سەرۆک کۆمار بایەخی بوژانەوەی پێگەی ژنان دووپات دەکاتە

.

ئەمڕۆ پێنج شەممە ٢٠١٨/١١/٨ سەرۆک کۆمار دکتۆر بەرهەم ساڵح لە کۆشکی سەلام لە بەغداد پێشوازیکرد لە وەفدێکی تۆڕی ژنانی عيراق، سەرەتا ئەندامانی وەفدەکە بە بۆنەی وەرگرتنی پۆستەکەیەوە پیرۆزباییان پێشکەش بە سەرۆک کۆمار کرد و داوای سەرکەوتنیان بۆ کرد.

‏‎له‌ دیدارەکەدا ئەو ئاڵنگارییانە تاوتوێکرا کە روبەڕووی ژنان دەبنەوە بەهۆی بەرز بونەوەی ئاستی توندوتیژی، بۆ ئەو مه‌به‌سته‌ش باس له‌ پێویستی دانانی بەرنامە و پرۆژەی پاراستنی ژنان كرا كه‌ لە رێی دانانی یاسای گونجاو دێنەدی کە دژی توندوتیژیی خێزانین، هاوکات لە رێی هەموارکردنەوەی ئەو یاسایانه‌وه‌ دەستەبەر دەبن کە جیاوازییان بۆ پێگەی ژنان دروست کردووە.

‏‎لەو بارەیەوە سەرۆک کۆمار پشتیوانی خۆی دەربڕی بۆ هەر پرۆژە یاسایەک کە دەبێتە پاڵپشت بۆ پێگەی ژنان لە ناو کۆمەڵگەدا و بەگژداچونەوەی توندوتیژی خێزانی، هەروەها ئاماژەیکرد بۆ بایەخی هاوبەشیکردن لەگەڵ رێکخراوەکانی کۆمەڵی مەدەنیدا و خۆشکردنی زەمینەیەکی لە بار بۆ بنیاتنانی کۆمەڵگەیەکی تەندروست و پۆزەتیڤ.

سەرۆک بەرهەم جەختی لە کارکردن لە پێناوی جێبەجێکردنی ستراتیژی پلانە نیشتمانییەکان کردەوە کە پەیوەستە بە بوژاندنەوەی رۆڵ و پێگەی ژنانی عيراق و چالاککردنی میکانیزمی گونجاو بۆ جێبەجێکردن و بەدیهێنانی ئامانجەکان.

‏‎لای خۆیانەوە سەرۆک و ئەندامانی وەفدی تۆڕی ژنانی عيراق سوپاسی سەرۆک کۆماریان کرد بۆ رەخساندنی دیدارەکە، کە بە دیدارێکی گرنگ و ئیجابی هەڵیانسەنگاند، داوای سەرکەوتنیان بۆ سەرۆک بەرهەم ساڵح کرد لەو هەوڵانەی دەیگرێتەبەر بۆ پشتگیریکردنی ئازادییە مەدەنییەکان و بنیاتنانەوەی دامەزراوەکانی دەوڵەت و چەسپاندنی ئاڕاستە و روانینی دیموکراسیانەی سەربەست لە عيراقی نوێدا.

PUKmedia راگه‌یاندنی سه‌رۆك كۆماری عیراق