب، ئەنوەرو جەعفەرو بەئەشكەنجەدانی ئەو هەموو قارەمانە، بەوەی كۆمیتەی هەرێمەكان لێپرسراوێتی ئەم شۆڕشەی لەناو وڵات كەوتە سەرشان، ناكرێ‌ ئەمە جارێكی تر بیری لێ‌ نەكرێتەوەو ئەو مێژوو جوانە، نەخرێتە سەر مێژووی جوانی یەكێتی.

ئەوەی جێگەی داخە بۆ ئێمەو مانان، كاك ئارام خۆزگە قائید فرقەیەك، یان ئەفسەرێك، یان سەربازێكی خوێری فاشستەكانی عیراق لەشەڕدا شەهیدیان بكردایە..! بەڵام بە داخێكی زۆرەوە، كاك ئارام بەدەسەتی خائینە خۆفرشەكان شەهید كرا.. بەدەستی ئەو خائینە خۆفرۆشانە شەهید كرا، كە هەرگیز نەدەبوو عەفوو بكرێن‌و هەرگیز نەدەبوو لێبوردن بۆ ئەوانە دەربچێت. من لەگەڵ لێبوردنی گشتی بووم، ئێساش لەگەڵ ئەو لێبوردنەم كە بەرەی كوردستانی دەریكردووە، بەڵام هەرگیز (ئامر مەفرەزە خاسەكان) نەدەبوو لێبوردنی گشتی بیانگرێتەوە. چونكە گەورەترین خائین لەمێژووی نەتەوەی كورددا، ئامر مەفرەزە خاسەكان بوون، كە تەنها و تەنها بەرامبەر شۆڕشی پارتیزانی دروستكران، كە دەستیان بەخوێنی سەدان رۆڵەی قارەمانی یەكێتیی و شۆڕی نوێ‌ سوورە. هەرگیز نەدەبوو ئەوانە عەفوو بكرێن. كەچی بەداخەوە نەك هەر عەفوو كراون، بەڵكو هەندێكیان ناسنامەی شەهید لەگیرفانی كەسوكاریاندایەو خانەنشینی شەهیدیشیان بۆ كراوە. ئەمە پەڵەیەكی رەش‌و بەشبەحاڵی خۆم هەتا دەمرم، ئەمە ئازارم دەدات..

دیسانەوە دەیڵێم: تەنها ئامر مەفرەزە خاسەكان، ئەوانەی تەنها بۆ دژایەتی پارتیزانەكان دروستكران، ئەوانە نەدەبوو عەفوو بكرێن. ئەگەرنا باقیەكەی بەشی زۆریان كە چوونە پاڵ حكومەت، خۆمان رەزامەندیمان دەدانێ‌ لەشەڕی عیراق ئێراندا، بچنە پاڵ حكومەت.

بەشبەحاڵی خۆم، دەمێكە باوەڕم بەشەڕی ناوخۆ نییە‌و ئێستاش باوەڕم بەقوڵكردنی كێشە ناوخۆییەكان نییە، بەڵام شانازی بەوەوە دەكەم، كە بەدەستی پێشمەرگەكانی یەكێتی، بكوژەكانی شەهید ئارام كوژراونەتەوە. هەروەكو چۆن بكوژی شەهیدەكانی تریشمان لەو مەفرەزە خاسانە، بەدەستی پێشمەرگە كوژراونەتەوە. چەندم پێخۆشە پارتی (سالە خەیاتی) خائینی كوشتووە، ئەوەندەشم پێخۆشە كە پێشمەرگەكانی یەكێتی، بكوژەكانی شەهید ئارامیان كوشتۆتەوە‌و هەردووكیان وەكو یەك دێتە بەرچاوم. چونكە سالە خەیات‌و بكوژەكانی شەهید ئارام، لەخوێڕیی‌و خائینەكانی مەفرەزە خاسەكان بوون.

