یه‌كێتی: نابێت هه‌موو پۆسته‌كان بۆ لایه‌نێك بن

.

وه‌فدی باڵای یه‌كێتی له‌ به‌غدایه‌ بۆ پشتیوانی له‌ تاكه‌ كاندیدی یه‌كێتی بۆ پۆستی سه‌رۆك كۆمار و داواش له‌ پارتی ده‌كه‌ن كاندیده‌كه‌ی بكشێنێته‌وه‌و له‌ جیاوازی نێوان كاندیدی یه‌كێی و پارتی تێبگه‌ن.

ئاسۆ مامه‌ند لێپرسراوی مه‌ڵبه‌ندی دووی رێكخستنی كه‌ركوكی یه‌كێتی نیشتمانی كوردستان له‌ لێدوانێكی رۆژنامه‌وانیدا بۆ گه‌لی كوردستان رایگه‌یاند: ئێمه‌ له‌ به‌غداین بۆ پشتیوانی كردن له‌ د. به‌رهه‌م ئه‌حمه‌د ساڵح وه‌ك تاكه‌ كاندیدی یه‌كێتیی نیشتمانیی كوردستان بۆ پۆستی سه‌رۆك كۆمار.

وتیشی: ئێمه‌ پێمان خۆشه‌ پارتی خۆی له‌ جیاوازی كاندیدی ئێمه‌ و كاندیدی خۆیان تێبگه‌ن و كاندیده‌كه‌یان بۆ پۆستی سه‌رۆك كۆمار بكشێننه‌وه‌ بۆ پاراستنی یه‌كڕیزی كورد.

هاوكات لاهوڕ شێخ جه‌نگی وتی: بۆ پاراستی هاوسه‌نگی هێز ده‌بێت پۆسته‌كان دابه‌ش بكرێن و نابێت هه‌موو پۆسته‌كان لای یه‌ك لایه‌ن بن.

وتیشی: د. به‌رهه‌م كه‌سێكی شایسته‌یه‌ بۆ به‌هێزكردنی پێگه‌ی كورد و هاوكات بۆ پاراستی په‌یوه‌ندیه‌ ناوخۆیی و نێوده‌وڵه‌تیه‌كانی عیراقیش، چونكه‌ پێویسته‌ كه‌سێك ببێته‌ سه‌رۆك كۆمار كه‌ بتوانێت په‌یوه‌ندیه‌كان رێكبخاته‌وه‌و د. به‌رهه‌میش شاره‌زایی كاركردنی له‌ به‌غدا هه‌یه‌.

PUKmedia تایبه‌ت