سەرۆك كۆمار پێشوازی لە سەرۆكی ئەنجومەنی نوێنەرانی ئوردن دەكات

.

ئەمڕۆ 15-11-2018  د. بەرهەم ساڵح سەرۆك كۆمار لە شوێنی مانەوەی لە عەممانی پایتەختی ئوردن پێشوازیكرد لە عاتف تەراونە سەرۆكی ئەنجومەنی نوێنەرانی ئوردن.
‎

لە دیدارەكەدا رێوشوێنەكانی بەهێزكردنی هاریكاریی هاوبەشی نێوان هەردوو وڵات لە هەموو بوارەكاندا تاوتوێكرا بەو جۆرەی خزمەت بە بەرژەوەندی هەردوو گەلی عێراق و ئوردن دەكات.
‎

سەرۆك د. بەرهەم ساڵح لە وتەكانیدا ئاماژەی كرد بۆ پەیوەندی قوڵی مێژوویی نێوان هەردوو وڵاتی برا، بۆ ئەو مەبەستەش داوایكرد رێككەوتنە دووقۆڵییەكانی هەردوو وڵات بە شێوەیەكی كاراتر بچنە بواری جێبەجێكردنەوە.  
‎

لای خۆیەوە سەرۆكی ئەنجومەنی نوێنەرانی ئوردن خۆشحاڵی خۆی دەربڕی بۆ سەردانەكەی سەرۆك كۆمار د. بەرهەم ساڵح و وەفدی هاوڕێی بۆ شانشینی ئوردنی هاشمی، هاوكات دووپاتیكردەوە كە وڵاتەكەی هەوڵ دەدات هاریكاریی و كاری هاوبەش و پەیوەندییەكانی نێوان عەممان و بەغدا بگەیەنێتە ئاستێكی باشتر.

PUKmedia  نوسینگەی رۆژنامەوانی سەرۆك كۆمار