یەكێتی و پارتی وادەیەك بۆ پێكهێنانی حكومەت دیاریدەكەن

.

هەردوو مەكتەبی سیاسی یەكێتیی نیشتمانیی كوردستان و پارتی دیموكراتی كوردستان كۆبوونەوە جەخت لەتەبایی نێوان هەردوو حزب كرایەوەو وادەیەكیش بۆ پێكهێنانی حكومەت دیاریكرا.

لەكۆنگرەیەكی رۆژنامەوانی هاوبەشدا، سەعدی پیرە وتەبێژی مەكتەبی سیاسی یەكێتیی نیشتمانیی كوردستان و مەحمود محەمەد وتەبێژی پارتی دیموكراتی كوردستان باسیان لەئەنجامی كۆبوونەوەكە كرد.

لەسەرەتادا سەعدی پیرە رایگەیاند: لەكۆبوونەوەكەدا گفتوگۆ لەبارەی ئەو كێشەو گیروگرفتانە كراوە كە  لەنێوان هەردوولادا هەیە، هەروەها باس لەوەشكرا كە بانگهێشتی لایەنەكانی دیكە بكرێت كە دەیانەوێت بەشداری لەحكومەتدا بكەن.

وتیشی: وەك یەكێتی و پارتی كاری سەرەكیمان ئەوەیە لەدوای كاڵبوونەوەی رێككەوتنی ستراتیژی بەرنامەیەكی سیاسی و كاری هاوبەش بۆ ئیدارەدانی پێشهات و كێشەكان دابنێین، هەروەها ئەو دەستەیەی بۆ پیكهێنانی حكومەت لەنێوان هەردوولا هەیە چالاكتر دەبێت و دەستەیەكی شارەزاش بۆ بەرنامەی كاری سیاسی و هاوبەش دادەنرێت كە تایبەت دەبێت بەسەرجەم بوارە سیاسی و ئابوری و ئیدارییەكان.

ئەوەش وت: بابەتی پێكهێنانی حكومەتی نوێی هەرێم، هەروەها هاوهەڵوێستی یەكێتی و پارتی لەسەر پرسی كەركوك، كە بارودۆخی ئێستای شارەكە، بارودۆخێكی نەخوازراوەو رەنگە زیاتر درێژە بكێشێت زیانمان پێبگەیەنێت، بۆیە ناكرێت دوابخرێت و لەبەرنامەی كارەكانماندا نەبێت.

وتیشی: بابەتی كەركوك پەیوەندی بەبەغداوە هەیەو پێویستە ئاسایی بكرێتەوە، چونكە دەبێت رێككەوتن لەگەڵ عیراق بكرێت و شارەكە لەهێز خاڵی بكرێتەوە، بۆیە دەبێت بە بەرنامەیەكی هاوبەش روبەڕووی ئەو كۆسپ و تەگەرانە ببینەوە.

وتەبێژی مەكتەبی سیاسی یەكێتی راشیگەیاند: ریككەوتنی نێوان یەكێتی و پارتی نەك بەتەنها لەبەرژەوەندی هەرێمی كوردستان دەبێت، بەڵكو بۆ ئایندەی عیراقیش هەنگاوێكی باش دەبێت، هەروەها دیدی یەكێتی و پارتیش لەسەر پێكهێنانی حكومەت دوور نیە.

لەبارەی دۆخی كەركوك و گەڕانەوەی پێشمەرگەش بۆ ناوچە جێناكۆكەكانیش، رایگەیاند: دەبێت لەگەڵ بەغدا گفتوگۆ بكرێت بۆ گەڕانەوەی پێشمەرگە بۆ ئەو ناوچانەی لێی بووە، چونكە بەتەنها كەركوك نیە، بەڵكو لەناوچە جێناكۆكەكانی دیكەشە، هەروەها دەبێت هەماهەنگی لەنێوان هێزی پێشمەرگەو سوپای عیراق و هێزە ئەمنییەكانی دیكەدا هەبێت.

رونیشیكردەوە: ئاساییكردنەوەی پەیوەندی نێوان هەرێم و بەغداو ناوچە كێشە لەسەرەكان، بەلابردنی بارەگانی هێزە ئەمنیەكان عیراق و پێشمەرگە لەناو شارەكان و جێهێشتنی بۆ هێزەكانی پۆلیس و ئاسایش تەواوەو ئەوە بەشێكە لەچارەسەری كێشەكە.

 هەروەها مەحمود محەمەد وتەبێژی پارتی دیموكراتی كوردستانیش رایگەیاند:كۆبوونەوەكانی پێكهێنانی حكومەتی خێراتر دەكرێت تا بەزووترین كات حكومەت پێكبهێنرێت و كاتی دیاریكراوی بۆ دابنرێت.

ئەوەش وت: لیژنەیەكی هاوبەش لەنێوان هەردوولا پێكهێنراوە بۆ تێگەیشتنی زیاتر لەنێوان یەكێتی و پارتی  تا چوارچێوەی رێككەوتنێك دابنێن بۆ ئەوەی لەمەودوا چۆن حكومڕانی هەرێم بكەن لەگەڵ لایەنەكانی دیكە.

راشیگەیاند: لەنزینكترین كاتدا كۆبوونەوەی لیژنەكان دەستپێدەكات و كۆبوونەوەكانی نێوان هەردوو مەكتەبی سیاسیش بەردەوامدەبێت، لەكۆبوونەوەكەی ئەمڕۆشدا هیچ پرۆژەیەك گفتوگۆی لەسەر نەكراوە، بەڵكو ئەو بابەتە بۆ كۆبوونەوەكانی داهاتوو دەبێت. 

باسی لەوەشكرد: بۆ پێكهێنانی حكومەت دەبێت لەگەڵ ئەو لایەنانەی پێمانباشە لەناو كابینەی نوێدا بەشداری بكەن لێكتێگەیشتن هەبێت.

وتەبێژی پارتی راشیگەیاند: رێككەوتنی ستراتیژی، رێككەوتنێكی باش بوو، زۆر پێویست بوو، رۆڵی هەبوو بۆ رێكخستنەوەی نێوماڵی كورد، ئێستاش قۆناغێكی دیكەیەو  پێویستی بەڕێككەوتنی نوێ هەیە، بۆیە بەپێی پێویستی ئێستا رێككەوتن دەكەین.

لەبارەی كەركوكیشەوە، وتی: بارودۆخی كەركوك و ناوچە جێناكۆكەكان ئاسایی بكرێتەوەو لەگەڵ عیراق بەپاكێجێك لەسەر كەركوك بگەینە ئەنجام 

PUKmedia تایبەت