ئامادەكاری بۆ چالاكییەكانی بەرەنگاربوونەوەی توندوتیژی دژی ژنان دەكرێت

.

ئاژانسی UNFPA  و ئەنجومەنی باڵای كاروباری خانمان  ئامادەكاری بۆ چالاكییەكانی هەڵمەتی نیشتمانی بەرەنگاربوونەوەی توندوتیژی دژی ژنان دەكەن.

 ئەمڕۆ لەكۆبوونەوەیەكی هاوبەشدا لە بارەگای ئەنجومەنی باڵای كاروباری ژنان، ئاژانسیUNFPA و ئەنجومەنی باڵای كاروباری خانمان، ئامادەكارییەكان بۆ چالاكییەكانی هەڵمەتی نیشتمانی بەرەنگاربوونەوەی توندوتیژی دژی ئافرەتان خرانە بەرباس.

پەخشان زەنگەنە ئەمینداری گشتی ئەنجومەنی باڵای كاروباری خانمان بەئامادەبوونی دلێر ئیبراهیم بەڕێوەبەری راگەیاندن و پەیوەندییەكان، پێشوازیان لە شاندێكی ئاژانسیUNFPA  ی سەر بە نەتەوە یەكگرتووەكان  كرد، كە پێكهاتبوو لە د. ئۆرلم سۆنگنیۆ نوێنەری نوێی ئاژانسی ئاژانسیUNFPA  لە عێراق، بەیاوەری ئەژی ئەمین و سەلوا موسا و پامێڵا حوسێن و لیۆنێڵ لافراج  و هیند مومنی.  

   لە دیدارەكەدا پەیوندی هاوبەشی نێوان هەردوولا جەختی لەسەر كرایەوەو ئامادەكارییەكان بۆ چالاكییەكانی هەڵمەتی نیشتمانی بەرەنگاربوونەوەی توندوتیژی دژی ئافرەتان خرانە بەرباس، كە ساڵانە  لەلایەن ئەنجومەنی باڵای كاروباری خانمان و بەسەرپەرشتی راستەوخۆی رێزدار سەرۆكی حكومەتی هەرێمی كوردستان و بە بەشداری وەزارەت و لایەنە پەیوەندیدارەكان و رێكخراوە ناوخۆیی و نێودەوڵەتییەكان، بەشێوەیەكی سەركەوتووانە بەڕێوەدەچێت.

  هەر لە دیدارەكەدا شاندی ئاژانسیUNFPA  ئامادەیی خۆیان دووپاتكردەوە بۆ پاڵپشتیكردنی پرۆژەكانی ئەنجومەنی باڵای كاروباری خانمان، بۆ گەشەپێدانی ڕەوشی ئافرەتان و چۆنیەتی كاركردنی هاوبەش بە ئامانجی گەیشتنی خزمەتگوزارییە پێویستەكان بە ئافرەتان لە رێگەی راهێنان و پەرەپێدانی تواناكان و دروستكردنی سەركردەی لێهاتوو لە ژنان و كچان لە دامەزراوەكانی هەرێمی كوردستاندا.

 هەروەها وەفدی ئاژانسیUNFPA  ی سەر بە نەتەوە یەكگرتووەكان دەستخۆشیان لە هەوڵەكانی ئەنجومەنی باڵای كاروباری خانمان كرد بۆ گەشەپێدانی رەوشی خانمان و بەتایبەتیش ئەو پرۆژانەی پەیوەستن بە  بەتواناسازی ئابووری ژنانەوە.

PUKmedia  تایبەت