ئامادەبوان، كۆتایی قسەكانم بەوە دەهێنمەوە، ئایا شەهیدەكانی ئێمە، كە (28) شەهیدی سەركردەمان هەیەو هەرە دیارەكانیان، شەهیدان شیهاب، جەعفەر، ئەنوەر، ئارام، عەلی عەسكەری، دكتۆر خالید، رەسول مامەندەو هەموو ئەم كەڵە پیاوانە شەهید بون‌و ئێستاش حكومەتمان هەیە، پەرلەمانمان هەیە، حزبە سیاسیەكان هەین، قسە ئەوەیە ئایا توانیومانە دوا ئاواتی شەهیدەكانمان بەدیبهێنین؟! توانیومانە لەهەندێجاردا تەنانەت پابەندی ئەخلاقی شەهیدەكانیشمان بین؟! بێگومان بەداخەوە نەخێر.. ئەگەر توانیبێتمان ئەو زیندووێتییەی گیانی شەهیدەكانمان لەكردارەكانماندا، لەسیاسەتەكانماندا، لەهەڵوێستەكانماندا بەرجەستە بكەین، ئەی بۆ (213)هەزار كەس لەنێوان دوو هەڵبژارنی (2014-2018)دا دەنگ بە یەكێتیی نیشتمانی نادەن؟! بۆ؟ بۆ ئەو هەموو رەخنەیە لەسەر یەكێتی هەیە؟ بۆ ئەو هەموو جیابونەوەیە دەبێ‌؟ بۆ ئەو هەموو رۆژنامەو تەلەفزیۆنە ئەهلیانە شەو و رۆژ لەسەر گەندەڵییەكانی ئەم حكومەتەو حكومەتی پێشوو، لەسەر رەفتارو كردارو هەڵسوكەوتی نابەجێی حزبەكان، دروست دەبن‌و بە بەردەوامی رەخنە دەگرن‌و دەمانكوتن؟ تەنانەت هەندێكجار دەیگەیەننە ئیهانەكردنیش! بەڵام هەتا ئێستا هیچ كەسێ‌ لەو سەركردانە لەناو حزبەكان‌و لەناو حكومەت، تەنانەت ناتوانین بیاندەینە دادگاش؟ بۆ؟ لەبەرئەوەی هەندێك لەرەفتارو كردارەكان، بەشێوەیەك قێزەونە لەناو خەڵكدا، سەرەنجامی ئەو رەفتارو كردارانە، دژەكانمان، رەخنەكان‌و ناڕەزایەتییەكان بەرامبەرمان، هەموویان رەوایەتیان داوە بەخۆیان دژایەتیمان بكەن‌و ئەوانەشی لەناو هەموو حزبەكاندا رەفتاریشیان باش نییە، بەیەكێتیشەوە، ناتوانن بەرپەرچیان بدەنەوە‌و سزاشیان بدەن، ئەمەش مایەی نیگەرانییەكی گەورەیە بۆ چارەنوسمان. بۆیە تەنها یەك رێگە لەبەردەمماندا ماوە كە بتوانین لەبەردەم كۆمەڵانی خەڵكدا رەخنە لەخۆمان بگرین‌و كردارو رەفتاری خۆمان راست بكەینەوە‌و خاوەن پەیامی، پەیامە مێژووییەكەی یەكێتی و شەهید ئارام و تەواوی شەهیدان بین لەپەرلەمان، لەحكومەت، لەبەغدادو لەهەولێرو هەر جێگەیەكی تر، بۆ ئەوەی متمانە بۆ یەكێتی بگێڕینەوە‌و یەكێتی بكەین بەو یەكێتییەی لەناو هاوكێشەكانی كوردستان، هاوسەنگی‌و مافەكان بەدیبهێنێت‌و نەهێڵین بەهیچ شێوەیەك نە لەعیراق، نە لەناوچە كێشە لەسەرەكان‌و نە لەكوردستان، مافەكانی گەلەكەمان، مافەكانی دەستوریمان‌و مافەكانی یەكێتیش بخورێت، تەنها بە بەستن كۆنگرەی گۆڕانكارییە.

