ئاماری قوربانیانی ئاگره‌كه‌ی كالیفۆرنیا زیاد ده‌كات

.

به‌ھۆی ئه‌و ئاگره‌ی له‌ دارستانه‌كانی ویلایه‌تی كالیفۆرنیا كه‌وتووه‌ته‌وه‌ ،31 كه‌س گیانیان له‌ده‌ستداوه‌، 228 كه‌سیش بێسه‌روشوێنن و نزیكه‌ی 7 ھه‌زار خانووش و باڵه‌خانه‌ش سووتاون.

ژماره‌ی قوربانیانی ئاگركه‌وتنه‌وه‌كه‌ی ویلایه‌تی كالیفۆرنیا بۆ 31 قوربانی به‌رزبووه‌ته‌وه‌ و به‌پێی راپۆرتی تیمی فریاگوزاریی كالیفۆرنیا، 228 كه‌سیش تا ئێستا چاره‌نووسیان نادیاره‌.

له‌ رۆژی پێنجشه‌ممه‌وه‌ ئاگرێك له‌ سێ ناوچه‌ی ویلایه‌تی كالیفۆرنیا كه‌وتووه‌ته‌وه‌ و تا ئێستا 40 ھه‌زار و 500 ھێكتار زه‌وی سووتاوه‌، تیمه‌كانی ئاگركوژێنه‌وه‌ش توانیویانه‌ له‌ 20%ی ئاگره‌كه‌ بكوژێننه‌وه‌ و كه‌ له‌لایه‌ن زیاتر له‌ 3 ھه‌زار و 200 پیاوی ئاگركوژێنه‌وه‌ ھه‌وڵی كۆنتڕۆڵكردنی ئاگره‌كه‌ ده‌درێت و تا ئێستاش 3 كه‌سیان بریندار بوونه‌.
 
له‌لایه‌ن خۆشیه‌وه‌، دۆناڵد ترامپ سه‌رۆكی ئه‌مریكا له‌ تویتێكدا نیگه‌رانیی خۆی ده‌ربڕیوه‌ و ئاماژه‌ی به‌وه‌ كردووه‌: رووداوه‌كه‌ په‌یوه‌ندیی به‌لاوازیی ئیداره‌ی دارستانه‌كانه‌وه‌ ھه‌یه‌ و ھه‌ڕه‌شه‌ی راگرتنی ھاوكاریی فیدراڵی بۆ ئه‌و ئیداره‌یه‌ كرد، ئه‌وه‌شی ئاشكرا كردووه‌ كه‌ ساڵانه‌ چه‌ندین ملیار دۆلاریان بۆ ته‌رخان ده‌كرێت.

PUKmedia ئاژانسه‌كان