سه‌دان هه‌ڵسوڕاوی گۆڕان ده‌گه‌ڕێنه‌وه‌ ماڵه‌ گه‌وره‌كه‌ی یه‌كێتی

.

له‌ سنووری ڕاپه‌ڕین به‌ سه‌دان هه‌ڵسوڕاوی بزوتنه‌وه‌ی گۆڕان ده‌گه‌ڕێنه‌وه‌ بۆ ماڵه‌ گه‌وره‌كه‌ی یه‌كێتیی نیشتمانیی كوردستان و بڕیاریانداوه‌ كه‌ له‌ڕۆژی هه‌ڵبژاردنی 30 ی ئه‌یلول ده‌نگ بده‌ن به‌ یه‌كێتی.

له‌چوارچێوه‌ی بێ ئومێد بوونی هه‌ڵسوراوان و ده‌نگده‌رانی بزوتنه‌وه‌ی گۆڕان له‌كه‌رنه‌ڤاڵێكی فراواندا به‌ئاماده‌بونی وه‌ستا ره‌سوڵ لێپرسراوی مه‌ڵبه‌ندی 24ی راپه‌ڕین و به‌شێك له‌فه‌رمانده‌كانی یه‌كێتی له‌سنووری ئیداره‌ی راپه‌ڕین سه‌دان هه‌ڵسوراوی بزوتنه‌وه‌ی گۆڕان په‌یوه‌ندییان به‌ڕیزه‌كانی یه‌كێتی نیشتمانی كوردستانه‌وه‌ كردوو رایانگه‌یاند یه‌كێتی حزبی ئومێدی كۆمه‌ڵانی خه‌ڵكی كوردستانه‌و له‌ رۆژی 30 ئه‌یلولدا ده‌نگ به‌لیست و كاندیده‌كانی یه‌كێتی ده‌ده‌ن.

 له‌وباره‌یه‌وه‌ وه‌ستا ڕه‌سوڵ لێپرسراوی مه‌ڵبه‌ندی 24 ڕاپه‌ڕین ڕایگه‌یاند: له‌ئێستادا به‌ ته‌وژم لایه‌نگر و هه‌وادار و ئه‌ندامی حزبه‌كانی تری كوردستان دێنه‌ ناو ڕێزه‌كانی یه‌كێتیی نیشتمانیی كوردستان و له‌ سنووری چوار قوڕنه‌ و حاجیاوا و سنووری ڕانیه‌ به‌ سه‌دان كه‌س له‌ لایه‌نگرانی و هه‌ڵسوڕاوانی بزوتنه‌وه‌ی گۆڕان گه‌ڕاونه‌ته‌وه‌ ناو ماڵه‌ گه‌وره‌كه‌ی یه‌كێتیی نیشتمانیی كوردستان و ئه‌مه‌ش وه‌رچه‌رخانێكی گه‌وره‌ له‌ ده‌ڤه‌ره‌كه‌ دروست ده‌كات.

به‌رپرسی رایه‌ڵه‌ی كه‌سایه‌تی و ئه‌ندامی جڤاتی نیشتمانیی بزوتنه‌وه‌ی گۆڕان له‌لێدوانێكدا به‌ كه‌ناڵی گه‌لی كوردستانی ڕایگه‌یاندووه‌ كه‌ له‌ پاش كۆچی دوایی كاك نه‌وشیروان مسته‌فا هیچ ڕووناكی و تروسكاییم  له‌ناو بزوتنه‌وه‌ی گۆڕاندا نه‌دیوه‌، هه‌ر بۆیه‌ به‌ قه‌ناعه‌تی خۆم بڕیارمدا دا واز له‌ بزوتنه‌وه‌ی گۆڕان بهێنین و سه‌نگه‌ری خۆمان گواستۆته‌وه‌ بۆ ناو یه‌كێتیی نیشتمانیی كوردستان و درێژه‌ به‌ خه‌باتی سیاسی خۆمان ده‌ده‌ین و ئاماده‌ین هه‌موو تواناكانی خۆمان بخه‌ین گه‌ڕ بۆ ڕێژه‌ی ده‌نگه‌كانی كاك قوباد تاڵه‌بانی و لیستی 105.

یه‌كێكی تر له‌ هه‌ڵسوڕاوانی بزوتنه‌وه‌ی گۆڕان كه‌ گه‌ڕاوه‌ته‌وه‌ ناو ریزه‌كانی یه‌كێتی ده‌ڵێت: به‌ شانازییه‌وه‌ گه‌ڕامه‌وه‌ ناو ڕیزه‌كانی یه‌كێتی و به‌گیان و دڵ هه‌وڵده‌ده‌ین بۆ سه‌ركه‌وتن لیستی 105 و ڕێبازه‌كه‌ی سه‌رۆك مام جه‌لال.

لینكی یاریده‌ده‌ر بۆ بینینی ڤیدیۆكه‌................

PUKmedia