ئامادەبوان دڵنیاتان دەكەمەوە، یەكێتی كۆنگرەی گۆڕانكاری نەبەستێ‌، كۆنگرەی رەخنە لەسیاسەتی خراپ، كۆنگرەی رەخنە لەرەفتاری خراپ، كۆنگرەی نوێكردنەوەی یەكێتی، ئەوا یەكێتی لەساڵانی ئاییندە دۆخێكی خراپتری بەسەر دێت. بۆیە هەڤاڵان هەمووتان لێپرسراوێتیتانە، لێپرسراوێتی هەموو كەسوكاری شەهیدانمانە، لێپرسراوێتی پێشمەرگە دێرینەكانمان، لێپرسراوێتی پێشمەركە كەمئەندامەكان، لێپرسراوێتی زیندانییە سیاسییەكانمان، لێپرسراوێتی نەوەی نوێمان‌و لێپرسراوێتیمانە یەكێتی لەقۆناغی ئێستا و رابردوو دەرباز بكەین‌و بەكۆنگرەی رەخنە لەخۆگرتن‌و چارەسەركردنی كێشەكانی، چارەسەكردنی راستەقینە، نەك چارەسەركردنی پینەوپەڕۆ، نەك چارەسەركردنی تەوافوقێكی ناڕاست‌و نادروست، بەڵكو بەچارەسەركردنێكی راستەقینە كە لەناو كۆنگرە، بتوانین سەراپای یەكێتی بەرەو گۆڕانكاری ببەین‌و رەخنە لەخۆمان بگرین لەسەر كەموكوڕییەكانمان‌و متمانە بگێڕینەوە، ئەگەرنا بەبێ‌ ئەمە یەكێتی بەپینەوپەڕۆ هەڵناسێتەوە..!

پڕ بەدڵ ئومێدەوارین، بەم پەردە لادانە لەسەر دیواربەندی شاسوار، ئارامی هەموومان، خۆزگە ئەو شیعرەش وابوایە، كە هەڤاڵ كوێستانی دەڵێت: هەر دەوەن‌و بن تاشە بەردی چیایە، سەنگەرێكەو قۆتابخانەی دروستبوونی ئارامێكی تری تیایە..! خۆزگە لایەنیكەمی ئەو رۆمانسییەتە شۆڕشگێڕییەی هەڤاڵ كوێستانی كە لەگەڵ خۆمبوو، لەسەر گۆڕی كاك ئارام ئەو شیعرەی نوسی، خۆزگە نیوە یان چارەكێكی ئەوە راستبوایە..! بەداخەوە، ئیستا لەبری هەر دەوەن‌و بن تاشەبەردی چیایەك، كۆشك‌و تەلار بەرزبۆتەوە، باخی جۆراوجۆر ئاوەدانكراوەتەوە، كۆمپانیای جۆراوجۆر بەئاشكراو نهێنی دروستكراوە، بەداخەوە..

ئائەمەیە وا لەخەڵكی دەكات رەخنەی لەحكومەت هەبێ‌، رەخنەی لەرەفتارو رەخنەی لەسیاسەتەكانمان هەبێ‌.. لەگەڵ ئەوەشدا رۆحی كاك ئارام هەر ئەو رۆحەیە، كە هەموومانی كردووە بەو تێكۆشەرەی ئێستا بەدڵسۆزی لێرە‌و لەبەردەم دیواربەندی پڕ شكۆیدا وەستاوین‌و وەستانەكەش بەوە تەواو دەبێت، كەپەیمان تازە بكەینەوە، بڵێین: رێبازەكەی ئارام‌و رێبازەكەی هەموو شەهیدان بەرنادەین‌و پێ‌ لەسەر بەستنی كۆنگرە دادەگرین‌و تەنها و تەنهاش هەر بەوە راست دەكەن. ئەگەرنا هاتن‌و قسەكردن‌و شیعر وتن‌و شانامە خوێندنەوە ئاسانە! بەڵام پابەندبوون بە پەیامی شەهید قورسەو ئەوەش ئەركتانە، ئەركی هەموو شۆڕشگێڕێك‌و دڵسۆزێكی یەكێتیی نیشتمانیی كوردستانە.

سوپاس بۆ كاكە زاهیر صدیق، كە بە بیرۆكەی خۆی، ئەركی دروستكردنی ئەم دیواربەندەی لەئەستۆ گرت‌و سوپاس بۆ كاكە شێخ فەتاح، كە هەموو ساڵێك لەم بۆنانەدا، وەفای زۆر دەنوێنێ‌‌و سوپاس بۆ كاكە رێباز‌و كۆمیتەی بازیان، هەموو كەرتەكان‌و كۆمیتەكانی دەوروبەر، كە ئەركیان كێشا ئەمڕۆ و سوپاس بۆ ئەو قارەمانانەی كە ئەمڕۆ هاتون و هەموو ئەوانەی لەگەڵ كاك ئارام بوون.

