به‌تۆمه‌تی راوكردنی باڵنده‌ی كێوی ژماره‌یه‌ك سه‌رپێچیكار ده‌ستگیرده‌كرێن

.

به‌تۆمه‌تی راوكردنی باڵنده‌ی كێوی له‌سنووری قه‌زای چه‌مچه‌ماڵ، پۆلیسی دارستان و ژینگه‌ی پارێزگای سلێمانی  3 تۆمه‌تبار ده‌ستگیر ده‌كه‌ن و  ده‌ست به‌سه‌ر كه‌ل و په‌ل و پێداویستییه‌كانیشیاندا ده‌گرن.

له‌وباره‌یه‌وه‌  عمید هێمن كمرخان ئه‌فندی  به‌ڕێوه‌به‌ری راگه‌یاندنی پۆلیسی دارستان و ژینگه‌ی سلێمانی رایگه‌یاند: له‌پێناو پارێزگاریكردن له‌سروشت و ژینگه‌ی كوردستان و پاراستنی ئاژه‌ڵ و باڵنده‌ كێویه‌كان مه‌فره‌زه‌كانمان به‌شه‌و و ڕۆژ له‌ئاماده‌باشیدان،  هه‌ر له‌ چوارچێوه‌یه‌دا مه‌فره‌زه‌یه‌كی بنكه‌ی پۆلیسی دارستان و ژینگه‌ی ته‌كیه‌ سه‌ر به‌ به‌شی پۆلیسی دارستان و ژینگه‌ی چه‌مچه‌ماڵ، له‌ ده‌رچونێكی مه‌یدانیاندا بۆ سه‌ر شاخی قوله‌ ڕه‌ش  توانیان 3 سه‌رپێچیكار ده‌ستگیربكه‌ن كه‌ سه‌رقاڵی راوكردنی باڵنده‌ی كێویی بوون.

وتیشی:  له‌گه‌ڵ ده‌ستگیركردنیاندا ده‌ستگیراوه‌ به‌سه‌ر 2 فیشه‌ك و چه‌كێكی تاپڕ و لایتێكی ده‌ستی كه‌بۆ راوكردن به‌كاریان هێنابوو، له‌گه‌ڵ 1باڵنده‌ی زیندوو له‌جۆری سوێسكه‌ و  باڵنده‌یه‌كی راوكراو.

عمید هێمن وتیشی: سه‌رپێچیكاران وكه‌ره‌سته‌ ده‌ست به‌سه‌راگیراوه‌كان راده‌ستی دادگا كراون به‌مه‌به‌ستی لێپێچینه‌وه‌ی یاسایی  و داواشیكرد،  له‌پێناو پاراستنی سروشتی كوردستان، پێویسته‌ هه‌مووان  پابه‌ندبین به‌ڕێنمایه‌ كانی پۆلیسی دارستان.

PUKmedia راگه‌یاندنی پۆلیسی ژینگه‌ی سلێمانی