كه‌شناسی گه‌رمیان له‌ڕاگه‌یه‌نراوێكدا هاووڵاتییانی سنووره‌كه‌ ئاگادار ده‌كاته‌وه‌ له‌دروستبوونی لافاو.

به‌ڕێوه‌به‌رایه‌تی كه‌شناسی گه‌رمیان رایده‌گه‌یه‌نێت، ئه‌مڕۆ پێنج شه‌ممه‌ 6-12-2018 به‌هۆی به‌رده‌وامی كاریگه‌ری ئه‌و شه‌پۆله‌ بارانبارینه‌ی هه‌رێمی گرتووه‌ته‌وه‌ ئه‌گه‌ری بارانی به‌خوڕ له‌زۆربه‌ی كاته‌كاندا هه‌یه‌.

هه‌ر له‌ڕاگه‌یه‌نراوه‌كه‌شدا هۆشداری دروستبوونی لافاوی زۆر دراوه‌ له‌سه‌رجه‌م دۆڵ و چه‌م و ناوچه‌ نزماییه‌كانی گه‌رمیان.

له‌پێناو سه‌لامه‌تی هاوڵاتییانی سنووره‌كه‌ به‌ڕێوه‌به‌رایه‌تی كه‌شناسی گه‌رمیان داوا ده‌كات به‌هیچ شێوه‌یه‌ك رێگاخاكیه‌كان و ئه‌و رێگایانه‌ به‌كار نه‌هێنن كه‌ چه‌م و دۆڵیان دێته‌ڕێ.

ئه‌مه‌ش له‌كاتێكدایه‌ به‌هۆی بارانبارینه‌وه‌ له‌چه‌ند سه‌عاتی داهاتوودا لافاو له‌به‌شێك شارو شارۆچكه‌كانی هه‌رێمی كوردستان دروستبووه‌ و به‌هۆیه‌وه‌ گرفتی هاتوچۆ بۆ شۆفێران و هاووڵاتییان دروستبووه‌.

له‌به‌رامبه‌ریشدا به‌ڕێوه‌به‌رایه‌تییه‌كانی هاتوچۆی پارێزگاكانی هه‌رێم هۆشداریی ده‌ده‌نه‌ شۆفێران و داوایان لێده‌كه‌ن خێرایی كه‌مبكه‌نه‌وه‌ و خۆشیان له‌و شه‌قامانه‌ دوور بخه‌نه‌وه‌ كه‌ رێژه‌یه‌كی زۆر ئاوی تێدا كۆبووه‌ته‌وه‌.

PUKmedia راگه‌یاندنی كه‌شناسی گه‌رمیان