د.به‌رهه‌م : ده‌بێت هه‌وڵه‌كان بۆ له‌ناو بردنی تیرۆر چڕبكرێنه‌وه‌

.

دكتۆر به‌رهه‌م ساڵح بایه‌خی به‌هێزكردن و چڕكردنه‌وه‌ی هاریكاریی ئه‌منیی و هه‌واڵگریی نێوان عیراق و كۆماری ئیسلامیی ئێرانی دووپاتكرده‌وه‌ به‌و جۆره‌ی ده‌بێته‌ پشتیوان و به‌هێزكردنی هه‌وڵه‌كانی په‌یوه‌ست به‌ بنبڕكردنی سه‌رچاوه‌كانی تیرۆر و له‌ناوبردنی.

ئه‌مڕۆ شه‌ممه‌ 17-11-2018له‌ میانه‌ی پێشوازیكردنی له‌ عه‌لی شه‌مخانی ئه‌مینداری گشتیی ئه‌نجومه‌نی ئاسایشی نه‌ته‌وه‌یی ئێران له‌ شوێنی مانه‌وه‌ی خۆی له‌ تاران، ستایشی ئه‌و پشتگیریی و یارمه‌تییانه‌ی كرد كه‌ كۆماری ئیسلامیی ئێران پێشكه‌شی عیراقی كردووه‌ له‌ كاتی جه‌نگه‌كه‌یدا دژی تاقمی داعشی تیرۆریست.

سه‌رۆك كۆمار له‌و دیداره‌دا گرنگیی به‌رده‌وامبونی ئه‌و هاریكارییه‌ ئه‌منیی و هه‌واڵگرییه‌ی دووپاتكرده‌وه‌ له‌ نێوان هه‌ردو وڵاتدا هه‌یه‌ له‌ بواری قه‌ڵاچۆكردنی تیرۆردا.

سه‌رۆك به‌رهه‌م ساڵح جه‌ختیكرده‌وه‌ له‌سه‌ر پێویستیی یه‌كخستنی هه‌وڵی ده‌وڵه‌تانی جیهان به‌ مه‌به‌ستی بنبڕكردنی سه‌رچاوه‌ و پاره‌دار كردنی تیرۆر و له‌ ناوبردنی، له‌و روه‌شه‌وه‌ ئاماژه‌یكرد ئه‌و سه‌ركه‌وتنه‌ی كه‌ له‌ عیراقدا به‌ده‌ستهاتووه‌ سه‌ركه‌وتنی هه‌موو ناوچه‌كه‌ و جیهانه‌ به‌سه‌ر تیرۆردا.

لای خۆیه‌وه‌ عه‌لی شه‌مخانی هه‌وڵی هێزه‌ ئه‌منییه‌كانی عیراقی به‌رز نرخاند به‌ هه‌موو به‌شه‌كانیه‌وه‌ له‌ به‌گژاچونه‌وه‌ی تیرۆر و ده‌رپه‌ڕاندنی تیرۆریستان له‌هه‌موو ئه‌و شار و ناوچانه‌ی له‌ژێر چنگیاندا بوون، هه‌وه‌ها به‌رده‌وامبوونی پشتیوانییه‌كانی كۆماری ئیسلامیی ئێرانی بۆ عێراق دووپاتكرده‌وه‌له‌ هه‌مو بواره‌كاندا.

PUKmedia