مه‌كته‌بی سیاسی: كوردستانی نوێ شانازییه‌كی گه‌وره‌یه‌

.

مه‌كته‌بی سیاسی یه‌كێتیی نیشتمانیی كوردستان به‌بۆنه‌ی یادی 28 ساڵه‌ی ده‌رچوونی ڕۆژنامه‌ی كوردستانی نوێ له‌ڕاگه‌یه‌ندراوێكدا وێڕای ئاماژه‌ كردن به‌ چالاكییه‌كانی ڕۆژنامه‌ی كوردستانی نوێ، ئه‌و ڕۆژنامه‌یه‌ به‌ شانازییه‌كی گه‌وره‌ بۆ یه‌كێتی ده‌زانێت و هیواده‌خوازێت وه‌ك هه‌میشه‌ نوێ بێت.

ئه‌مه‌ش ده‌قی ڕاگه‌یه‌ندراوه‌كه‌ی مه‌كته‌بی سیاسی:

بیست و هه‌شت ساڵ تێپه‌رده‌بێت به‌ سه‌ر بیره‌وه‌ری ده‌ركردنی یه‌كه‌م ژماره‌ی ڕۆژنامه‌ی "كوردستانی نوێ"دا، كه‌ له‌ دوای راپه‌رین و له‌هه‌لومه‌رجی هه‌ستیارو  دژواردا، كه‌ هێشتا راپه‌رینی كوردستان له‌سه‌ره‌تای به‌دیهێنانی ئامانجه‌كانیدا بوو، یه‌كێتیی نیشتمانیی كوردستان وه‌ك هه‌میشه‌ ڕچه‌شكێنی كرد و یه‌كه‌م ڕۆژنامه‌ی رۆژانه‌ی له‌ مێژووی ڕۆژنامه‌گه‌ری كوردی و یه‌كه‌م ڕۆژنامه‌ی ڕۆژانه‌ی له‌دوای راپه‌رین، له‌ كوردستانی ئازادكراودا ده‌ركرد.

بیره‌وه‌ری ده‌رچوونی "كوردستانی نوێ" هه‌ر بۆ یه‌كێتی و ئه‌و تێكۆشه‌رانه‌، ماییه‌ی شانازی نیه‌، كه‌ ئه‌و كات به‌رپرسیارێتی به‌جێگه‌یاندنی ئه‌و ئه‌ركه‌ مێژووییانه‌ی گرته‌ئه‌ستۆ، به‌ڵكو بۆ هه‌موو یه‌كێتیی-یه‌كان شانازییه‌كی گه‌وره‌یه‌.

بۆ ڕۆژنامه‌نوسان و ڕۆژنامه‌گه‌ری كوردی-یش بۆنه‌یه‌كی پیرۆزو ناوازه‌یه‌، كه‌ یادی ده‌رچوونی یه‌كه‌م ڕۆژنامه‌ی ڕۆژانه‌ی كوردی ده‌كه‌نه‌وه‌، كه‌ وه‌ك ناوه‌ندێكیش بووه‌ بۆ پێگه‌یاندن و بره‌ودان به‌ توانای ڕۆژنامه‌وانی ده‌یان ڕۆژنامه‌نووس و نوسه‌ر له‌ كوردستاندا.

كوردستانی نوێ، له‌ ساڵانی ڕابوردوودا، ئه‌ركه‌ ڕۆژنامه‌وانیه‌كانی به‌ دڵسۆزی و سه‌نگینی و پاراستنی ڕه‌وشتی ڕۆژنامه‌وانی و خزمه‌تكردنی كوردستان و كورده‌واری ڕاپه‌راندووه‌. له‌ قۆناغی ده‌ركه‌وتنی میدیای نوێ و سۆشیالمیدیایشدا، كه‌ ڕۆژنامه‌ی كاغه‌ز پاشه‌كشه‌ی كرد، "كوردستانی نوێ" له‌ ململانێی پاراستنی خوێنه‌رو سه‌نگی ڕۆژنامه‌ی كاغه‌زدا سه‌ركه‌وتوو بوو.

ئومێده‌وارین بۆ داهاتوویش، به‌ خوێندنه‌وه‌ی هه‌مه‌لایه‌نه‌ی بارودۆخی گۆڕاوی كوردستانء ئه‌و واقیعه‌ سیاسیی و رۆژنامه‌وانی و كۆمه‌ڵایه‌تیه‌ی له‌ كوردستاندا هه‌یه‌، "كوردستانی نوێ" باشتر ئه‌ركه‌كانی جێبه‌جێ بكات و وه‌ك هه‌میشه‌ نوێ بێت.

یادی "كوردستانی نوێ" له‌ سه‌رنوسه‌رو سكرتاریه‌تی نووسین و ڕۆژنامه‌نوسان و نوسه‌ران و خوێنه‌رانی پیرۆزبێت. سڵاوی وه‌فاداریش بۆ ئه‌و تێكۆشه‌رانه‌ی له‌ قۆناغه‌ جیاجیاكاندا له‌م ڕۆژنامه‌یه‌دا خزمه‌تیان كردووه‌.

راگه‌یاندنی مه‌كته‌بی سیاسی
یه‌كێتیی نیشتمانیی كوردستان

11/1/2019
PUKmedia