له‌ شه‌ڕی هه‌موو ئومه‌ی عه‌ره‌بیه‌وه‌...

.

له‌ شه‌ڕی هه‌موو ئومه‌ی عه‌ره‌بیه‌وه‌... بۆ شه‌ڕی دكتۆر به‌رهه‌م

جارێكیان گوێم له‌ فه‌رمانده‌یه‌كی سه‌ربازی پارتی بوو ،گوتی "ئه‌گه‌ر سه‌رۆك فه‌رمانمان پێبكات شه‌ڕی هه‌موو ئومه‌ی عه‌ره‌بی ده‌كه‌ین " له‌ راستیدا من ئه‌و كاته‌ به‌ ده‌ر له‌ هه‌ندێ‌ سه‌رنجی جیا قسه‌كه‌م له‌و ڕوانگه‌یه‌وه‌ پێخۆش بوو كه‌ ناكرێت كورد هه‌میشه‌ خۆی به‌ بچوك و لاره‌ خوار بزانێت ، ئه‌و كاته‌ سه‌رو به‌ندی ریفراندۆم بوو ، كه‌من هه‌رگیز كاته‌كه‌یم بۆ ناوچه‌ دابڕێنراوه‌كان و كه‌ركوك به‌ چاك نازانی و چه‌ندین كۆڕو به‌رنامه‌شم له‌ سه‌ر كرد ، به‌ڵام له‌ دڵه‌وه‌ حه‌زم ده‌كرد بارزانی رێكاره‌كانی ریفراندۆمی یه‌ك له‌ دوای یه‌ك جێبه‌جێ‌ بكردایه‌و ئێستا له‌ ته‌ك عێراق دوو دراوسێ‌ باین ، نه‌ك شه‌ڕ له‌ سه‌ر پۆست بكه‌ین ، من حه‌زم ده‌كرد به‌رزانی به‌و سوربونه‌یه‌وه‌ له‌ سه‌ر ریفراندۆم تا ئاستی جیابونه‌وه‌ چووبا ، نه‌ك گه‌ڕانه‌وه‌ بۆ به‌غدا ، هه‌رچه‌ند ناوچه‌ دابڕێنراوه‌كانمان توشی گه‌وره‌ترین شكست كردو ئێستاش ناتوانین هیچیان بۆبكه‌ین .

ئه‌و فه‌رمانده‌یه‌و بارزانی و میدیای پارتی شه‌ڕی هه‌موو ئومه‌ی عه‌ره‌بیان نه‌كرد ، ئه‌و فه‌رمانده‌یه‌ی ئاماده‌ بوو شه‌ڕی ئومه‌ی عه‌ره‌بی بكات كه‌ركوكی بۆ حه‌سه‌ن پلایس و مه‌هدی موهه‌ندیس جێهێشت ، به‌ڵام له‌و رۆژه‌وه‌ی دكتۆر به‌رهه‌م ساڵح بووه‌ به‌ سه‌رۆك كۆمار شه‌ڕێكی گه‌وره‌ له‌ دژی به‌ڕێخراوه‌ ، ئه‌م شه‌ڕه‌بۆو له‌ پای چی ، هه‌ڵبه‌ت دیاره‌ هه‌ر له‌به‌ر ئه‌وه‌ی لای پارتی ده‌بوو له‌بری دكتۆر به‌رهه‌م ساڵح ، دكتۆر فواد حوسێن سه‌رۆككۆمار با ، سه‌رۆك كۆماری عێراق ، ئه‌و عێراقه‌ی بڕیار بوو له‌ 26-9-2017 مه‌سعود بارزانی له‌ ئه‌نجومه‌نی ئاسایش له‌ وتارێكدا بای بای لێبكات .

شه‌ڕی ئومه‌ی عه‌ره‌بی نه‌كرا ، به‌ڵام به‌ میكرۆسكۆبه‌وه‌ به‌ دوای ئه‌وه‌وه‌ین كه‌ ئاخۆ به‌رهه‌م ساڵح ده‌توانێ‌ سه‌ركه‌وتو بێت یان نا ، له‌ سه‌فه‌ره‌كانی ئه‌م دوایه‌ی دكتۆر به‌رهه‌م ساڵح به‌ وڵاتاندا ، له‌ بری ئه‌وه‌ی له‌ بایه‌خی سه‌فه‌ره‌كان بكۆڵینه‌وه‌ به‌ تایبه‌ت كه‌ سه‌رۆك كۆمار كورده‌ ، دێین سه‌رقاڵی ئه‌وه‌ ده‌بین چۆن سه‌فه‌ره‌كان بێ‌ بایه‌خ بكه‌ین ، چۆن وانیشانبده‌ین كه‌ به‌رهه‌م ساڵح هیچی پێناكرێت ، به‌ راده‌یه‌ك ئه‌م ماكینه‌ میدیاییه‌ خراوه‌ته‌ گه‌ڕ كه‌ ته‌نانه‌ت هه‌ندێك یه‌كێتیش هه‌مان رایان لادروست بووه‌ .

بۆ من ره‌خنه‌ گرتن له‌ دكتۆر به‌رهه‌م یان هه‌ر كه‌سێكی تر دروست و پێویسته‌ لێ‌ دوژمنایه‌تی و شكاندنه‌وه‌ ناچنه‌ خانه‌ی ره‌خنه‌گرتنه‌وه‌ ، بۆیه‌ ئه‌م سیاسه‌ته‌ی پارتی له‌ مه‌ودای یه‌كساڵدا به‌ گه‌وره‌ترین پاشه‌كشه‌و شكست ده‌زانم ، با له‌ هه‌ڵبژاردنیشا پارتی كورسیه‌كانی فڕی بن .

له‌تیف فاتیح فه‌ره‌ج