ئەنجومەنی ناوەندی: یەكێتی خاوەن پێگەو سەنگی مێژوییە

.

ئەمرۆ چوار شەممە 7-11-2018 هەڤاڵانی سكرتارییەت و لێپرسراوی كۆمسیۆنی پەیوەندییەكان و ژمارەیەك لە ئەندامانی ئەنجومەنی ناوەندی پێشوازییان لە وەفدێكی رۆژئاوای كوردستان كرد كە پێكهاتبوون جیهان خەلیل سەرۆكی كۆنگرەی ستار و جاویدان حەسەن و خەولە مستەفا نوێنەری خۆبەرێوەبەری دیموكراتی لە هەرێم و سلێمان عەرەب نوێنەری پارتی یەكێتی دیموكراتی (PYD) لە هەرێمی كوردستان.

سەرەتا زوبێر عوسمان جێگری سكرتێری ئەنجومەنی ناوەندی بە ناوی ئەنجومەنی ناوەندییەوە بەخێرهاتنی وەفدی میوانی كرد و تیشكی خستەر سەر دۆخی ئێستای كوردستان و پێكهێنانی حكومەت و گۆرانكارییەكانی ناوچەكە و لەوبارەوە وتی: یەكێتی نیشتیمانی كوردستان بەپێی ئیستیحقاقی هەڵبژاردن و خاوەن پێگەو سەنگی مێژویی و حكومڕانیەوە لەگەڵ پارتی دیموكراتی كوردستان و لایەنەكانیتردا كابینەی نوێ پێكدەهێنێرێ و بەشداریكردنیشی بۆ خزمەتكردنی زیاتری كۆمەڵانی خەڵكی كوردستان و جێبەجێكردنی بەرنامە ستراتیژییە نیشتیمانی و نەتەوەییەكانە.

وتیشی: یەكێتی درێژە بە رێبازی هەڤاڵ مام جەلال دەدات كە پشتگیری لە خەباتی ڕەوای ئاشتیانە و دیموكراتیانەی پارچەكانیتری كوردستانە و هەر لەسەرەتای دامەزراندییەوە پشتیوانی پارچەكانیتر بووە، سەرۆك مام جەلال لەساڵی 1993 رۆڵی نێوەندگیری لە راگەیاندنی ئاگربەستی نێوان دەوڵەتی توركیا و پارتی كرێكارانی كوردستاندا گێراوە، یەكێتی بەهەمان شێوە پشتیوانی خەباتی دیموكراتیانەی رەوای گەلەكەمان بووە و وەك ئەركێكی نیشتیمانی نەتەوەیی هاوكاری مادی و لۆجستی رۆژئاوای كردوە لەشەری دژی تیرۆریستانی داعشدا.

لەبەشێكیتری دیدارەكەدا هەڤاڵانی ئەنجومەنی ناوەندی وێرای خستەڕووی رۆڵی وڵاتانی زلهێزی جیهان و ئیقلیمی لە ناوچەكە و شەری بردنەوەی زۆرترین بەرژەوەندی نیگەرانی خۆیان لەدۆخی عەفرین دەربڕی و دوپاتیشیان كردەوە كە قۆناغی ئێستای خەبات لە سوریا قۆناغی دیبلۆماسیە و پێویستە كوردانی رۆژئاوا خۆیان بۆ ئەو جۆرە خەباتە ئامادە بكەن.

لای خۆشیەوە جیهان خەلیل نوێنەری كۆنگرەی ستار سوپاسی ئەنجومەنی ناوەندی كرد بۆ ئەو پێشوازییە گەرمە و هەڵوێستی یەكێتی نیشتیمانی كوردستان بۆ پشتیگریكردنی پارچەكانیتری كوردستان بە تایبەتی باكور و رۆژئاوای كوردستان بەگرنگ وەسف كرد و لەوبارەوە وتی: هەڵوێستە نەتەوەیی و نیشتیمانی و هاوكارییەكانی یەكێتیی بۆ رۆژئاوا لەلای حزب و لایەنە سیاسیەكان و خەڵك و سەرجەم چین توێژەكانی كوردستانی رۆژئاوا جێی فەخر و شانازیین، لەوەیش مەزنتر ئەوەیە وێرای چڕكردنەوەی فشارەكان لەسەر یەكێتی بەڵام لەسەر هەمان سیاسەت و نەهجی خۆی بەردەوامە.

وتیشی: لەم قۆناغەدا یەكریزی كورد لەپارچەكانیتری كوردستان زۆر گرنگە و پێویستە هەوڵەكانمان بۆ بەستنی كۆنگرەی نەتەوەی بە بەشداری سەرجەم حزب و لایەنە سیاسیەكان و لابردنی بەربەستەكانی چڕتر بكەینەوە، یەك وتاری و یەك هەڵوێستی لە ناوخۆی كوردان و گرتنەبەری رێگای دیبلۆماسی لەگەڵ وڵاتانی ئیقلیمی و جیهانی ئامرازی بەهێزن بۆ پوچەڵكردنەوەی پیلانی نەیار و دوژمانی كورد.

لەبەشێكیتری دیدارەكەدا ئەندامانی وەفدی رۆژئاوا خۆشحاڵی خۆیان بۆ سەركەوتنەكانی یەكێتی لە هەڵبژاردنەكان و هەڵبژاردنی د.بەرهەم ساڵح بۆ پۆستی سەرۆك كۆمار دەربڕی كە بەهێزبوونی یەكێتی ئەركی زیاتری دەخاتە سەرشان و بەهێزبوونی دیموكراسی باشوری كوردستان و بەهێزی حزب و لایەنەكانی پارچەكانیتری كوردستانە.

لە كۆتایشدا هەردوولا جەختیان لەسەر یەكریزی كورد و بە ئەنجام گەیاندنی خۆبەرێوەبەری كانتۆنەكانی رۆژئاوا و بەستنی كۆنگرەی نەتەوەیی و بەهێزكردنی لۆبی كورد لە وڵاتانی دەرەوە كردەوە.

PUKmedia  راگەیاندنی ئەنجومەنی ناوەندی یەكێتی