پشده‌ر.. به‌هۆی نه‌خۆشییه‌كی نه‌ناسراوه‌ 2 كه‌س گیانیانله‌ده‌ستدا

.

دوو هاووڵاتی له‌ گوندێكی سه‌ربه‌ قه‌زای پشده‌ر به‌ هۆی نه‌خۆشییه‌كی نه‌ناسراوه‌و گیانیان له‌ده‌ستداوه‌و ژماره‌یه‌كی ترش توشبوون.

ته‌ها محه‌مه‌د وته‌بێژی به‌ڕێوه‌به‌رایه‌تی ته‌ندروستی راپه‌ڕین به‌ PUKmedia ی راگه‌یاند: دوو هاووڵاتی له‌ گوندێكی سه‌ربه‌ قه‌زای پشده‌ر به‌هۆی نه‌خۆشییه‌كی نه‌ناسراوه‌و گیانیان له‌ده‌ستداوه‌.

راشیگه‌یاند: جگه‌ له‌و دوو كه‌سه‌ی كه‌ گیانیان له‌ده‌ستداوه‌ 10 هاووڵاتی تریش، تووشی هه‌مان نه‌خۆشی بوون،  به‌ڵام له‌ئێستادا ته‌نیا 3 كه‌س له‌ نه‌خۆشخانه‌ له‌ژێر چاودێری پزیشكیدان و ئه‌وانیتر له‌دوای چاره‌سه‌ری پێویست و باشبوونی باری ته‌ندروستییان نه‌خۆشخانه‌یان به‌جێهێشتووه‌. 

وتیشی: تیمه‌ ته‌ندروستییه‌كانی سه‌ربه‌ ئیداره‌ی راپه‌ڕین به‌ هه‌ماهه‌نگی له‌گه‌ڵ تیمه‌كانی ته‌ندروستی سلێمانی هه‌وڵه‌كانیان خستووه‌ته‌گه‌ڕ بۆ چاره‌سه‌ردنی توشبوان و كۆنتڕۆڵكردنی نه‌خۆشییه‌كه‌.

 ته‌ها محه‌مه‌د ئاماژه‌ی به‌وه‌شدا، ئه‌و نه‌خۆشییه‌ نه‌ناسراوه‌، بۆ هیچ شارو شارۆچكه‌یه‌كی تری هه‌رێم نه‌گوازراوه‌ته‌وه‌و ئه‌و هاووڵاتییانه‌ش كه‌ توشی نه‌خۆشییه‌كه‌بوون  12 هاووڵاتی دانیشتووی ئه‌و گونده‌ن كه‌ زۆربه‌یان ئه‌ندامی یه‌ك خێزانن.

 وتیشی: نیشانه‌كانی نه‌خۆشییه‌كه‌ش ته‌نگه‌نه‌فه‌سی و هه‌وكردن و برین له‌ده‌م و سه‌ر زمانی كه‌سی توشبوو دروستده‌بێت، وتیشی: خۆشبه‌ختانه‌ به‌شێكی زۆری نه‌خۆشه‌كان چاره‌سه‌ری پێویستیان بۆكراوه‌و باری ته‌ندروستییان جێگیره‌.

PUKmedia تایبه‌ت