یەكێتی و هێزی شەراكەتی حكومەت

.

یەكێتیی نیشتمانیی كوردستان، شەراكەتی راستەقینە دەكاتە بنەمای بەشداریكردنی لە كابینەی نۆهەمی حكومەتی هەرێم، ئەم پەیامەش لە كۆبوونەوەی ئەمڕۆ 8/12/2018 تەوەرێكی جێباسی گرنگی كۆبوونەوەی مەكتەبی سیاسیی بووە.

شەراكەتی راستەقینە، كە یەكێتی باسی دەكات، دوو دیوی هەیە، یەكێكیان دانپێدانانێكە ئەو راستیە دەسەلمێنێت كە لە كابینەكانی رابردوودا یەكێتی "هاوبەشی راستەقینە"نەبووە و بەشدارییەكی لاسەنگی كردووە و كۆسپ و لەمپەری بە ئەنقەستی لەبەردەمدا بووە، ئەم هێزە سیاسییەش لەبەر هەرهۆكارێك بێت، چۆتە ژێرباری لاسەنگییەكەوە تا ئەو ئاستەی توانای رێكردنی نەهێلێت!.

لاسەنگییەكانی شەراكەتی یەكێتی بەشێكی زۆری لەو وەزارەت و جۆمگانەشدا هەبوون كە خودی وەزیری وەزارەتەكە یەكێتیی بووە، بەڵام لەهەرەمی خوارەوەی هێندەی كۆسپ و لەمپەری حزبیی هەبووە، هێندە خەمخۆریی بۆ گەیاندنی بڕیار و كارەكان نەبووە كە بەخزمەتی كۆمەڵانی خەڵك بشكێتەوە، بۆیە لاسەنگیەكە لە دارایی و بودجەو نەوت و ئیدارەدانیشدا هەبووە!.

كەواتە بۆ كابینەی نۆیەم، یەكێتی بە شەراكەت رازیی دەبێت، كە بەر لە هەر هەنگاوێك دەبێت ستراتیژ و كارنامەیەكی راستكردنەوەی لاسەنگیەكە بۆ گفتوگۆكان ئامادەبكرێت و بەراشكاوی خاڵ بخرێتە سەر پیتەكانی لاسەنگكردن كە ئەوانیش وەرگرتنی هەقبەشی یەكێتی لە حكومەتی نوێ و پۆستە سیادی و خزمەتگوزارییەكان لە بواری " نەوت، دارایی، سەربازی، ئەمنی، دیپلۆماسی" سەرباری پۆستە باڵاكانی لە سەرۆكایەتییەكان.

بەشداریكردنی یەكێتی ئەوكاتە گرنگە كە شەریكی راستەقینە بێت لە ئیدارادان و حوكمڕانیدا، نەك بەشداربێت بۆ پێكهێنانی كابینەیەك و دانانی چەند وەزیر و بەرپرسێك، بەبێ ئەوەی بڕیاردەری راستەقینە بن و لەخودی كابینەكەدا دژایەتی بكرێت و دەسەڵاتی بڕیاردانی لە گۆشەیەكدا كورتبكرێتەوە، ئەوەی كە ئەم چەمكەش لە بەشداریدا دەكاتە پراكتیك، رازیی نەبوون و بێدەنگ نەبوونی یەكێتیە لە لاسەنگی دیكە و كردنەدەرەوەی لە هاوبەشێتی كە لە رابردوودا كراوە، ئەوەش بە بەكارهێنانی هێزی سیاسیی یەكێتی دەبێت بۆ راستكردنەوەی لاسەنگی.

عەتا كەریم