پێ ى ئه‌ڵێن موعجیزه‌

.

پێ ى ئه‌ڵێن موعجیزه‌

× فه‌رموو به‌گم.. ئه‌مه‌ش كیتابه‌كه‌.. ئیمزایه‌كى بكه‌ و با بڕۆم ره‌قه‌م و ته‌ئریخى لێ بده‌م.
ـ ئیمزاى چى له‌خۆته‌وه‌؟! ئه‌ى نابێ بیخوێنمه‌وه‌؟
× قوربان خه‌مت نه‌بێ فیڕنه‌گوله‌ تایپى كردووه‌.. ماشه‌ڵـڵاى لێ بێ كه‌ سه‌ریعه‌!.
ـ یاڕه‌بى ده‌ستى شكێ باشه‌؟! ته‌ماشا.. فه‌رموو.. له‌ باتى جه‌نابى وه‌زیر نووسیوێتى جه‌ناحى وه‌زیر.. وه‌زیرى فه‌قیر باڵى له‌ كوێ بوو؟
× ئه‌شهه‌دوبیلـلا راست ئه‌كه‌ى گه‌وره‌م.. وه‌زیر قوڕبه‌سه‌ره‌ خۆى عایدى باڵه‌... به‌ڵام پیاو قسه‌یه‌ك بۆ دزیش بكات.. فیڕنه‌گوله‌ زۆر سه‌ریعه‌ له‌ تایپكردندا.
ـ فایده‌ى چى رۆڵه‌؟! شه‌ڵـڵا هێواش بوایه‌ و غه‌ڵه‌تى نه‌كردایه‌.
× ئوستاز درۆم نه‌كردبێ له‌ سه‌ركردایه‌تى سیاسیى كورده‌وه‌ فێر بووه‌.
ـ له‌وانه‌وه‌ فێر بووه‌؟!!
ـ به‌ڵێ. ئه‌وانیش قه‌رارى سه‌ریع ئه‌ده‌ن به‌ڵام هه‌مووى غه‌ڵه‌ته‌.
× ئه‌ها.. چاوت لێ یه‌؟.. كلكه‌قنگه‌م ئه‌ده‌ى بۆ ئه‌وه‌ى ده‌ست بكه‌مه‌وه‌ به‌ باسى سیاسه‌ت.
ـ نه‌كه‌ى به‌قوربانى رۆحت بم.. سیاسه‌ت تامى نه‌ماوه‌.. وازى لێ بێنه‌.
× ده‌ كه‌واته‌ دانیشه‌ با دوو قسه‌ت بۆ بكه‌م.
ـ ئه‌زانم چى یه‌ به‌گم.. نه‌سیحه‌ته‌.
× چۆن ئه‌زانى نه‌سیحه‌ته‌؟
ـ له‌به‌ر ئه‌وه‌ى به‌لاشه‌.
× ئه‌ى ئه‌گه‌ر به‌ پاره‌ بوو؟
ـ ئه‌گه‌ر به‌ پاره‌ بێ پێ ى ئه‌ڵێن راوێژ قوربان.
× تۆش مه‌لعونى ها.. دانیشه‌ با قسه‌كه‌ت بۆ بكه‌م.. دانیشه‌ له‌گه‌ڵ تۆمه‌.
ـ گه‌وره‌م ئیجازه‌ بفه‌رموو با گوێى لى َنه‌گرم.
× به‌خوا بێ ئه‌قڵى.. هه‌یه‌ حه‌زى له‌ قسه‌ى باش نه‌بێ؟!!
ـ به‌گم ئیمانم به‌ قسه‌ى باش نى یه‌.. قسه‌ى باش نایه‌ته‌دى.
× ئه‌ى ئه‌گه‌ر هاته‌دى؟؟
ـ ئه‌گه‌ر هاته‌دى پێى ناڵێن قسه‌ى باش، پێى ئه‌ڵێن موعجیزه‌.