قسه‌كانی مه‌لا یاسین به‌هه‌ند وه‌ربگرن

.

زیاتر له‌ 7 ساڵه‌ وه‌ك هاوڕێ په‌یوه‌ندییه‌كی نزیك و به‌رده‌وامم له‌گه‌ڵ مه‌لا یاسین به‌ڕێوه‌به‌ری كۆمپانیاكانی به‌ڕێز و جێگرو وته‌بێژی یه‌كێتی وه‌به‌رهێنه‌رانی كوردستان هه‌یه‌، به‌حكومی كاره‌كه‌شم هه‌میشه‌ به‌ركه‌وتنم له‌گه‌ڵ كاره‌كانی و لێدوانه‌كانیدا هه‌بووه‌، له‌ماوه‌ی 7 ساڵی رابردووداو هه‌م وه‌ك هاوڕێ و هه‌م وه‌ك پیشه‌كه‌ش شاهیدی ئه‌وه‌ ده‌ده‌م زۆرێك له‌و شتانه‌ی كه‌ پێشبینی بۆ كردووه‌ یاخود باسی لێوه‌كردووه‌ له‌كاتی خۆیدا به‌و جۆره‌ كه‌وتۆته‌وه‌ كه‌ ئه‌م پیاوه‌ باسی لێوه‌كردووه‌،  ئیتر له‌هه‌رزان بوونی یه‌كه‌كانی نیشته‌جێبوون، پێشنیاره‌كانی بۆ كێبركێكردن و نزمكردنه‌وه‌ی نرخی سوته‌مه‌نی، گرنگییه‌كانی دروستكردنی شاره‌ پیشه‌سازییه‌كان، ده‌ستپێشخه‌ریكردن بۆ هاوكاریكردنی فه‌رمانبه‌ران، ده‌ستخستنه‌ سه‌ر برینه‌ قوڵه‌كانی كه‌رتی وه‌به‌رهێنان و (دۆزینه‌وه‌ی مۆته‌كه‌و ڤایرۆسه‌كانی بواره‌كه‌)و ده‌ستنیشانكردنی چۆنیه‌تی چاره‌سه‌ركردنیان، تاده‌گاته‌ دوا پێشنیارو خوێندنه‌وه‌كانی بۆ ره‌وشی هه‌رێمی كوردستان به‌گشتی و پارێزگای سلێمانی به‌تایبه‌تی له‌دوای جێبه‌جێكردنی سزاكانی ئه‌مریكا بۆ سه‌ر ئێران، كه‌ سبه‌ینێ ده‌ست پێده‌كات.

من ئابوریناس نیم و هیچیش له‌ئابوری و جووڵه‌ی بازرگانی نازانم، به‌ڵام ئه‌وه‌نده‌ ده‌زانم مه‌لا یاسین به‌حوكمی ئه‌زمونی كاركردن و به‌پێی ئه‌و په‌یوه‌ندییانه‌ی له‌م چه‌ند ساڵه‌ی رابردوودا وه‌ك جێگری سه‌رۆكی یه‌كێتی وه‌به‌رهێنه‌ران دروستی كردووه‌ هه‌ستی به‌و مه‌ترسییانه‌ كردووه‌ كه‌ له‌سبه‌ینێوه‌ ده‌شێت له‌م ناوچه‌یه‌ سه‌رهه‌ڵبده‌ن، بۆیه‌ پێشنیارم بۆ بڕیاربه‌ده‌ستانی سێكته‌ری ئابوری له‌حكومه‌تی هه‌رێم  به‌گشتی و لێپرسراوانی سنوری پارێزگاكانی سلێمانی و هه‌ڵه‌بجه‌و هه‌ردوو ئیداره‌ی راپه‌رین و گه‌رمیان ئه‌وه‌یه‌، پێشنیاره‌كانی مه‌لا یاسین بۆ چۆنیه‌تی چاره‌سه‌ركردنی كاریگه‌رییه‌ نه‌رێنییه‌كانی سزاكانی سه‌ر ئێران به‌هه‌ند وه‌ربگرن و به‌جدی كاری له‌سه‌ر بكه‌ن، به‌تایبه‌تی له‌كڕین و هاورده‌ كردنی هه‌ندێك له‌كارگه‌كان و دروستكردنی پێداویستییه‌كان له‌ناوخۆی هه‌رێمدا.

له‌كه‌سانی باڵای ئه‌م حكومه‌ته‌و هه‌ندێك له‌لایه‌نه‌ سیاسییه‌كانیشم بیستووه‌ كه‌ بۆچوونه‌كان و سه‌رنجه‌كانی مه‌لا یاسین له‌سێكته‌ری ئابوری و وه‌به‌هێناندا بۆ هه‌رێمی كوردستان زۆرینه‌ی جاره‌كان جێگه‌ی خۆیان گرتووه‌، بۆیه‌ ئه‌م جاره‌ش ده‌مه‌وێت بۆچوونه‌كانی ئه‌م پیاوه‌ به‌هه‌ند وه‌ربگرن، وه‌ك ده‌ڵێن (پرسیار له‌خه‌ڵكی به‌ئه‌زمون بكه‌ نه‌ك كه‌سی دانا) و ئه‌وه‌ی من تێی گه‌یشتوم ئه‌م كه‌سه‌ له‌خۆیه‌وه‌ شتی نه‌وتووه‌و نه‌یكردووه‌ هه‌تا به‌ته‌واوی له‌ئه‌نجامه‌كه‌ی دڵنیانه‌بووبێت.
تكاشم وایه‌ ئه‌م پۆسته‌م وه‌ك سه‌رنجێكی رۆژنامه‌وانی لێ وه‌ربگیرێت نه‌ك لێكدانه‌وه‌ی كه‌سی بۆ بكرێت.

نوسینی / هه‌ڵگورد جه‌لال

PUKmedia