لاهور شێخ جەنگی: دۆخێكی دیكە لەكەركوك دێتە ئاراوە

.

لاهور شێخ جەنگی رایدەگەیەنێت كەمتر لەشەش مانگی تر دۆخێكی دیكە لەكەركوك دێتە ئاراوە و دەشڵێت: بەكۆدەنگی لایەنەكان پارێزگارێكی نوێ بۆ كەركوك دادەنێین .

لاهور شێخ جەنگی بەرپرسی ئاژانسی پاراستن و زانیاریی/زانیاری هەرێم بۆ كەناڵی كەركوك ئاشكرایكرد: ئێستا ئەوەی لە بەردەم ئێمەیە گەڕانەوەیە بۆ دەستوری عیراق و جێبەجێكردنی ماددەی 140،  بۆیە پێویستە كورد بەكۆدەنگی لەحكومەتی نوێی عیراقدا بە یەك پاكێج شەڕی دەستوور بۆ كەركوك و ناوچە دابڕێندراوەكان و ماددەی 140 بكات. 

وتیشی: هۆكاری مانەوەی یەكێتی لەكەركوك ئەوەیە كە تۆ لەگەڵ ئازارو ئەشكەنجەی كەركوكییەكان گەورە بیت، رێبازی یەكێتیی لە كەركوك لە خوێنماندا چەسپاوە بۆیە ناكرێ لەكاتی خۆشیدا ئەوكاتەی كە كەركوك نەوتی هەبێت و نەوتەكەی دەبرێت لە كەركوك بین دواتر كە ناخۆشی بەسەر كەركوكدا دێت بەجێیبهێڵین و بڵێین وەڵا كەركوك وای بەسەردا هاتووە .

سەبارەت بەوەی دۆخی كەركوك بەرەو كوێ دەڕوات لاهور شێخ جەنگی دەڵێت: ئەم حاڵەتەی ئێستا لە كەركوك هەیە من دڵنیایان دەكەمەوە لەماوەی كەمتر لەشەش مانگ دۆخێكی دیكە لە كەركوك دێتە ئاراوە.

ئاماژەی بەوەشكردوە: هیچ كەسێك ناتوانی خۆی بسەپێنێت بەسەر كەركوكدا، چونكە واقعێك هەیە لە كەركوك كورد زۆرینە بۆیە ناكرێت داواكارییەكانی كورد پشتگوێ بخرێت لەوشارە یان زوڵم و زۆریان لێبكرێت، بۆیە داواكارم لە خەڵكی كەركوك كەخەڵكێكی بەتەحامول و بەسەبرن كە چەندین  ساڵ تەحامولی زەبرو  زۆری رژێمی بەعسیان كردووە ئەم چەند مانگەیش بە تەحەمول بن و دڵنیایش بن كە یەكێتیی نیشتیمانی كوردستان قەت قەت دەست لە كەركوك و كەركوكییەكان هەڵناگرێت.

جەختیشكردەوە: دانانی پارێزگارێكی كورد بۆ كەركوك نیوەی دۆخەكە ئاسایی دەكاتەوەو ئەگەر لایەنە كوردییەكان رێكبكەون لەسەر ئەوەی ئەنجومەنی پارێزگاری كەركوك كارابكرێتەوە، ئێمە دەتوانین سبەینێ كۆبوونەوە بكەین و پارێزگارێكی كورد بۆ كەركوك دابنێن لەو كاتەدا دۆسییەی ئەمنی دەگەڕێتەوە بۆ پارێزگارو ئەو بڕیاردەدات چی هێزێك لە ناوشارەكە بمێنێتەوە.

PUKmedia