چه‌ند ته‌قینه‌وه‌یه‌ك قه‌زای خورماتوو ده‌هه‌ژێنێت

.

شه‌وی رابردوو زنجیره‌یه‌ك ته‌قینه‌وه‌ی یه‌ك له‌دوای یه‌ك قه‌زای خورماتووی هه‌ژاند و به‌و هۆیه‌شه‌وه‌ پێنج هاووڵاتی بریندار بوون.

په‌یامنێرمان له‌ خورماتوو رایگه‌یاند: له‌ سه‌عات 10 بۆ 11:30 ده‌قیقه‌ی شه‌وی رابردوو 14-11-2018، له‌ قه‌زای خورماتوو سێ ته‌قینه‌وه‌ رویداوه‌.

وتیشی: ته‌قینه‌وه‌ی یه‌كه‌م سه‌عات 10 له‌ پێش ماڵی هاووڵاتییه‌كی توركمان له‌ گه‌ڕه‌كی عه‌سكه‌ری رویداوه‌ و ته‌قینه‌وه‌ی دووه‌میش سه‌عات 11:15 ده‌قیقه‌ بووه‌  له‌ گه‌ڕه‌كی تین.

ئه‌و سه‌رچاوه‌یه‌ راشیگه‌یاند: ته‌قینه‌وه‌ی سێیه‌م دوكانێكی مه‌ی فرۆشی بووه‌ كه‌ به‌ئاربیچی ته‌قه‌ی لێكراوه‌ و ته‌قێنراوه‌ته‌وه‌.

سه‌رچاوه‌یه‌كی ئه‌منیش له‌ خورماتوو به‌ PUKmediaی راگه‌یاند: ته‌قینه‌وه‌كه‌ له‌ڕێگه‌ی بۆمبی چێنراوه‌وه‌ بووه‌ و به‌ مه‌به‌ستی تێكدانی ئارامی ناوچه‌كه‌و نانه‌وه‌ی پشێوی بووه‌ له‌ قه‌زای خورماتوو.

PUKmedia تایبه‌ت