شاڵاو كۆسره‌ت: ئه‌رده‌لان به‌كر یه‌كێك بوو له‌ هونه‌رمه‌نده‌ به‌ هه‌ڵوێسته‌كانی كورد

.

له‌ ساڵیادی كۆچی ناوه‌ختی هونه‌رمه‌ندی جوانه‌مه‌رگ ئه‌رده‌لان به‌كر، شاڵاو كۆسره‌ت ڕه‌سول لێپرسراوی مه‌ڵبه‌ندی 3ی هه‌ولێر، بروسكه‌یه‌كی ئاڕاسته‌ی كه‌سوكارو سه‌رجه‌م هونه‌رمه‌ندان كردوه‌، كه‌ ئه‌مه‌ ده‌قه‌كه‌یه‌تی:

له‌ ساڵیادی كۆچی ناوه‌ختی هونه‌رمه‌ندی جوانه‌مه‌رگ ئه‌رده‌لان به‌كر
9 ساڵ له‌مه‌وبه‌ر، له‌ ڕۆژێكی وه‌ك ئه‌مڕۆدا، هه‌واڵی ناواده‌ی كۆچی دوایی هونه‌رمه‌ندو پێشمه‌رگه‌ی به‌ هه‌ڵوێست ئه‌رده‌لان به‌كر هه‌موومانی تاساندو خه‌مبار كرد.
ئه‌رده‌لان به‌كر یه‌كێك بوو له‌ هونه‌رمه‌نده‌ به‌تواناو به‌ هه‌ڵوێست و هه‌قبێژه‌كانی كورد، ئه‌رده‌لان هونه‌رمه‌ندێكی به‌ سه‌لیقه‌و به‌تواناو جوانبێژ بوو، هه‌میشه‌ به‌ گۆرانییه‌كانی جۆش و خرۆشی پێ ده‌به‌خشین و ده‌یبردینه‌ دنیا جوانه‌كه‌ی هونه‌رو میوزیك و گۆرانی، ده‌نگ و تۆنی ئه‌رده‌لان جیاواز بوو، پڕی بوو له‌ سه‌مفۆنیاو میوزیك.

ئه‌رده‌لان به‌كر جیا له‌ هونه‌ره‌كه‌ی، له‌ هه‌ڕه‌تی لاوی و له‌ سه‌رده‌می حوكمی به‌عس یه‌كێك بوو له‌و لاوه‌ خوێنگه‌رمانه‌ی چه‌كی شه‌ره‌فی كرده‌شان و خۆشی شاری كرده‌ قوربانی خه‌بات له‌ شاخ، ئه‌گه‌رچی مه‌رگ زوو ئه‌رده‌لانی لێسه‌ندین، به‌ڵام یادو یادگاری و هه‌ڵوێسته‌كانی هه‌میشه‌ له‌ دڵماندایه‌، به‌رهه‌مه‌كانی بۆ هه‌میشه‌ به‌ نه‌مری ده‌مێننه‌وه‌و ئارامیمان پێ ده‌به‌خشن.

هه‌زاران سڵاو له‌ ڕۆحی ئه‌رده‌لان به‌كری هونه‌رمه‌ندو پێشمه‌رگه‌ی به‌هه‌ڵوێست.


شاڵاو كۆسره‌ت ڕه‌سول

لێپرسراوی مه‌ڵبه‌ندی 3ی هه‌ولێر

PUKmedia