قوباد تاڵه‌بانی: سلێمانی سه‌رچاوه‌ی بیری ئازاده‌

.

قوباد تاڵه‌بانی جێگری سه‌رۆكی حكومه‌تی هه‌رێمی كوردستان به‌بۆنه‌ی ساڵیادی دامه‌زراندنی شاری سلێمانی په‌یامێكی بڵاوكردۆته‌وه‌ و ئاماژه‌ی به‌وه‌ كردووه‌ كه‌ سلێمانی هه‌ر له‌ كاتی دروستبوونییه‌وه‌ هاوشانی پێشكه‌وتن و گۆڕانكارییه‌كان هه‌نگاوی ناوه‌.

له‌په‌یامه‌كه‌ی قوباد تاڵه‌بانیدا هاتووه‌ كه‌ سلێمانی له‌ڕووی سیاسییه‌وه‌ شوێنی دروستبوونی زۆرینه‌ی پارت و حزبه‌ جیاوازه‌كان بووه‌ و له‌ڕووی ئه‌ده‌بیشه‌وه‌ جێی شانازییه‌ بۆ هه‌مووان.

 ئه‌مه‌ش ده‌قی په‌یامه‌كه‌ی قوباد تاڵه‌بانی:

ئه‌مڕۆ ڕۆژێكی ئێجگار تایبه‌ته‌، ساڵیادی دروستكردنی سلێمانییه‌كه‌مانه‌، ئه‌و شاره‌ی هه‌ر له‌ دروستبوونییه‌وه‌، هاوشانی پێشكه‌وتن و گۆڕانكارییه‌كان هه‌نگاوی ناوه‌، له‌ گه‌لێك بواردا سه‌رمه‌شق و ده‌ستپێشخه‌ر بووه‌، مێژووه‌ ئێجگار دره‌وشاوه‌كه‌ی له‌ بواری ئه‌ده‌ب و هونه‌ر و ڕۆژنامه‌گه‌ریدا، شانازییه‌ بۆ هه‌مووان. له‌ ڕووی سیاسییه‌شه‌وه‌، شوێنی دروستبوونی زۆرینه‌ی پارت و حیزبه‌ جیاواز و كاریگه‌ره‌كان بووه‌. ئازایه‌تی و ڕۆشنبیری و كولتووری قبوڵكردنی جیاوازی له‌م شاره‌، نموونه‌یه‌كه‌ ده‌بێت چاوی لێ بكرێت و لێوه‌ی فێر ببین. "مام"-یش وه‌كو وه‌فا و پێزانینێك بۆ ئه‌و مێژووه‌ی سلێمانی، ناسناوی "شاره‌ حه‌یاته‌"كه‌ی لێ ناوه‌.

سلێمانی، ته‌مه‌نی ته‌نها (۲۳٤) ساڵه‌، به‌ڵام كولتووره‌ ده‌وڵه‌مه‌نده‌كه‌ی و مێژووه‌ پڕ سه‌روه‌رییه‌كه‌ی به‌راورد ده‌كرێت به‌ شاره‌ گه‌وره‌ و فه‌رهه‌نگییه‌كانی دونیا، زێدی له‌دایكبوون و گه‌وره‌بوون و پێگه‌یشتنی سه‌دان كه‌سایه‌تی له‌بواره‌ جیاجیاكاندا بووه‌ و ده‌یان سه‌ركرده‌ی سیاسیی كوردیش كه‌ جێده‌ستیان به‌سه‌ر هه‌موو مێژووی سیاسیی هاوچه‌رخی كورده‌وه‌ هه‌یه‌، ڕۆڵه‌ی ئه‌م شاره‌ بوون. سه‌رچاوه‌ی بیری ئازاد و كوردایه‌تی و نیشتیمانپه‌روه‌ری لێره‌وه‌ ڕێچكه‌ی گرتووه‌ و به‌ ئامانجیش گه‌یشتووه‌، كه‌سیش گومانی له‌وه‌ نییه‌، گه‌شه‌سه‌ندنه‌ كولتووری و سیاسییه‌كانی كۆمه‌ڵگه‌ی كوردییش به‌بێ سلێمانی، كارێكی دوورده‌ست و ئه‌سته‌مه‌.

ئه‌م شاره‌مان، زۆری پێبه‌خشیوین و قوربانیی زۆریشی داوه‌، هیچ ڕێگه‌یه‌كمان له‌به‌رده‌مدا نییه‌، جگه‌ له‌وه‌ی ده‌بێت له‌ خۆمانی ڕازی بكه‌ین و خزمه‌تی زیاتری بكه‌ین و نه‌هێڵین به‌ربه‌ست له‌به‌رده‌م خه‌ون و خواستی شارنشینه‌كانیدا دروست ببێت، چونكه‌ وزه‌یه‌كی له‌بننه‌هاتووی ژیاندۆستانه‌ی وای هه‌یه‌، كه‌ هیچ كه‌س و لایه‌ن و حیزبێك ناتوانن به‌ر به‌ ئاڕاسته‌ی پێشكه‌وتنی بگرن. من وه‌كو خۆم، له‌ هه‌ر پله‌ و پایه‌ و پۆستێكدا بم، خزمه‌تی ده‌كه‌م. سلێمانی بۆ هه‌موومان بووه‌ و خۆشی ویستووین، بۆیه‌ ئێمه‌یش خۆشمان ده‌وێت و ڕه‌نجی بۆ ده‌ده‌ین.

قوباد تاڵه‌بانی

PUKmedia