مەلا بەختیار:سوارچاكمان كردۆتە سەرقافڵەی لیستەكەمان

.

ژمارەیەك لەگەنجان و لاوانی بێگەڵاسی دەڤەری پشدەر، بەئامانجی پشتیوانی لە لیستی (105)ی یەكێتیی نیشتمانیی كوردستان و وەفاداریان بۆ جەنابی مام جەلال، لە مەكتەبی سیاسی سلێمانی، سەردانی لێپرسراوی دەستەی كارگێڕی دەكەن.

لەدیدارێكیشدا، كە ئەمڕۆ (15/9/2018) بەڕێوەچوو، مەلا بەختیار، بەرپرسی دەستەی كارگێڕی، سەردان و پشتیوانیی خزمانی بێگەڵاسی بۆ سەرخستنی لیستی (105) بەگرنگ و وەفداری بۆ یەكێتیی و جەنابی مام جەلال ناوبردو تەئكیدشی كردەوە: دانیشتوانی كوردستان و دەڤەرە جیاجاكان، دانیشتووانی رەسەنی دەڤەرەكەن‌و لەپێناو مانەوەیان لەسەر خاكەكەیان‌و پاراستنی كەلتور، زمان، داب‌و نەریتەكانیان، بەدرێژایی مێژوو سەرسەختانە بەرگریان كردووەو كەم نەتەوە هەیە لەدنیادا، دەسەڵاتی روخێندرابێ و ئایینەكەی زەوتكرابێ، بەڵام خۆی پاراستبێت‌و سەرەڕای ئەو هەموو قەتڵ‌و عام‌و پیلانگێڕییە، بەڵام نەتەوەكەمان، سەربەرزانە توانی خۆی رابگرێت‌و چۆك دانەدات‌و بگاتە ئەمڕۆ.

لەو روانگەیەشەوە، لەناوچوونی میرنشینەكانی بەنمونە هێنایەوەو وتی: بەداخەوە، ئەگەر هەتا جەنگی جیهانی یەكەم، تاكە میرنشینێكی كورد بمایە، لەگۆڕانكارییەكانی جەنگی یەكەمدا، كوردستان دەیتوانی ببێتە خاوەن دەوڵەتی سەربەخۆ و هاوكات مێژووی فیداكاری نەتەوەكەمان و گیانبەختكردنی بەدرێژایی مێژوو، هەتا دەگاتە هەڵگیرساندنی شۆڕشی نوێ، بەمێژوویەكی نوێ لەفیداكاری نەتەوەیی‌و بەرگری لەنەژداو نەتەوەكەمان ‌و یەكێتیشی، بەشەكێنەرەوەی ئاڵای ئەو مێژووە نوێیە لەخەباتی نەتەوەكەمان ناوبرد.

لێپرسراوی دەستەی كارگێڕی، خزمەتكردن‌و خەبات لەپێناو نەتەوەدا، بەشانازی مێژوویی بۆ هەر تێكۆشەرێك پێناسەكردو بەپێچەوانەشەوە وتی: تێكۆشەر لەپێناو نەتەوەدا، خەبات دەكات‌و بۆ ئازادی، دیموكراسی، رۆشنگەریی، سەربەستی، مەدەنیەت، یەكسانی و دادپەروەری گیانبازی دەنوێنێ، بەڵام چەتەكانی سیاسەت‌و رۆژگار، هەلپەرستانە، دەرفەتەكان لەپێناو گیرفان و پلەو پایەدا دەقۆزنەوە.

ئەرك و ماف، تەوەرێكی تری قسەكانی لێپرسراوی دەستەی كارگێڕی بوو، كە تیایدا ئاماژەی بۆ ئەوەكرد، كە تێكۆشەری راستەقینە، كادری دڵسۆز، لەم چەند رۆژەدا، كە هەڵمەتی هەڵبژاردنە، داواكاری بۆ مافەكانی وەلا دەنێ و سەربەرزانە‌و دڵسۆزانە، شاندەداتە بەر راپەڕاندنی ئەركەكانی بۆ سەرخستنی لیستەكەی، بیانو ناگرێ، بەڵكو هەوڵدەدات‌و هیممەت دەكات، باشتر لەهەڵبژاردنی رابردوو لیستەكەی مام سەربخات‌و پاش راگەیاندنی ئەنجامەكان و سەركەوتنی لیستی (105)، ئەوكاتە بەویژدانێكی ئاسودەوە، دێت و زیاتر لەرابردوو داوای مافەكانی دەكات.

تەئكیدیشی كردەوە: ئەوە هەلپەرستەكانن، لەكاتی پێویست‌و رۆژی تەنگانەدا، ئەركەكانی وەلادەنێ و تەنها داوای مافەكانی دەكات! بەڵام تێكۆشەری راستەقینەو بەوەفا بۆ رۆحی سەوزی مام جەلال و باقی شەهیدە سەربەرزەكان، لەهەڵمەتی هەڵبژاردندا، بیانو ناگرێ! بەڵكو ئەركەكانی رادەپەڕێنێ. هەلپەرست نابێ و دەرفەت نادات بەنەیار و دژەكانی، بەپێچەوانەوە ناهێڵی ناحەزان دەرفەتەكان بقۆزنەوەو كارێك دەكات، لەمێژووی ئاییندەی یەكێتیدا، شانازی سەركەوتنی بەربكەوێت.

مەلا بەختیار، راشیگەیاند: لەلیستی (105)ی یەكێتیدا، سێ سوارچاكمان كردۆتە سەرقافڵەی لیستەكەمان، ئەوانیش كاكە قوبادی كوڕی جەنابی مام جەلال و دوو هەڤاڵی ژن، ئەوانیش ( بێگەرد تاڵەبانی‌و رێواز فایەق)ن، كە ئەمجارەش یەكێتیی شانازی پشتیوانی ژنان‌و یەكسانی نێوان ژن‌و پیاوی بەردەكەوێتەوە.هەڤاڵانی تری لیستەكەش، كچ‌و كوڕی شەهید‌و خاوەن بڕوانامەو لە دڵسۆزەكانی كوردستان‌ویەكێتین.

PUKmedia راگەیاندنی لێپرسراوی دەستەی كارگێڕی