كاك رەزا، كە دەستیمگرت‌و هێنام پێكەوە لەگەڵ كاك سالار عەزیز پەردەكەمان لادا، یەكێكە لە پێشمەرگە هەرە دڵسۆزەكانی كاك ئارام، كە شەو و رۆژ لەخزمەتیدا بووە. سوپاس بۆ رەزاو خەڵكی تەنگیسەر، بۆ ئێوەو مانانیش هەڤاڵان لەهەر كوێیەكەوە هاتون بۆ ئێرەو بەخێربێن، لایەنیكەمی قەرزی خۆتان بەرامبەر بەشەهید ئارام‌و رێبازی شەهید ئارام دایەوەو زۆر سوپاس.

وێنە هەواڵ
  • image04
  • رۆژی شەهیدی یەكێتی

  • image04
  • كرێكارێك له‌كاتی كڕینی كتێب له‌ پێشانگای نێوده‌وڵَه‌تی كتێب له‌ سلێمانی

  • image04
  • كۆنفرانسی كۆمیته‌كانی چه‌مچه‌ماڵ

  • image04
  • كۆنفراسی كۆمیته‌كان.. ده‌نگده‌ران ئازادانه‌ ده‌نگی خۆیان ده‌ده‌ن

  • image04
  • پیرۆزبێت یادی 235 ساڵه‌ی دامه‌زراندنی سلێمانی

  • image04
  • .

  • image04
  • جوتیاره‌ نموونه‌ییه‌كه‌ی هه‌ڵه‌بجه‌ به‌رهه‌مه‌كانی ده‌باته‌ هه‌ولێر

  • image04
  • یادی له‌دایكبوونی پێغه‌مبه‌ر(د.خ) له‌هه‌ولێر


                                           

فینلاند.. كۆبوونەوەی هێز و حزبە كوردستانیەكان بەڕێوەدەچێت


رۆژی چوارشەمە 20-11-2019 لەشاری هێلسنكی پایتەختی فینلاند، و بە ئامادەبوونی نوێنەری زۆربەی هێز و حزبە كوردستانیەكان لە نێویاندا جەبار جومعە لێپرسراوی كۆمیتەی رێكخستنی یەكێتی نیشتیمانی كورد...


  پاریس.. نوێنه‌ری یه‌كێتی له‌گه‌ڵ باڵیۆزی عیراق كۆده‌بێته‌وه‌
  كۆمیتەی فەرەنسا كۆدەبێتەوە
                                           

لاهور شێخ جه‌نگی: بۆ كۆنگره‌ له‌گه‌ڵ لێكتێگه‌یشتندام


لاهور شێخ جه‌نگی له‌چاوپێكه‌وتنێكدا بۆ ئاژانس رایگه‌یاندوه‌، بۆ كۆنگره‌ دژی ته‌وافوقم، به‌ڵام له‌گه‌ڵ لێكتێگه‌یشتندام
 
لاهور ش...


  عومەر شێخ موس: سەركردایەتیی كورد لەسیاسەت تێ نەگەیشتووە
  حاجی مەسیفی: بۆ دانانی پارێزگاری كەركوك چیتر سەبرمان نەماوە
                                           

سلێمانی كوانوی داهێنان و نوێگەری

لە هەوڵە بەردەوامەكانی سەرۆكایەتی زانكۆی سلێمانی بۆزیاتر پتەوكردنی پردی پەیوەندی ڕایەڵەی نێوان كۆمەڵگاو زانكۆ، چالاكی وكۆنفرانس و كۆنگرەكانی زانكۆی سلێم...


  پزیشكێك: پیشەكەمان پێش ئەوەی بازرگانی بێت مرۆڤایەتییە
  101 ساڵ بەسەر راگرتنی جەنگی جیهانی یەكەم تێدەپەڕێت


کاریکاتێر