سلێمانی.. بڕێكی زۆر خۆراكی خراپبوو له‌ناوده‌برێت

.

به‌هۆی نه‌شیاوی بۆ خواردن و به‌كارهێنان، لیژنه‌ هاوبه‌شه‌كان ده‌ست به‌سه‌ر بڕێكی زۆر نۆكی له‌ كیسنراودا ده‌گرن و به‌فه‌رمانی قائیمقامی سلێمانی له‌ناوده‌برێت.

به‌روار محه‌مه‌د، سه‌رۆكی لیژنه‌ی كۆگاكانی سه‌ر به‌ لیژنه‌ هاوبه‌شه‌كانی قائیمقامیه‌تی سلێمانی رایگه‌یاند؛ به‌هۆی خراپبون و نه‌شیاوی بۆ خواردن و به‌كارهێنان، لیژنه‌ هاوبه‌شه‌كان‌ له‌‌ كۆگایه‌كی شاری سلێمانی ده‌ستیان به‌سه‌ر زیاتر له‌سه‌د كارتۆن نۆكی له‌ كیس نراودا گرتووه‌‌.

هه‌روه‌ها وتی: رۆژانه‌ لیژنه‌ هاوبه‌شه‌كان سه‌ردانی بازاڕ و شوێنه‌ گشتیه‌كان ده‌كه‌ن له‌لایه‌ن كه‌سانی شاره‌زار و پسپۆڕه‌ جیاوازه‌كانه‌وه‌ پشكنین بۆ ئه‌و كاڵاوشمه‌كانه‌ ده‌كرێت له‌لایه‌ن هاوڵاتیانه‌وه‌ به‌كارده‌هێنرێت، له‌ هه‌بونی خۆراك و ماده‌ی خراپ و به‌سه‌رچودا شوێنه‌كه و خاوه‌نه‌كه‌ی رووبه‌رووی سزاده‌كرێته‌وه‌.

وتیشی: نۆكه‌ ده‌ست به‌سه‌ردا گیراوه‌كه‌ له‌جۆری (رنو)ه‌، بڕه‌كه‌ی حه‌وت سه‌د و 70 كیلۆگرامه كه‌به‌هۆی هه‌ڵهێنانی مێشوله‌وه‌ شیاوی خواردن و به‌كارهێنان نیه‌‌.

هه‌روه‌ك ئه‌وه‌شی رونكرده‌وه‌، به‌فه‌رمانی قائیمقامی سلێمانی و له‌لایه‌ن لیژنه‌ی له‌ناوبردنی سه‌ربه‌ لیژنه‌ هاوبه‌شه‌كانه‌وه‌ له‌ناوچه‌ی تانجه‌رۆ له‌ناوده‌برێت.

PUKmedia راگه‌یاندنی قائیمقامیه‌تی سلێمانی