كۆسره‌ت ڕه‌سول پێشوازی له‌ باڵیۆزی به‌ریتانیا له‌عیراق كرد

.

به‌یانی ئه‌مڕۆ یه‌كشه‌ممه‌ 13-1-2019له‌ شاری سلێمانی كۆسره‌ت ڕه‌سول عه‌لی جێگری سكرتێری گشتی یه‌كێتی نیشتمانی كوردستان پێشوازی له‌ جۆن ویڵكس باڵیۆزی به‌ریتانیا له‌عیراق و مارتن وار كونسوڵی به‌ریتانیا هه‌رێمی كوردستان و وه‌فدی یاوه‌ری كرد.

له‌ دیداره‌كه‌دا كه‌ سه‌عدی ئه‌حمه‌د پیره‌ ئه‌ندامی مه‌كته‌بی سیاسی و لێپرسراوی مه‌كته‌بی په‌یوه‌ندییه‌كان ئاماده‌ی بوو، به‌چڕوپڕی گفتوگۆكرا له‌ باره‌ی دۆخی كوردستان و عیراق و ناوچه‌كه‌ و هه‌ردوولا به‌گرنگیه‌وه‌ له‌ گۆڕانكاری و پێشهاته‌كانی ناوچه‌كه‌یان ڕوانی و جه‌ختیان له‌وه‌ كرده‌وه‌ پێویسته‌ هه‌موو لایه‌نه‌كان ڕۆڵیان هه‌بێ له‌ گۆڕانكارییه‌كاندا.

په‌یوه‌ست به‌ دۆخی هه‌رێمی كوردستان و قۆناغه‌كانی پێكهێنانی كابینه‌ی نوێی حكومه‌تی هه‌رێمی كوردستان، جێگری سكرتێری گشتی و باڵیۆزی به‌ریتانیا له‌عیراق ڕاشكاوانه‌ گفتوگۆیان كردو جه‌ختیان له‌پێكهێنانی حكومه‌تێكی كاراو چالاك له‌سه‌ر بنه‌مای شه‌راكه‌تی ڕاسته‌قینه‌ كرده‌وه‌.

دۆخی عیراق و په‌یوه‌ندییه‌كانی نێوان هه‌رێم و به‌غدا ته‌وه‌رێكی تری دیداره‌كه‌ بوو، له‌مڕووه‌وه‌ هه‌ردوولا هاوڕابوون كه‌ په‌یوه‌ندییه‌كی ته‌ندروست له‌سه‌ر بنه‌مای ده‌ستووری عیراق و بۆ پاراستنی به‌رژه‌وه‌ندی هاووڵاتیان له‌نێوان هه‌رێم و به‌غدا هه‌بێ.

PUKmedia نووسینگه‌ی جێگری سكرتێری گشتی یه‌كێتی نیشتمانی كوردستان