بەڤیدیۆ.. قوباد تاڵەبانی: كاتی دەستپێكردنی كارە قورسەكەیە

.

قوباد تاڵەبانی رایدەگەیەنێت: دەنگەكانتان ئەمانەتێكەو پارێزراوەو بەكاری دەهێنین بۆ ئەوەی بەهێزی ئێوەوە خزمەتی زیاترتان پێشكەش بكەین، دەشڵێت: دەبێت كارە قورسەكە دەستپێبكەین كە خزمەتكردنەو پێویستیشە هەموو ناكۆكییە سیاسییەكان وەلاوە بنێین و كار بۆ یەكڕیزی نێو ماڵی كورد بكەین.

قوباد تاڵەبانی سەرۆكی لیستی 105ی یەكێتیی نیشتمانیی كوردستان دوای راگەیاندنی ئەنجامەكانی هەڵبژاردن لەلایەن كۆمسیۆنەوە پەیامێكی ئاڕاستەی دەنگدەران و خەڵكی كوردستان كردو رایگەیاند: هاونیشتمانیانی خۆشەویست ئەمكاتەتان باش، دوای راگەیاندنی ئەنجامەكانی هەڵبژاردن ویستم لەناخی دڵمەوە سوپاسی یەكە بەیەكەی ئێوە بكەم، چ بۆ بەشداریكردن لەپرۆسەی هەڵبژاردن، چ بەپێدانی دەنگ و متمانەتان بە لیستی 105 ی یەكێتیی نیشتمانیی كوردستان و بەندەی موخڵیستان، دەشڵێت: شەرەفێكی گەورەیە بۆم توانیبێتم ببمە جێی متمانەی بەشێكی زۆرتان كە دەنگتان پێداوم و دەنگدان بە لیستی 105 ی یەكێتی داوە.

قوباد تاڵەبانی، راشیگەیاند: دڵنیاتان دەكەمەوە كە ئەم دەنگەتان وەك ئەمانەتێك لای ئێمە پارێزراوە و بەكاری دەهێنین بۆ ئەوەی بەهێزی ئێوەوە خزمەتی زیاترتان پێشكەش بكەین.

وتیشی: ئێستا كە پرۆسەی بانگەشە كۆتایی هاتوەو دەبێت كارە قورسەكە دەستپێبكەین، كە خزمەتكردنی كۆمەڵانی خەڵكی كوردستانە، بۆیە پێویستە هەموو ناكۆكییە سیاسییەكان وەلاوە بنێین و كار بۆ یەكڕیزی نێو ماڵی كورد بكەین، لەناو حكومەت و پەرلەمان باشترین خزمەت بەخەڵكی كوردستان بكەین، ئەمەش پێویستی بەپێكەوە كاركردن و هەماهەنگی و وەلانانی ناكۆكی و ململانێ سیاسییەكان و پێكەوە كاركردنە لە پێناوی بەرژەوەندییە گشتییەكان.

لەبەشێكی تری پەیامەكەیدا، دەڵێت: ئەركێكی قورس لەبەردەم پەرلەمانی داهاتوو هەیە، كێشەی گەورە لەبەردەم حكومەتی داهاتوو دەبێت، بۆ تێپەڕبون و زاڵبون بەسەر ئەم كێشەو تەحەدایانە پێویستمان بە یەكڕیزی نیشتمانی دەبێت، پێویستمان بە پێكەوە كاركردن دەبێت.

رونیشیكردەوە: لەهەر شوێنێكبم دڵنیاتان دەكەمەوە هەر قوبادەكەی خۆتان دەبم، خەبات دەكەم لە پێناو بەدەستهێنانی ئارامی و زیاتكردنی هەلی كار و باشكردنی خزمەتگوزارییەكان.

بەپێی ئەنجامە راگەیەنراوەكانی كۆمسیۆن لەهەڵبژاردنی 30ی ئەیلولی پەرلەمانی كوردستاندا قوباد تاڵەبانی لەسەر ئاستی هەرێمی كوردستان بە بەدەستهێنانی 182 هەزار و 551 دەنگ زۆرترین دەنگی هێناوەو لەپێش هەموو سەرۆكی لیستی لایەنەكانی دیكەوەیە.

PUKmedia تایبەت 

لینكی یارمەتیدەر بۆ بینینی ڤیدیۆیەكە