ئه‌ڵمانییه‌كان له‌ وڵاته‌كه‌یاندا هه‌ست به‌نامۆیی ده‌كه‌ن

.

به‌پێی توێژینه‌وه‌یه‌كی زانستی زانكۆی لایبزیك-ی ئه‌ڵمانیا كه‌ماوه‌یه‌كی زۆر كاریان له‌سه‌ركردوه‌ له‌هه‌ر سێ ئه‌ڵمانیه‌ك یه‌ك ئه‌ڵمان هه‌ڵوێستی دژبه‌ كۆچبه‌رانیان هه‌یه‌ و هه‌ڵوێسته‌كانیان پێشوازی لێكراوه‌و له‌به‌شی رۆژهه‌ڵاتیشی له‌هه‌ر دووكه‌س یه‌كێك پێیانوایه‌، بیانیه‌كان ده‌وڵه‌تی خۆشگوزه‌رانی ئه‌ڵمانیا بۆخۆیان به‌كاردێنن، كه‌ده‌كاته‌ نزیكه‌ی له‌سه‌دا 47.1% به‌پێی ئه‌و توێژینه‌وه‌یه‌ له‌هه‌ر سێ ئه‌ڵمان یه‌كێكیان له‌گه‌ڵ ئه‌وه‌دان بیانیه‌كان بگه‌ڕێننه‌وه‌ بۆ وڵاتی خۆیان.

كه‌ناڵی دووی ئه‌ڵمانیا به‌پشت به‌ستن به‌و توێژینه‌وه‌یه‌ نوسیوویه‌تی بۆچونی راستڕه‌وه‌ توندڕه‌وه‌كان دیاره‌، له‌گه‌ڵ ئه‌وه‌شدا هه‌ڵوێسته‌كانی دژ به‌پێكه‌وه‌ژیان به‌به‌راورد له‌گه‌ڵ ساڵی 2016دا به‌تایبه‌تی به‌رامبه‌ر به‌موسوڵمانان كه‌میكردوه‌.

له‌وتوێژینه‌وه‌یه‌دا كه‌ئه‌مڕۆ چوارشه‌ممه‌ 8 ی كانونی یه‌كه‌می 2018 له‌به‌رلین بڵاوكراوه‌ته‌وه‌  نیوه‌ی دانیشتوانی  سه‌رتاسه‌ری ئه‌ڵمانیا به‌ڕێژه‌ی له‌سه‌دا 55% له‌سه‌ر ئه‌و ده‌سته‌واژه‌یه‌ كۆكن كه‌ده‌ڵێن له‌به‌ر زۆری موسولمانان هه‌ندێكجار له‌وڵاته‌كه‌ی خۆتدا هه‌ست به‌نامۆیی ده‌كه‌یت و كاتێكیش به‌ر له‌دوو ساڵ توێژه‌ره‌كان ئه‌و پرسیاره‌یان وروژاند له‌سه‌دا 50% و له‌2014 شدا له‌سه‌دا 43 % هه‌مان وه‌ڵامیان ده‌ستكه‌وتوو پێیانوابووه‌ له‌وڵاتی خۆیاندا له‌به‌ر موسولمانان هه‌ست به‌ غه‌ریبی ده‌كه‌ن ئه‌وه‌ به‌چاوپۆشین له‌كه‌مبونه‌وه‌یه‌كی رێژه‌یی دژایه‌تی به‌كۆچبه‌ران.

به‌پێی ئه‌و توێژینه‌وه‌یه‌ 13.1% پێیانوایه‌ پارتی ئه‌ڵته‌رناتیفی ڕاستره‌و له‌گه‌ڵ ده‌سه‌ڵاتی دیكتاتۆریانه‌ی راستڕه‌ودایه‌ و جیاوازی زۆر گه‌وره‌ له‌نێوان رۆژهه‌ڵات و رۆژئاوای ئه‌ڵمانیا وه‌ده‌ركه‌وتووه‌ .

PUKmedia شیهاب عوسمان- ئه‌ڵمانیا