نووسه‌رێكی ناسراوی كورد كۆچی دوایی كرد

.

كه‌مێك پێش ئێستا نووسه‌ر و ڕۆژنامه‌نووس د.محه‌مه‌د ئه‌مین هه‌ورامانی له‌ ته‌مه‌نی 90 ساڵیدا له‌سلێمانی كۆچی دوایی كرد.

یه‌كێك له‌ كه‌سه‌ نزیكه‌كانی د.هه‌ورامی تایبه‌ت به‌PUKmedia ی ڕاگه‌یاند: به‌یانی ئه‌مڕۆ 23-11-2018 د.محه‌مه‌د ئه‌مین هه‌ورامانی نووسه‌ر و ڕۆژنامه‌نووس و مامۆستا له‌ ته‌مه‌نی 90 ساڵی به‌هۆی جه‌ڵته‌ی ده‌ماغه‌وه‌ له‌ نه‌خۆشخانه‌ی فریاكه‌وتنی سلێمانی كۆچی دوایی كرد.

وتیشی: ته‌رمه‌كه‌ی له‌ ناحیه‌ی بیاره‌ به‌خاك ده‌سپێدرێت و پرسه‌كه‌شی هه‌ر له‌ ناحیه‌ی بیاره‌ ده‌بێت.

ئاماژه‌ی به‌وه‌شدا كه‌ د.محه‌مه‌د ئه‌مین هه‌ورامانی خاوه‌نی چه‌ندین كتێبه‌ له‌وانه‌، كاكه‌ییه‌كان، مێژووی هه‌ورامان، زانستی ئایینه‌كان.

كۆچكردوو به‌ ده‌یان لێكۆڵینه‌وه‌ی زانستی و ئه‌ده‌بی و زمانه‌وانی هه‌یه‌ و سه‌رپه‌رشتی چه‌ندین نامه‌ی ماسته‌ری كردووه‌ و له‌ زانكۆكانی هه‌رێمی و عیراق و ئێران وه‌ك مامۆستا وانه‌ی وتۆته‌وه‌.

بڕیاربوو له‌سه‌ره‌تای مانگی 11 ی ئه‌مساڵ نوێترین كتێبی به‌ناوی زانستی ئایینه‌كان بڵاو بكاته‌وه‌ كه‌ به‌هۆی نه‌خۆشییه‌كه‌یه‌وه‌ نه‌یتوانی.

PUKmedia  هه‌نگاو جه‌عفه‌ر