ئەركی نوێنەری كورد لە عیراقی ئەمرۆدا

.

 سیاسەتی  15 ساڵی رابردووی حكومەتە یەكلەدوای یەكەكانی عیراق  , یان ووردتر بڵێین لەدوای هێنانەخوارەوەی پەیكەرەكەی سەدام حسێن لە گۆرەپانی فیردەوسی شاری بەغدا لە ساڵی 2003  ,  بەرامبەر بە تاكی كورد بەتایبەتی و قەوارەی هەرێمی كوردستان بەگشتی, ئاماژەگەلێكن بەوەی پەیرەوكردنی سیاسەتێكی نادپەوەریی بووەو  ئەو سیاسەتەش جۆرە بڕوایەك دروستدەكات  , بەوەی  ئەگەر نوێنەرانمان لەبەغدا هەمەهانگیی یەكتر نەبن بۆ وەرگرتنی  مافەكان    , ئەوا لانی كەمی مافە ئاسایی و سروشتییەكانی كورد وەك نەتەوە لە چوارچێوەی عیراقدا نادرێت.

دوور لەهەموو هەڵوێستێكی هەڵچوونیی ئەم لایەن و ئەو لایەن بەرامبەر  د. بەرهەم وەك سەرۆك كۆماری عیراق , ئەگەر  كەمترین  ئینسافیش بەكاربهێرێت , ئەوا  هەست بە بوون و سەرهەڵدانی خێر دەكرێت كە لەمەودوا بۆ كورد بگەرێتەوە و دەتوانێت داكۆكیی لە مافەكانمان بكات, چونكە بەڕوونی وەك مانگی چواردە دەركەوتووە كە بۆچونەكانی ئەودیو سنورەكانی هەرێم بەرمبەر خودی سەرۆك كۆمار لەگەڵ هەندێك لەبۆچوونەكانی ئەمدیودا , ئاسمان و رێسمانی فەرقە , لەو دیوودا كەسایەتییەكیان دەیانەوێ سەرۆك كۆمار  ببێتە خەیمەی  كۆكەرەوەی لایەنە جیاوازەكان و لەمدیویشدا دەمانەوێ ببێتە پارێزەری ئەو مافانەی كە لەدەستوردا بۆ كورد فەراهەمكراون , هەردوو خەسڵەتەكەش بەرێژەیەكی زۆر لە كاروكردەوەكانی  د, بەرهەم لە بەغدادا دیاربووە, بەڵام ئایا درێژەدان بەو خەسڵەتانە بەبێ هاوكاریی و پشتگیریی و دەستگرتن,  بەردەوامیی دەبێ ؟ كورد دەڵێ چەپڵە بەدەستێك لێنادرێ , چ د. بەرهەم یان هەر كەسایەتیەكی دیكە , بەبێ  هاوكاری و پاڵپشتیی   ناتوانێ درێژە بەو كار و بەرنامانە بدات كە  لەسەرەتاوە بۆ خزمەتكردن و وەرگرتنی مافە زەوتكراوەكانی دایرشتبوو , لەلایەكی دیكەش ناتوانێت ببێتە پاڵپشت بۆ بەهێزكردنی هەڵویست و كارو بەرنامەی   نوێنەرانی كورد لە پەرلەمانی عیراق.

ئەوەی ئێَستا لە بەغدا لەبەردەستەو بوونی هەیە ,  بوونی كەشێكی ئارام و سیاسەتێكی میانڕەو سەردەمێكی تەواو جودا و جیاوازە لەجارانی نزیك, بۆیە ئەگەر لایەنە سیاسییەكانی كورد لەهەرێمی كوردستان كێشەكانی ئەم دیو حەواڵەی بەغدا نەكەن , ئەوا  كورد لەمجارەیدا بەهێزێكی گونجاو لەناوەندە عیراقیی  ئیقلیمییەكاندا دەركەتووە و لەهەر سێ سەرۆكایەتییەكەی كۆمار و وەزیران و نوێنەراندا خاوەنی پێگەن و بەشدارن و بوونیان هەیە لەشوێنی دەركردنی بریارەكاندا  , پێكەبوون و بونی هەمەهانگیی لەنێوان نوێنەرانی كورد لەو سێ شوێنەگرنگەشدا  , قورساییەكانی تێپەراندی گشت ئەو یاسانە  بەسەریاندا دابەش دەبێت و هەڵگرتنی ئەركەكانیش لەو حاڵاتانەدا  بێگومان ئاسانتردەبێ , یەكێكیش لەو قورساییانەی كە پێشتر بەهەر هۆكارێكەوە بێ  لەجێی خۆیدا مابۆوە , تێپەراندن و بەگەڕخستنی كارەكانی سەرژمێریی گشتییە لە عیراقدا بەهەرێمی كوردستانەوە.