كه‌ى ده‌ست پێ بكه‌ین؟

.

كه‌ى ده‌ست پێ بكه‌ین؟

ـ ئێستا ده‌ست پێ بكه‌ین؟
× نا.. باچاوى بچێته‌خه‌و ئه‌وسا.
(گفتوگۆى نێوان درێل و چه‌كوشێكى ماڵه‌ دراوسێ)
*****
ـ حدوده‌كانى لێ داخه‌ین؟
× نا جارێ.. با به‌ته‌واوى بكه‌وێته‌ ته‌ڵه‌كه‌وه‌ ئینجا.
(ته‌گبیرى قارداشێك و ئاغایه‌ك)
*****
ـ قوربان ئێستا وه‌ختێتى با بكوژێینه‌وه‌.
× نه‌كه‌ى.. كه‌ چووه‌ ئاوده‌ست خۆشه‌.
( موناقه‌شه‌ى نێوان موه‌لیده‌ى گه‌ڕه‌ك و كاره‌باى حكومه‌ت)
*****
ـ داواى برنج و شله‌یه‌كى ساده‌ى كردووه‌.. بۆى به‌رم؟
× نا.. جارێ بزانه‌ پاره‌ى پێیه‌ ئه‌وسا.
(حانه‌حه‌په‌شێى به‌ینى وه‌ستا و شاگردێك)
*****
ـ سبه‌ى كۆبوونه‌وه‌كه‌ بكه‌ین؟
× نا.. با دووسێ براده‌رى تریش بتۆرێن ئینجا.
(ته‌له‌فونى نێوان دوو هه‌ڤاڵ)
*****
ـ به‌ ره‌ئى من ئێستا وه‌ختێتى.
× نا.. با بچێته‌ به‌رده‌م مودیر عام ئینجا.
(دیالۆگى نێوان دوو قرقێنه‌)
*****
ـ تاقه‌تم نه‌ما... به‌ خوا ئه‌وه‌ستم.
× په‌له‌ مه‌كه‌.. با بگاته‌ ناو ئوتێله‌كه‌ ئه‌وسا.
(ئامۆژگاریى تاقم وایه‌رێك بۆ فیت په‌مپێك).