خێراترین رێگا بۆ كۆتایی هێنان به‌ خاڵه‌ ره‌شه‌كانی پێست

.

دروستبوونی خاڵه‌ ره‌شه‌كان (زیوان) یه‌كێكه‌ له‌ گرفته‌كانی پێست، كه‌ دیمه‌نێكی نه‌خوازراو ده‌دات به‌ روخسار، بێگومان كۆمه‌ڵێك هۆكاری هه‌یه‌ واده‌كات ئه‌و خاڵانه‌ له‌سه‌ر لوت و روخسار ده‌ركه‌ون كه‌ ئه‌مانه‌ن:

-هۆكاره‌ بۆماوه‌ییه‌كان كاریگه‌ریه‌كی یه‌كجار زۆری هه‌یه‌ له‌سه‌ر ده‌ركه‌وتنی خاڵه‌ ره‌شه‌كانی پێست.
-پێستی چه‌ور به‌ هۆكارێكی دیكه‌ی ده‌ركه‌وتنی خاڵه‌ ره‌شه‌كان داده‌نرێت به‌هۆی ئه‌وه‌ی به‌رده‌وام پێست چه‌وری ده‌رده‌دات.
-هه‌ندێك جار تێكچوون یان گۆڕانكاری له‌ هۆرمۆنه‌كان هۆكاره‌ بۆ ده‌ركه‌وتنی ئه‌و خاڵانه‌.
-به‌كارهێنانی ئه‌و به‌رهه‌مه‌ زه‌یتییانه‌ی كه‌ گونجاو نین له‌ گه‌ڵ جۆری پێست.
-زۆر خواردنی شه‌كر و شیرینییه‌ ده‌ستكرده‌كان رێگه‌ خۆشكه‌ره‌ بۆ دروستبوونی خاڵی ره‌ش.
-شێداركردنه‌وه‌ بۆ پێست به‌دڵنیاییه‌وه‌ گرنگه‌، به‌ڵام زیاده‌ ره‌ویكردن له‌  به‌كارهێنانی كرێمه‌ شێداركه‌ره‌روه‌كان زیان به‌پێست ده‌گه‌یه‌نێت و ئه‌و خاڵه‌ ره‌شانه‌ له‌سه‌ر روخسار ده‌رده‌خات.

چه‌ند رێگایه‌ك بۆ رزگاربوون له‌ خاڵه‌ ره‌شه‌كانی پێست:

-پێویسته‌ پێستت زیاتر له‌ جارێك بشۆیت له‌ رۆژێكدا، له‌به‌ر ئه‌وه‌ی ئه‌و شتنه‌ یارمه‌تی ده‌ره‌ بۆ لابردنی زه‌یته‌ ده‌ردراوه‌كانی پێست، پێویستیشه‌ سابوون یان ئه‌و  پاككه‌ره‌وه‌یه‌ی به‌كاریده‌هێنیت گونجاوبێت له‌گه‌ڵ جۆری پێسته‌كه‌ت.
-تازه‌كردنه‌وه‌ی پێست (تقشیر) هۆكارێكی كاریگه‌ره‌ بۆ كۆتایی هێنان به‌ خاڵه‌ ره‌شه‌كانی روخسار و رێگری ده‌كات له‌ ده‌ركه‌وتنیشیان.
-مه‌ساجكردنی روخسار به‌شێوه‌یه‌كی بازنه‌یی به‌به‌كارهێنانی زه‌یتێكی گونجاو بۆ پێستت. 
-ئاشكرایه‌ پێكهاته‌ سروشتییه‌كان كاریگه‌ری خێرایان هه‌یه‌ له‌ سه‌ر پێست به‌ گشتی و پێستی روخسار به‌تایبه‌تی، بۆیه‌ بۆ پاككردنه‌وه‌ی پێستی روخساریش ده‌توانرێت په‌نا ببرێته‌ به‌ر به‌كارهێنانی پێكهاته‌ سروشتییه‌كان.

