ئاسۆ مامه‌ند: كوردستانی نوێ بووه‌ته‌ مینبه‌رێك بۆ هه‌موان

.

په‌یامی پیرۆزبایی ئاسۆ مامه‌ند به‌بۆنه‌ی 27 ساڵه‌ی ده‌رچوونی رۆژنامه‌ی كوردستانی نوێ-وه‌.

ده‌قی په‌یامه‌كه‌..
به‌ڕێزان/ سه‌رنووسه‌ر و كادرو ڕۆژنامه‌نووسانی (كوردستانی نوێ)ی ئازیز
به‌بۆنه‌ی 27هه‌مین ساڵه‌ی ده‌رچوونی رۆژنامه‌ی (كوردستانی نوێ) به‌ گه‌رمی پیرۆزیاییتان لێده‌كه‌ین و ئومێده‌وارین رۆژنامه‌كه‌تان وه‌ك هه‌میشه‌ پێشه‌نگی بزاوتی رۆژنامه‌گه‌ری كوردیی بێ له‌ كوردستان.
وه‌ك دیاره‌ (كوردستانی نوێ) وه‌ك یه‌كه‌م رۆژنامه‌ی رۆژانه‌، له‌ دوای راپه‌ڕینی ساڵی 1991ی خه‌ڵكی كوردستان، بوه‌ وێستگه‌ و ده‌ستپێكێكی گرنگ له‌ مێژووی رۆژنامه‌گه‌ری كوردیدا كه‌ توانی هه‌موو ئه‌و به‌ربه‌ستانه‌ ببڕێ كه‌ پێشتر ببوونه‌ ئاسته‌نگ له‌ به‌رده‌م به‌ره‌و پێشچوونی رۆژنامه‌گه‌ری كوردیدا. ئه‌وه‌ش پانتاییه‌كی چه‌ندایه‌تی و چۆنایه‌تی بۆ نووسه‌ر و خوێنه‌رانی كورد ره‌خساند تاكو له‌ سایه‌ی ئه‌و رۆژنامه‌یه‌دا تواناكانی خۆیان و، لایه‌نی كولتوری میلله‌ته‌كه‌یان به‌ خوێنه‌ران ئاشنا بكه‌ن.

رۆژنامه‌ی "كوردستانی نوێ" له‌ ماوه‌ی كاركردنیدا بووه‌ته‌ ناوه‌ندێكی گرنگ و به‌ كه‌ڵك بۆ پێگه‌یاندن و ناسینی چه‌ندین نووسه‌ر و رۆنامه‌نووس. هه‌روه‌ها بووه‌ته‌ مینبه‌رێكیش بۆ سه‌رجه‌م چین و توێژه‌كانی كۆمه‌ڵگا به‌ تایبه‌تیش؛ توێژی رۆشنبیر و ده‌سته‌ بژێران، تاكو له‌و مینبه‌ره‌وه‌ تواناكانی خۆیان له‌ دوو توێی لاپه‌ڕه‌كانی كوردستانی نوێدا به‌رجه‌سته‌و وێنا بكه‌ن و، خزمه‌تی ته‌واوی كایه‌ی كولتوری، مه‌عریفی، ئه‌ده‌بی و هونه‌رییه‌كان بكه‌ن.

جێی خۆیه‌تی له‌م بۆنه‌یه‌دا، هه‌وڵ و كۆششه‌كانی رۆژنامه‌ی (كوردستانی نوێ) به‌ بیری هه‌موو لایه‌ك بهێنینه‌وه‌ كه‌ چۆن لێبڕاوانه‌و پیشه‌ییانه‌، داكۆكی له‌ پرسه‌ نه‌ته‌وه‌یی و یشتمانییه‌كان كردووه‌، له‌و سۆنگه‌یه‌وه‌ دلێرانه‌ جه‌ختی له‌ شوناسی ناوچه‌ كێشه‌ له‌سه‌ره‌كان كردووه‌ته‌وه‌ و له‌و رووه‌وه‌ لێبڕاوانه‌ و به‌ هه‌ستێكی به‌رپرسیارانه‌وه‌ مامه‌ڵه‌ی له‌ ته‌ك دۆسییه‌ی ئه‌و ناوچانه‌دا كردووه‌!

دووباره‌ یادی 27هه‌مین ساڵه‌ی "كوردستانی نوێ"ی ئازیز له‌ ستافی رۆژنامه‌كه‌ و سه‌رجه‌م رۆژنامه‌نووسان پیرۆز ده‌كه‌ین


ئاسۆ مامه‌ند
لێپرسراوی مه‌ڵبه‌ندی رێكخستنی 2ی كه‌ركوك

10-1-2019

PUKmedia تایبه‌ت