قوباد تاڵەبانی: مێژووی هەڵەبجە پڕیەتی لە ئازایەتی

.

قوباد تاڵەبانی سەرۆكی لیستی 105 ی یەكێتیی نیشتمانیی كوردستان لە میانی بەشداری كردنی لە هەڵمەتی بانگەشەی هەڵبژاردن و ناساندنی كاندیدانی لیستی 105 لە هۆڵی بۆنەكانی پارێزگای هەڵەبجە بەخێرهاتنی ئامادەبووانی كرد و رایگەیاند، مێژوو سەلماندوویەتی هەڵەبجە بەهێزە و تەنها چیرۆكی دڵتەزێن و كیمیابارانكردنی نییە بەڵكو مێژووی هەڵەبجە پڕیەتی لە ئازایەتی زۆرینەی بەناوبانگترین شاعیرە كوردەكان خەڵكی ئەم پارێزگا شۆرشگێرەن و ئەو چیرۆكە دڵتەزێنانە بێ ئومێدی ناكات.

وتیشی: ئێمە دەزانین خەڵك نیگەرانە بێ كارە لەم بارودۆخەی ئێستا هەرێم ماندووە و چاوەڕێی خزمەتگوزاری باشترە، زۆر لایەنی تر بەڵێنی بێ كرداری پێداون كە هەرچەندە یەكێتیش بێ گەرد نییە، بەڵام پابەندبووە بە بەڵینەكانی خۆیەوە.

لە درێژەی وتەكانیدا قوباد تاڵەبانی راشیگەیاند: بەداخەوین كە ماوەیەكی زۆرە پشتمان بەستووە بە داهاتی نەوت وەك سەرچاوە بەڵام بە پشتیوانی و سەبری ئێوە دەتوانین ئەم بارودۆخەش تێبپەڕێنین و بارودۆخی حكومەت لە باشبووندایە.

لە كۆتایی وتەكەشیدا وتی: یەكێتی كادر و پێشمەرگە و جەماوەری وەك ئێوە دڵسۆزی هەبێت بەردەوام دەبێت لە خزمەت و باشتر پێشكەش دەكات، مایەی شەرەفمەندیشە بۆ یەكێتی كە ئێستا هەڵبجە پارێزگایە و بەندەش سەرۆكی لیژنەی بە پارێزگاكردنی هەڵەبجە بووەو كردیشمانە پارێزگا.

لە كۆتایی مەراسیمەكەشدا هەمووان بە یەك دەنگ دروشمی لیستی 105 ی یەكێتیی نیشتمانیی كوردستانیان وتەوە، بۆ ئارامی.. هەلی كار.. خزمەت.

PUKmedia  تایبەت