سێ پێكهاته‌ی سروشتی بۆ كۆتایی هێنان به‌ خاڵه‌ ره‌شه‌كانی سه‌رلوت و روخسار به‌ كه‌مترین كات.

1-سۆدای نان: چوار كه‌وچك له‌ سۆدای نان تێكه‌ڵی یه‌ك كه‌وچكی گه‌وره‌ ئاوبكه‌، هه‌موو پێكهاته‌كان به‌باشی تێكه‌ڵ به‌یه‌كتر بكه‌ تا وه‌ك هه‌ویرێكی خه‌ستێ لێدێت، بیده‌ له‌ پێستی روخسارت و بۆ ماوه‌ی 20 ده‌قیقه‌ پێوه‌ی بهێڵه‌ره‌وه‌ و دواتر به‌ ئاوی سارد بیشۆ.

2-هه‌نگوین و سركه‌ی سێو: روخسارت به‌ ئاوی شله‌تێن بشۆ و لوتت به‌ هه‌نگوین مه‌ساج بكه‌ بۆ ماوه‌ی 10 ده‌قیقه‌ پێوه‌ی بهێڵه‌ره‌وه‌، دواتر به‌ ئاوی سارد بیشۆ، پاشان له‌ قاپێكدا كه‌مێك سركه‌ی سێو و ئاو تێكه‌ڵبكه‌ و به‌ پارچه‌یه‌ك لۆكه‌ بیده‌ له‌ پێستی روخسارت و دواتر به‌ ئاوی سارد بیشۆ.
زۆر گرنگه‌ ئه‌م كرداره‌ هه‌فته‌ی سێ جار دووباره‌ بكه‌یته‌وه‌ تا كۆتایی به‌ خاڵه‌ ره‌شه‌كانی سه‌ر پێستت ده‌هێنیت.

3-زه‌یتی گه‌ڵای چا: بۆ ئه‌م گیراوه‌یه‌ پێویستمان به‌ زه‌یتی گه‌ڵای چا و كه‌مێك ئاوی كانزای هه‌یه‌، سه‌ره‌تا روخسارت به‌ ئاو لۆكه‌ ده‌سڕیته‌وه‌ و چه‌وری سه‌ر لوتت لاده‌به‌یت، دواتر زه‌یتی گه‌ڵای چاكه‌ی لێده‌ده‌یت و به‌ ئاوی سارد ده‌یشۆیت.

4- ئاوی لیمۆ: ئاوی لیمۆ یارمه‌تی لابردنی چه‌وری پێست ده‌دات و به‌كارهێنانی دورت ده‌خاته‌وه‌ له‌ ده‌ركه‌وتنی خاڵه‌ ره‌شه‌كان، كه‌مێك ئاوی لیمۆ و ئاو تێكه‌ڵ ده‌كه‌یت و به‌ پارچه‌یه‌ك لۆكه‌ی خاوێن سه‌ر لوتی پێ ده‌سڕیته‌وه‌ و بۆ ماوه‌ی 10 ده‌قیقه‌ به‌جێی ده‌هێڵیت و دواتر به‌ ئاوی سارد ده‌یشۆیت.

4 ئامۆژگاری بۆ رێگریكردن له‌ ده‌ركه‌وتنی حاڵه‌ ره‌شه‌كانی روخسار.

-به‌كارهێنانی به‌رهه‌مه‌ جوانكاریه‌كان به‌شێوه‌یه‌ك له‌گه‌ڵ پێستی روخسارتدا بگونجێت و زه‌یتی تێدا نه‌بێت.
-شتنی روخسار پاككردنه‌وه‌ی به‌ پێی وه‌رزه‌كان و كه‌ش و هه‌وا.
-به‌كارهێنانی كرێمی دژه‌ خۆر بۆ پارێزگاریكردن له‌ تیشكی خۆر.
-پاككردنه‌وه‌ی روخسار له‌ ماكیاژ زۆر به‌باشی، به‌تایبه‌تی پێش نووستن.

PUKmedia س/ yasmina
و/ ژینه‌ر محه‌مه‌د