تۆپخانه‌كه‌ بوه‌ستێنن راسته‌ بانگه‌شه‌یه‌، به‌ڵام شه‌ڕ نییه‌

.

ئه‌مه‌ پێنجه‌مین كه‌مپینی هه‌ڵبژاردنه‌ و تیمی هه‌ڵمه‌تی بانگه‌شه‌ و راگه‌یاندنی یه‌كێتی هه‌ر له‌سه‌ره‌تاوه‌ به‌و نه‌فه‌سه‌ هه‌ڵمه‌ته‌كه‌ی ده‌ستپێده‌كات كه‌ كێبڕكێ له‌گه‌ڵ لیست و قه‌واره‌كانی به‌رامبه‌ریدا ده‌كات و به‌ پره‌نسیپی بانگه‌شه‌ی هه‌ڵبژاردن به‌ پێی ستانداردی هه‌ر هه‌ڵبژاردنێك كاری خۆی ده‌كات و بانگه‌شه‌ بۆ به‌رنامه‌ سیاسییه‌كه‌ی خۆی و سه‌رخستنی لیسته‌كه‌ی ده‌كات، به‌ڵام ئه‌وه‌ی به‌دیده‌كرێت لایه‌نه‌ كێبڕكێكار و ركابه‌ره‌كان به‌جۆرێك مامه‌ڵه‌ ده‌كه‌ن و كه‌مپینی خۆیان ده‌كه‌ن وه‌ك ئه‌وه‌ی گه‌ره‌كیان بێت ئێسك و پروسكی یه‌كێتی بهاڕن و ئیتر له‌دوای ئه‌م هه‌ڵبژاردنه‌وه‌ یه‌كێتی ببێته‌ پۆڕی خوراو و ئاردی ناو دڕك، هه‌ربۆیه‌شه‌ ده‌زگایه‌كی میدیایی كه‌ ده‌بێت ئه‌ركی په‌ره‌پێدانی چه‌مكی لێبورده‌یی و پێكه‌وه‌ ژیان و بڵاوكردنه‌وه‌ی چه‌مكی دیموكراسی بێت، كه‌چی هه‌ر خۆیان ناودێری ده‌كه‌ن به‌ «تۆپخانه‌».

ده‌شێت هه‌ندێك هاووڵاتیی له‌ قۆناغه‌كانی رابردوودا كه‌وتبنه‌ به‌ر كاریگه‌ریی ئه‌و تۆپخانه‌یه‌و ته‌سلیمی گرم و هوڕی ئه‌و تۆپخانه‌یه‌ بووبن، به‌ڵام خۆشبه‌ختانه‌، خۆیان وته‌نی: «هاووڵاتییان ئێستا هۆشیار بوونه‌ته‌وه‌و به‌ئاسانی كڵاویان ناچێته‌سه‌ر»، هه‌ر به‌و پێودانگه‌ش له‌ چه‌ند گه‌ڕێكی بانگه‌شه‌ی هه‌ڵبژاردندا له‌ 2009وه‌ تا 2014 زۆر گوێبیستی زرم و هۆڕی ئه‌و تۆپخانه‌یه‌ بوون، به‌ڵام دواجار كه‌ ته‌پ وتۆز و دوكه‌ڵی فڕو فیشاڵه‌كان نیشتنه‌وه‌، حاڵی بوون له‌وه‌ی كه‌ تۆپخانه‌كه‌ نه‌ك نه‌یتوانیووه‌ ئامانجه‌كانی بپێكێت به‌ڵكو زۆر گولله‌ی ئه‌و تۆپانه‌ جگه‌له‌وه‌ی ژه‌نگگرتوو چروكن، ئامانجه‌كانیش به‌هه‌ڵه‌ ده‌پێكن و له‌جیاتی پێكانی ماڵی «ركابه‌رو نه‌یار» ماڵی هه‌وادارو دۆست و لایه‌نگرانی تۆپخانه‌كه‌ی پێكاوه‌و دابه‌زینی كێرڤی ده‌نگه‌كانیشیان له‌ هه‌ڵبژاردنێكه‌وه‌ بۆ یه‌كێكی تر سه‌لمێنه‌ری چروكی و ژه‌نگگرتوویی تۆپخانه‌و جبه‌خانه‌كه‌یانه‌، هه‌ربۆیه‌ واباشتره‌ به‌ر له‌ هاتنه‌ مه‌یدانی ململانێی سیاسی و دیموكراسییه‌وه‌، چاوێك به‌ دروشمه‌ ژه‌نگگرتووه‌كانتاندا بگێڕنه‌وه‌ و چه‌یكێكی گولله‌ تۆپه‌ چروكه‌كانتان بكه‌نه‌وه‌، چونكه‌ ئیتر تۆپه‌كه‌تان ده‌رزییه‌كه‌ی شكاوه‌و ته‌قه‌ ناكات و چیتر خه‌ڵكه‌ هۆشیاره‌كه‌ی كوردستانتان پێ فریونادرێت.

دیده‌وانی راگه‌یاندن
PUKmedia کوردستانی نوێ