رۆڵی دایه‌نگه‌كان له‌ په‌روه‌رده‌كردنی منداڵ

.

دانانی منداڵ له‌ دایه‌نگه‌و ره‌وزه‌كان ته‌نها سودی بۆ ئه‌و دایكانه‌ نییه‌ كه‌ له‌ده‌ره‌وه‌ كار ده‌كه‌ن، به‌ڵكو سودی بۆ منداڵ و په‌روه‌رده‌كردنی منداڵه‌كه‌ش هه‌یه‌ بۆیه‌ پێویسته‌ منداڵان له‌ ته‌مه‌نی 1-5 ساڵ له‌ حه‌زانه‌ دابنرێن.

بۆ ئه‌و مه‌به‌سته‌ش ماڵپه‌ری سیدتی چاوپێكه‌وتنی له‌گه‌ڵ تركی خان راوێژكاری خێزانی و په‌روه‌رده‌ی منداڵاندا كردووه‌.

سه‌باره‌ت به‌ رۆڵی دایه‌نگه‌ له‌ په‌روه‌رده‌كردنی منداڵان تركی خان ده‌ڵێت: زۆرێك له‌ دایك و باوكه‌كان نازانن دایه‌نگه‌ چه‌ند گرنگه‌ بۆ په‌روه‌رده‌ كردنی منداڵ و ئاماده‌كردنی بۆ ناو كۆمه‌ڵگه‌، به‌پێچه‌وانه‌وه‌ هه‌ندێك دایك و باوك له‌وه‌ ده‌ترسن منداڵه‌كانیان له‌ دایه‌نگه‌كاندا په‌روه‌رده‌بن.

ئه‌و راوێژكاره‌ ده‌شڵێت: په‌روه‌رده‌كردنی منداڵ وه‌ك نه‌خشی سه‌ر به‌رد وایه‌، هه‌رچه‌ند هه‌ڵكۆڵین له‌سه‌ر به‌رد ئه‌سته‌م و گرانه‌، به‌ڵام بۆ ماوه‌یه‌كی زۆر ده‌مێنێته‌وه‌ سه‌ره‌ڕای جوانیه‌كه‌ی، به‌هه‌مان شێوه‌یه‌ گرانه‌ منداڵیش فێری په‌روه‌رده‌ و زانست بكه‌یت به‌ڵام كه‌ فێریش بوو ئیتر ئه‌و په‌روه‌رده‌و زانسته‌ تا هه‌تایه‌ ره‌نگدانه‌وه‌ی له‌ كاره‌كانیدا ده‌بێت.

هه‌رچه‌نده‌ زۆربه‌ی دایك و باوكان و به‌شێك له‌ كۆمه‌ڵگه‌ش دایه‌نگه‌ به‌پێویست نازانن، به‌ڵام له‌ راستیدا په‌روه‌رده‌كردنی منداڵ له‌ دایه‌نگه‌كاندا زۆر گرنگه‌ چونكه‌ زوتر له‌گه‌ڵ كۆمه‌ڵگه‌دا تێكه‌ڵده‌بێت و زیاتر متمانه‌ به‌خۆیده‌كات.

سه‌باره‌ت به‌ ته‌مه‌نی منداڵ بۆ چونه‌ دایه‌نگه‌ تركی خان وتی: گرنگه‌ ته‌مه‌نی منداڵ بۆ دایه‌نگه‌ له‌ یه‌ك ساڵ و نیو  بۆ 2 ساڵ ، به‌ڵام ده‌بێت 3 سه‌عات بمێنێته‌وه‌ چونكه‌ توانای منداڵ له‌و ته‌مه‌نه‌دا هه‌ر ئه‌وه‌نده‌یه‌ به‌ڵام، دوای ته‌مه‌نی 3 ساڵی ده‌توانێت له‌به‌یانیه‌وه‌ تا سه‌عات 12 ی نیوه‌ڕۆ له‌ دایه‌نگه‌ بمێنێته‌وه‌.

گرنگترین سوده‌كانی دایه‌نگه‌ بۆ منداڵان
-یارمه‌تی منداڵ ده‌دات په‌یوه‌ستبێت به‌ كاته‌وه‌.

-په‌یوه‌ندییه‌ كۆمه‌ڵایه‌تییه‌كانی منداڵ به‌هێز ده‌كات.

-دوریده‌خاته‌وه‌ له‌ سه‌یركردنی ته‌له‌فزیۆن و یارییه‌ ئه‌لیكترۆنیه‌كان.

پێویسته‌ دایك و باوكان بۆ هه‌ڵبژاردنی دایه‌نگه‌یه‌كی باش ره‌چاوی ئه‌م خاڵانه‌ بكه‌ن:
-دایك و باوك سه‌ردانی دایه‌نگه‌كه‌ بكه‌ن بزانن له‌روی بیناو خزمه‌تگوزاریه‌وه‌ چۆنه‌.

-دایكی ئازیز ده‌بێت بزانێت ئه‌و كاته‌ی منداڵه‌كه‌ی له‌ دایه‌نگه‌ به‌سه‌ریده‌بات بۆ فێربوونه‌ یان ته‌نها بۆ كات به‌سه‌ربردنه‌.

-نابێت دوربێت، باشتر وایه‌ دوری دایه‌نگه‌كه‌و ماڵه‌وه‌ له‌ 10-15 خوله‌ك زیاتر نه‌بێت.

PUKmedia و/ ژینه‌ر محه‌مه‌د
س/ سیدتی