سعودیه‌ دان به‌كوشتنی خاشقچی داده‌نێت

.

ته‌له‌فزیۆنی ئه‌لجه‌زیره‌ رایده‌گه‌یه‌نێت، كه‌ به‌رپرسێكی دادگای گشتی توركیا رایگه‌یاندووه‌، لێكۆله‌ره‌وانی تایبه‌ت به‌ دۆسێی خاشقچی له‌ كۆنسوڵخانه‌ی سعودیه‌ چه‌ند به‌ڵگه‌یه‌كیان ده‌ست كه‌وتووه‌ كه‌ ئه‌گه‌ری كوشتنی خاشقی زیاتر ده‌كات.

تیمی لێكۆڵه‌ره‌وان، دوێنێ ئێواره‌ چوونه‌ته‌ ناو بینای كونسوڵخانه‌ی سعودیه‌ له‌ ئه‌سته‌نبول و ده‌ستیان به‌ لێكۆڵینه‌وه‌ كردووه‌، به‌پێی ئاژانسه‌ ھه‌واڵییه‌كان تیمه‌كه‌ ئه‌مڕۆ به‌یانی كۆتاییان به‌ كاره‌كانیان ھێناوه‌.

سه‌رچاوه‌یه‌كیش له‌ دادگای گشتی توركیا به‌ ته‌له‌فزیۆنی ئه‌لجه‌زیره‌ی وتووه‌، كه‌ تیمه‌كه‌ به‌ڵگه‌ی ئه‌وه‌یان له‌به‌ر ده‌سته‌ كه‌ جه‌مال خاشقچی رۆژنامه‌نووسی سعودی كوژرابێت.

به‌گوێره‌ی هه‌واڵه‌كه‌، راپۆرته‌كه‌ له‌ قۆناغی ئاماده‌كردندایه‌ و تێیدا ئاماژه‌ به‌وه‌ كراوه‌ كه‌ لێكۆڵینه‌وه‌ی خاشقچی نهێنیی بووه‌ و هه‌ندێ كه‌س له‌ رووداوه‌كه‌ به‌رپرسیار ده‌كرێن.

هه‌روه‌ها له‌ هه‌واڵه‌كه‌دا باس له‌وه‌ كراوه‌ كه‌ راپۆرته‌كه‌ به‌و ئه‌نجامه‌ ده‌گه‌یه‌نن كه‌ ئه‌وانه‌ی ده‌ستیان هه‌بووه‌ له‌و رووداوه‌ی له‌ باڵه‌خانه‌ی كۆنسوڵخانه‌كه‌ روویداوه‌ به‌بێ وه‌رگرتنی مۆڵه‌تی پێویست له‌سه‌رووی خۆیانه‌وه‌ ئه‌و ئۆپه‌راسیۆنه‌یان ئه‌نجامداوه‌.

ئه‌مه‌ له‌ كاتێكدایه‌ كه‌ ھه‌ریه‌كه‌ له‌ نیویۆرك تایمزو سێ ئێن ئێن، ئاشكرایان كردووه‌ كه‌ سعودیه‌ له‌ ھه‌وڵی ئه‌وه‌دایه‌ راگه‌یه‌ندراوێك بڵاوبكاته‌وه‌و دان به‌وه‌دابنێت كه‌ جه‌مال خاشقچی له‌ كاتی لێكۆڵینه‌وه‌دا له‌ كونسوڵخانه‌ی ئه‌و وڵاته‌ له‌ ئه‌سته‌بوڵ كوژراوه‌.

PUKmedia ئاژانسه‌كان