ده‌یان خاڵی پشكنین له‌ به‌غدا لاده‌برێن

.

فه‌رمانده‌ی پرۆسه‌كانی به‌غدا لابردنی ژماره‌یه‌ك خاڵی پشكنینی له‌ناو شاری به‌غدا راگه‌یاند.

ئه‌مڕۆ 15-12-2018، له‌ كۆنفرانسێكی رۆژنامه‌وانیدا فه‌ریق روكن جه‌لیل روبه‌یعی فه‌رمانده‌ی پرۆسه‌كانی به‌غدا رایگه‌یاند: له‌سه‌ر رێنماییه‌كانی فه‌رمانده‌ی گشتی ھێزه‌ چه‌كداره‌كان 35 خاڵی پشكنین له‌ به‌غدا لاده‌برێن كه‌ 22 یان ده‌كه‌ونه‌ به‌ری كه‌رخ و 13یان ده‌كه‌ونه‌ به‌ری ره‌سافه‌.

فه‌رمانده‌ی پرۆسه‌كانی به‌غدا راشیگه‌یاندوه‌، به‌غدا سه‌قامگیره‌و ھۆكاره‌كه‌شی بۆ ھاوكاریكردنی ده‌زگا ئه‌منییه‌كان له‌لایه‌ن ھاووڵاتییانه‌وه‌ ده‌گه‌ڕێته‌وه‌.

وتیشی: له‌م كاته‌دا پێناچێت سه‌رجه‌م خاڵه‌ پشكنینه‌كان لاببرێن، چونكه‌ به‌م دواییانه‌ ھێزه‌ ئه‌منییه‌كان توانیویانه‌ تۆڕێكی گه‌وره‌ی تیرۆرستی له‌ به‌غدا ده‌ستگیر بكه‌ن، بۆیه‌ مه‌ترسییه‌كانی تیرۆر ھێشتا ماون و ھه‌ڵه‌یه‌ له‌م كاته‌دا ھه‌موو خاڵه‌كانی پشكنین لاببرێن، چونكه‌ ئامانجی بنه‌ڕه‌تی داعشیش لابردنی ئه‌و خاڵه‌ پشكنینانه‌یه‌.

PUKmedia ئاژانسه‌كان