عومه‌ر فه‌تاح: یه‌كێتی بۆ كه‌ركوك قوربانی داوه‌

.

سه‌رله‌به‌یانی ئه‌مڕۆ چوار شه‌ممه‌ 10-10-2018 عومه‌ر فه‌تاح به‌ ئاماده‌بوونی ته‌حسین نامیق، پێشوازیكرد له‌ مانۆج ماسیۆ  به‌رێوه‌به‌ری ئۆفیسی سیاسی نه‌ته‌وه‌یه‌كگرتووه‌كان له‌ عێراقو وه‌فدێكی یاوه‌ری.

عومه‌ر فه‌تاح كارگێڕی مه‌كته‌بی سیاسی و وه‌فدێكی یونامی له‌ عێراق تاوتوێ دۆخی سیاسی كوردستانو عێراقیان كرد و جه‌ختیان له‌ گفتوگۆو هه‌نگاوی هاوبه‌ش كرده‌وه‌ بۆ چاره‌سه‌ركردنی كێشه‌كان.

عومه‌ر فه‌تاح رایگه‌یاند: وه‌ك یه‌كێتی یه‌كریزی لایه‌نه‌ سیاسیه‌كان و به‌دیهێنانی مافه‌كانی گه‌لی كوردستان له‌ پۆست و پشكی حوكمڕانی لا گرنگتره‌.

وتیشی: به‌بێ ته‌بایی هێزه‌ سیاسیه‌كان به‌تایبه‌تی یه‌كێتیو پارتی كوردستان ئۆقره‌یی به‌خۆیه‌وه‌ نابینێو به‌بێ یه‌كتریش ناتوانن حوكمڕانی بكه‌ن له‌ كوردستان.
سه‌باره‌ت به‌ هه‌ڵبژاردنی كوردستانیش كارگێڕی مه‌كته‌بی سیاسی رایگه‌یاند: دوای راگه‌یاندنی ئه‌نجامی كۆتایی، یه‌كێتی هه‌ڵوێستی كۆتایی خۆی راده‌گه‌یه‌نێو هیوادارین كۆمیسیۆن به‌بێلایه‌نیو به‌پێی یاسا و به‌بێ زیاده‌ره‌وی كاره‌كانی ته‌واو بكات.

عومه‌ر فه‌تاح روونیشیكرده‌وه‌: سه‌رۆك مام جه‌لالو حزبی سه‌رۆك مام جه‌لال له‌عیراقو لای هه‌موو پێكهاته‌كانی عیراق پێگه‌و رێزی گه‌وره‌ی هه‌یه‌.

سه‌باره‌ت به‌ كه‌ركوكیش جه‌ختی له‌سه‌ر ئاسایی كردنه‌وه‌ی دۆخی كه‌ركوك و كاراكردنه‌وه‌ی ئه‌نجومه‌نی پارێزگاو دانانی پارێزگارێكی نوێ بۆ كه‌ركوك كرده‌وه‌و رایگه‌یاند: سیاسه‌تی سه‌رۆك مام جه‌لال بۆ كه‌ركوك، كه‌ بنه‌ماكه‌ی پێكه‌وه‌ژیان و ته‌بایی نێوان پێكهاته‌ ره‌سه‌نه‌كانو خزمه‌تكردنی دانیشتوانی شاره‌كه‌ به‌بێ جیاوازیی جێبه‌جێ ده‌كه‌ین.

راشیگه‌یاند:  یه‌كێتی شه‌هید و قوربانی زۆری له‌پێناوی كه‌ركوكدا به‌خشیوه‌، زۆرجاریش یه‌كێتی كراوه‌ته‌ قوربانی كه‌ركوك، پێگه‌ی جه‌ماوه‌ری و سیاسی یه‌كێتی له‌نێو هه‌موو پێكهاته‌كانی كه‌ركوك به‌هێزه‌ و پێمان وایه‌ یه‌كێتی هێزێكی شایسته‌یه‌ بتوانێ خزمه‌تی كه‌ركوك بكات.

لای خۆشیانه‌وه‌ وه‌فدی یونامی ئاماده‌یی خۆیان پیشاندا بۆ هاوكاری كردنی لایه‌نه‌ سیاسیه‌كان بۆ چاره‌سه‌ركردنی كێشه‌كان و ئاسایی كردنه‌وه‌ی دۆخی كه‌ركوك پیشانداو هیوایان خواست كۆمیسیۆن دادپه‌روه‌رانه‌و به‌ یه‌كسانی سكالاَكان له‌سه‌ر هه‌ڵبژاردن یه‌كلابكه‌نه‌وه‌.

PUKmedia