ئازاد وه‌رتی: درێژه‌پێده‌ری رێبازه‌كه‌ی سه‌رۆك مام جه‌لال-م

.

ئازاد وه‌رتی درێژه‌پێده‌ری رێبازی سه‌رۆك مام جه‌لال دووپاتده‌كاته‌وه‌
وه‌فدێكی ئه‌نجومه‌نی ناوه‌ندی كه‌ پێكهاتبوون له‌ هه‌ڤاڵانی سكرتارییه‌ت و چه‌ند لێپرسراوێكی كۆمسیۆنه‌كان و ژماره‌یه‌ك له‌ هه‌ڤاڵانی ئه‌نجومه‌نی ناوه‌ندی سه‌ردانی ماڵی ئازاد وه‌رتی یان له‌ شاری هه‌ولێر كرد.

سه‌ره‌تا ئازاد وه‌رتی به‌خێرهاتنی گه‌رمی وه‌فدی ئه‌نجومه‌نی ناوه‌ندی كرد و خۆشحاڵی خۆی بۆ ئه‌و سه‌ردانه‌ ده‌ربڕی وتیشی: شانازی به‌ هه‌ڤاڵاكانم له‌ناو یه‌كێتی و ئه‌نجومه‌نی ناوه‌ندی ده‌كه‌م و ئه‌م سه‌ردانه‌ پێگه‌ و قورساییه‌كه‌ به‌ من و خانه‌واده‌كه‌متان به‌خشی.

پاشان زوبێر عوسمان جێگری سكرتێری ئه‌نجومه‌نی ناوه‌ندی له‌ وته‌یه‌كدا رایگه‌یاند: مێژووی خه‌بات و تێكۆشانی خانه‌واده‌ تێكۆشه‌ره‌كه‌ی و خه‌باتی ئازاد وه‌رتی جێی شانازیی و فه‌خره‌ بۆ گه‌لی كورد و یه‌كێتیی نیشتمانیی كوردستان و له‌ ئه‌نجومه‌نی ناوه‌ندیش یه‌كێكه‌ له‌ هه‌ڤاڵه‌ ماندوونه‌ناس و خاوه‌ن پرۆژه‌كان و زۆر دڵسۆزانه‌ كاره‌كانی ئه‌نجامداوه‌.

پاشان ئاسۆی شێخ نوری تێكۆشه‌ری دێرین و لێپرسراوی كۆمسیۆنی كۆنگره‌ی چواری ئه‌نجومه‌نی ناوه‌ندی ئاماژه‌ی بۆ ئه‌وه‌شكرد: هه‌موومان له‌ په‌رۆشیمان بۆ یه‌كێتی و رێبازه‌كه‌ی سه‌رۆك مام جه‌لال پرۆژه‌ و راو سه‌رنج و تێبینیمان هه‌یه‌ و پێویسته‌ به‌رده‌وامبین و مه‌یدانه‌كه‌ بۆ هیچ كه‌سێك چۆل نه‌كه‌ین و هه‌وڵه‌كانمان چڕتر بكه‌ینه‌وه‌ بۆ به‌ستنی كۆنگره‌ و گۆرینی فۆرم و هه‌یكه‌لی حزبه‌كه‌مان و یه‌كێتی ده‌كه‌ینه‌وه‌ به‌ یه‌كێتیه‌كه‌ی جاران.

وتیشی: ئێمه‌ به‌هیچ شێوه‌یه‌ك لێناگه‌رێن هه‌ڤاڵه‌ دڵسۆزو تێكۆشه‌رو خاوه‌ن شه‌هید و قوربانیه‌كانمان لێ زوییر بێت و به‌ هه‌ر پاساوێك لێمان دوربكه‌وێته‌وه‌، ده‌ست له‌ناو ده‌ست به‌هه‌وڵ و كۆشیشی هه‌مومان یه‌كێتی به‌هێز ده‌كه‌ینه‌وه‌ و ده‌كه‌ینه‌وه‌ به‌ هێزی یه‌كه‌م .

پاشان هه‌ڤاڵانی ئه‌نجومه‌نی ناوه‌ندی رۆڵ و پێگه‌ی ئازادو خانه‌واده‌ تێكۆشه‌ره‌كه‌ییان به‌رزنرخاند و پشتیوانی خۆیان بۆ هه‌ر داوا و پێشنیارێكی ئازاد دووپاتكرده‌وه‌.

دواتر ئازاد وه‌رتی وێرای به‌خێرهاتنی گه‌رمی هه‌ڤاڵانی ئه‌نجومه‌نی ناوه‌ندی وتی: به‌داخه‌وه‌ سه‌رنج و تێبنی ده‌ربڕینی ناڕه‌زایه‌تییه‌كانم له‌سه‌ر نه‌به‌ستنی كۆنگره‌ و هه‌یه‌كه‌لی حزب و گۆرانكارییه‌كانی ناو یه‌كێتی و چۆنیه‌تی به‌رێوه‌چوون و میكانیزیمی كاركردنی یه‌كێتی و نیگه‌رانیه‌كانم كه‌ زۆرینه‌مان تێبینی و سه‌رنج و پێشنیارمان هه‌یه‌ به‌هه‌ند وه‌رنه‌گیراوه‌، هه‌روه‌ها بڵاوكردنه‌وه‌ی په‌یامی ده‌ستله‌كاركێشانه‌وه‌كه‌م به‌لارێدا برا و هه‌ندێك قسه‌وباس و هه‌ڵوێست له‌سه‌ر وه‌رگرتنم ئازاری دام، چونكه‌ ئه‌وه‌ له‌گه‌ڵ خه‌بات و تێكۆشانی خۆم و بنه‌ماڵه‌كه‌م نایه‌ته‌وه‌ .

وتیشی: سه‌ره‌ڕای ئه‌خنه‌و تێڕوانینم بۆ چاره‌سه‌ركردنی كێشه‌كانی (ی.ن.ك) به‌ شانازییه‌وه‌ ئه‌ندامێكی یه‌كێتیی نیشتمانیی كوردستانم و درێژه‌پێده‌ی رێبازه‌كه‌ی سه‌رۆك مام جه‌لال-م.

PUKmedia