سه‌رۆك كۆمار و جه‌واد زه‌ریف كۆبونه‌وه‌

.

سه‌رۆك كۆمار د. به‌رهه‌م ساڵح، ئه‌مڕۆ دووشه‌‌ممه‌ 14-1-2019 له‌ كۆشكی سه‌لام له‌به‌غدا پێشوازی له‌ وه‌زیری ده‌ره‌وه‌ی ئێران جه‌واد زه‌ریف و شاندی یاوه‌ری كرد.

له میانه‌ی دیداره‌كه‌دا سه‌رۆك به‌رهه‌م ساڵح جه‌ختی له‌ به‌هێزكردنی په‌یوه‌ندییه‌ دووقۆڵیه‌كانی عێراق و ئێران كرده‌وه ‌و  به‌ پێویستی زانی نه‌ك ته‌نها بۆ به‌رژه‌وه‌ندی هه‌ر دوو گه‌ل، به‌ڵكو بۆ ئاسایش و ئارامی ناوچه‌كه‌ به‌گشتی په‌ره‌ به‌و په‌یوه‌ندیانه‌ بدرێت‌، هه‌روه‌ك ئه‌وه‌شی خسته‌روو كه‌ عێراق و ئێران سه‌نگ وكاریگه‌ری گه‌وره‌یان له‌ناوچه‌كه‌دا هه‌یه‌.

سه‌رۆك به‌رهه‌م ساڵح ، ڕوونیشیكرده‌وه‌ ‌كێشه ‌و ناكۆكییه‌كان پێویستیان به‌ چاره‌سه‌ركردن و گرتنه‌به‌ری ڕێگه‌چاره‌ی ئاشتیانه‌ هه‌یه‌ بۆ ئه‌وه‌ی سیستمێكی ئه‌منی ئه‌وتۆ بێته‌ كایه‌وه‌ كه‌ گه‌لانی ئه‌م ناوچه‌یه‌ بتوانن به‌ ئارامی و خۆشگوزه‌رانی بژین و بواری ئابووری و بازرگانی ببوژێته‌وه‌و خه‌ڵكیش لێی سودمه‌ند ببێت.

هه‌ر له‌و‌دیداره‌‌دا سه‌باره‌ت به‌رووداوه‌كانی ناوچه‌كه‌ و دوا پێشهات و گۆڕانكارییه‌كان و هه‌لومه‌رجی سیاسی بیروڕا ئاڵوگۆڕ كرا.

له‌لای خۆیه‌وه‌ وه‌زیری ده‌ره‌وه‌ی ئێران خواستی وڵاته‌كه‌ی بۆ هه‌ماهه‌نگی و هاوكاری زیاتر له‌گه‌ڵ عێراق نیشاندا و ‌ هه‌ڵوێستی وڵاته‌كه‌شی بۆ پشتیوانی حكومه‌ت و گه‌لی عێراق له‌ گشت بواره‌كاندا دووپات كرده‌وه‌.

PUKmedia راگه‌یاندنی سه‌رۆك كۆمار